ຕອນສວາຍຂອງວັນທີ 9 ກຸມພາ 2023 , ເຂດບ້ານນາຂ່າ ເມືອງ ນາຊາຍທອງ ເກີດເຫດການໄຟໄຫມ້ປ່າຂ້າງຮົ້ວລົດໄຟ (ຕາມການກວດສອບຂອງເຈົ້າໜ້າທີ່ສົງໄສມີຄົນຈູດປະໄວ້ບໍ່ມອດ) ແລະ ແຜ່ລາມເຂົ້າໄປໃນຮົ້ວກັ້ນຄວາມປອດໄພລົດໄຟເປັນວົງກວ້າງ ເປັນຄວາມຍາວປະມານ 500 ແມັດ, ເປັນອັນຕະລາຍຕໍ່ອຸປະກອນທາງລົດໄຟ, ການແລ່ນລົດ ແລະ ຊີວິດຂອງຜູ້ໂດຍສານເທິງລົດໄຟເປັນຢ່າງຍິ່ງ. ຫຼັງຈາກໄດ້ຮັບແຈ້ງ ທາງເຈົ້າໜ້າທີ່ລົດໄຟທຸກພາກສ່ວນກໍໄດ້ລົງໄປກວດສອບຈຸດເກີດເຫດ ແລະ ດັບໄຟໄດ້ຢ່າງທ່ວງທັນ.
ການຈູດໄຟບໍລິເວນເຂດສະຫງວນລົດໄຟ ເປັນສິ່ງທີ່ຜິດຕໍ່ລະບຽບກົດໝາຍວ່າດ້ວຍການລົດໄຟ ແລະ ລະບຽບການຄຸ້ມຄອງຄວາມປອດໄພທາງລົດໄຟ, ໃນນັ້ນ, ໃນລະບຽບກົດໝາຍວ່າດ້ວຍການລົດໄຟໝວດທີ 3 ຂໍ້ທີ 23 ໄດ້ລະບຸໄວ້ຢ່າງຊັດເຈນວ່າ “ຫ້າມບໍ່ໃຫ້ທໍາການຈູດປ່າ, ລ້ຽງສັດ ແລະ ປູກຕົ້ນໄມ້ ທີ່ມີຜົນກະທົບຕໍ່ຄວາມປອດໄພ ຫຼື ກີດຂວາງ ບັງການແນມເຫັນການສັນຈອນຂອງການແລ່ນລົດໄຟ ຢູ່ໃນເຂດສະຫງວນຄວາມປອດໄພທາງລົດໄຟ” (ເຂດສະຫງວນລົດໄຟແມ່ນເຂດບໍລິເວນ 50 ແມັດຈາກຈຸດໃຈກາງຂອງລາງລົດໄຟອອກໄປ).
ຫາກປະຊາຊົນຍັງບໍ່ເຄົາລົບຕໍ່ລະບຽບກົດໝາຍ, ອັນຕະລາຍທີ່ຈະເກີດຂຶ້ນ ບໍ່ພຽງອັນຕະລາຍຕໍ່ອຸປະກອນທາງລົດໄຟຈຳນວນຫນຶ່ງ, ແຕ່ຍັງເປັນອັນຕະລາຍຕໍ່ຜູ້ໂດຍສານອີກຫຼາຍຮ້ອຍຊີວິດທີ່ຢູ່ໃນຂະບວນລົດໄຟ ແລະ ຍັງເຮັດໃຫ້ເປັນອັນຕະລາຍ ແລະ ເກີດຜົນເສຍຫາຍຕໍ່ຊັບສິນຂອງຊາດ. ສະນັ້ນ, ຈິ່ງຮຽກຮ້ອງໃຫ້ພໍ່ແມ່ປະຊາຊົນໃຫ້ຄວາມຮ່ວມມື, ຮ່ວມແຮງຮ່ວມໃຈກັນ, ປະຕິບັດຕາມລະບຽບກົດໝາຍ, ຫາກພົບເຫັນເຫດການທີ່ອັນຕະລາຍຕໍ່ການແລ່ນລົດໄຟ ຫຼື ພົບເຫັນຜູ້ຈະກະທຳຜິດຄືດັ່ງການຈູດຂີ້ເຫຍື້ອ, ກໍ່ກອງໄຟຢູ່ບໍລິເວນເຂດລົດໄຟ ກໍໃຫ້ຫ້າມປາມ ແລະ ຕັກເຕືອນຊ່ວຍກັນ, ເພື່ອຄວາມປອດໄພຂອງຊີວິດ ແລະ ຊັບສິນຂອງຜູ້ໂດຍສານຢູ່ເທິງຂະບວນລົດໄຟ.
