ໃນເວລາ 3 ໂມງ 30 ນາທີຂອງວັນທີ 14 ສິງຫາ 2022 ນີ້, ໄດ້ເກີດເຫດພາຍຸພັດແຮງ ເຮັດໃຫ້ຕົ້ນໄມ້ໃຫ່ຍທີ່ຢູ່ໃກ້ກັບບໍລິ ເວນໂຮງຮຽນ ມັດທະຍົມຕອນຕົ້ນບ້ານມູດ ເມືອງຊຽງເງິນ ໄດ້ລົ້ມຫັກທັບເສົາໄຟຟ້າແຮງກາງ ,ຈາກນັ້ນອົງການປົກຄອງບ້ານມູດຈິ່ງໄດ້ປະສານງານຫາ ພະນັກ ງານສູນບໍລິການໄຟຟ້າເມືອງຊຽງເງິນ ເພື່ອຂໍຄວາມຊ່ວຍເຫຼືອ . ທ່ານບຸນທັນ ພັນໂດລັກ ຫົວໜ້າ ໄຟຟ້າ ສາຂາແຂວງຫຼວງພະບາງ ໄດ້ລາຍງານໃຫ້ຮູ້ວ່າ: ພາຍຫຼັງທີ່ໄດ້ຮັບແຈ້ງຂໍຄວາມຊ່ວຍເຫຼືອຈາກ ສູນບໍລິການໄຟຟ້າເມືອງຊຽງເງິນແລ້ວ, ທາງທີມງານຂອງໄຟຟ້າສາຂາແຂວງຫຼວງພະບາງ ກໍ່ໄດ້ລົງສົມທົບ ສູນບໍລິການໄຟຟ້າ ເມືອງຊຽງເງິນ ເພື່ອລົງເຄື່ອນໄຫວຕິິດຕາມການແກ້ໄຂຜົນກະທົບ ຈາກໄພທຳມະຊາດ ຢູ່ເຂດບ້ານມູດ ເມືອງຊຽງເງິນ, ເນື່ອງຈາກວ່າພາຍຸໄດ້ພັດຜ່ານເຂົ້າພາກເໜືອຂອງລາວເຮົາ ເປັນໄລຍະເວລາຫຼາຍມື້ຈິ່ງເຮັດໃຫ້ມື້ຄືນນີ້ເວລາ 3 ໂມງ 30 ນາທີ ເຮັດໃຫ້ຕົ້ນໄມ້ໃຫ່ຍລົ້ມທັບຕາຄ່າຍໄຟຟ້າ ເຮັດໃຫ້ເສົາໄຟຟ້າເສຍຫາຍ 7 ຕົ້ນ, ມີ 3 ບ້ານໄດ້ຮັບຜົນກະທົບບໍ່ໄດ້ໃຊ້ໄຟເຊັ່ນ: ບ້ານມູດ, ສວນຫຼວງ ແລະ ບ້ານຈັດສັນບວມອໍ້. ປະຈຸບັນນີ້ທີມງານພະນັກງານໄຟຟ້າ ແມ່ນກໍາລັງເລັ່ງມືແກ້ໄຂຜົນກະທົບ ຄາດກະວ່າໃນຕອນແລງມື້ນີ້ຈະສາມາດຊົມໃຊ້ໄຟຟ້າໄດ້, ແລະ ອີກບ່ອນໜື່ງກະແມ່ນສະຖານີລົດໄຟ ບໍໍ່ສາມາດສະໜອງໄຟໃຫ້ໄດ້, ແຕ່ທາງໄຟຟ້າແຂວງຫຼວງພະບາງ ກໍ່ໄດ້ມີການປະສານງານຫາທາງສະຖານີລົດໄຟແລ້ວ ເພື່ອໃຫ້ເຂົາເຈົ້າໄດ້ນຳໃຊ້ຈັກສຳຮອງ, ການເສຍຫາຍໃນຄັ້ງນີ້ ແມ່ນຍັງບໍ່ສາມາດປະເມີນໄດ້ວ່າຕົກເປັນມູນຄ່າເທົ່າໃດ ເພາະວ່າ ເສຍຫາຍຫຼາຍສົມ ຄວນ. ທ່ານບຸນທັນ ພັນໂດລັກ ຫົວໜ້າ ໄຟຟ້າ ສາຂາແຂວງຫຼວງພະບາງຍັງໄດ້ກ່າວຮຽກຮ້ອງໃຫ້ພໍ່ແມ່ປະຊາຊົນ ໂດຍສະເພາະຢູ່ຕາມແລວຕາຄ່າຍໄຟຟ້າ, ຕາມແລວນໍ້າຕ່າງໆ ເພາະວ່າຊ່ວງນີ້ກໍ່ເປັນຊ່ວງລະດູຝົນ, ພາຍຸກໍ່ມັກເຂົ້າຕໍ່ເນື່ອງຕະຫຼອດ ສະນັ້ນ, ພວກເຮົາຕ້ອງມີຄວາມລະມັດລະວັງ, ໄພນໍ້າຖ້ວມ, ຕົ້ນໄມ້ຫັກທັບຕາຄ່າຍໄຟຟ້າ, ຖ້າຫາກພົບເຫັນຕົ້ນໄມ້ຫັກທັບຕາຄ່າຍ ກໍ່ໃຫ້ແຈ້ງຫາສູນໄຟຟ້າ ທີເບີສຸກເສີນ071: 1199 ຫຼືແຈ້ງສູນບໍລິການທີ່ຢູ່ໃກ້ກັບບ້ານທ່ານ ເພື່ອໃຫ້ພະນັກງານໄຟຟ້າອອກມາແກ້ໄຂ ເພື່ອຮັບປະກັນຄວາມປອດໄພ ໃຫ້ແກ່ພໍ່ແມ່ປະຊາຊົນ, ແລະ ໃຫ້ພໍ່ແມ່ປະຊາຊົນມີສ່ວນຮ່ວມ ຖ້າຫາກເຫັນວ່າ: ບ່ອນໃດມີຄວາມສ່ຽງ ເຊັ່ນວ່າ: ຕົ້ນໄມ້ໃກ້ຈະຫັກທັບ, ເສົາໄຟຟ້າມີດິນເສະເຈື່ອນຕ່າງໆ ແມ່ນຂໍໃຫ້ແຈ້ງພະນັກງານໄຟຟ້າ ທີ່ເບີສຸກເສີນ 071: 1199 ທັນທີ.
ພາບ-ຂ່າວ ນາລີ ໄຊຍະຄຳ.
