ຕາມການໃຫ້ຂໍ້ມູນຂອງເຈົ້າໜ້າທີ່ ພະແນກສືບສວນ- ສອບສວນ ປກສ ແຂວງຫຼວງນ້ຳທາ ໃຫ້ຮູ້ວ່າ: ໃນວັນທີ 28 ກໍລະກົດ 2024 ເວລາປະມານ 12 ໂມງ ໄດ້ມີຄົນຮ້າຍປຸ້ນຊັບ ຢູ່ຮ້ານຂາຍຄໍາ ໃນຕະຫຼາດອຸດສາຫະກຳ ແຂວງຫຼວງນໍ້າທາ ຜູ້ເສຍຫາຍຊື່ ນາງ ຈິດ ອາຍຸ 35 ປີ ອາຊີບຄ້າຂາຍ ປະຈຸບັນຢູ່ ບ້ານດອນສໍາພັນ ເມືອງ ແລະ ແຂວງຫຼວງນໍ້າທາ ຜົນເສຍຫາຍມີວັດຖຸຄ້າຍຄືຄໍາ 12 ບາດ; ລັກສະນະຂອງຄົນຮ້າຍທີ່ເຂົ້າມາປຸ້ນຊັບ ແມ່ນເປັນຄົນຈ່ອຍສູງ, ນຸ່ງເສື້ອນອກແຂນຍາວສີຂາວ, ໂສ້ງຂາຍາວສີຂາວ, ໃສ່ໝວກ ແລະ ແພອັດປາກ.
ຜູ້ກໍ່ເຫດໄດ້ນຳໃຊ້ຄອນຕີເປັນອາວຸດມາທຸບຕູ້ແກ້ວບ່ອນໃສ່ຄຳ ແລ້ວປຸ້ນເອົາຄຳໄປຈຳນວນ 6 ເສັ້ນ, ເສັ້ນລະ 02 ບາດ ລວມນໍ້າໜັກ 12 ບາດ, ມູນຄ່າເສຍຫາຍປະມານ 370.000.000 ກີບ. ຕໍ່ກັບເຫດການດັ່ງກ່າວ, ປັດຈຸບັນທາງເຈົ້າໜ້າທີ່ຕຳຫຼວດ ປກສ ແຂວງຫຼວງນ້ຳທາ ໄດ້ແຕ່ງຕັ້ງກຳລັງວິຊາສະເພາະ ອອກເຄື່ອນໄຫວຕິດຕາມຊອກຫາຄົນຮ້າຍ ເພື່ອນຳເອົາຜູ້ກ່ຽວມາດຳເນີນຄະດີຕາມລະບຽບກົດໝາຍ.
ພາບ-ຂ່າວ ປກສ ແຂວງຫຼວງນ້ຳທາ
