ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເກີດເຫດອັກຄີໄພ ໄຟໄໝ້ເຮືອນປະຊາຊົນບ້ານ ຜາແດງ

ວັນທີ 6 ມີນາ 2020 ນີ້ ທາງອົງການປົກຄອງເມືອງເງິນ ເຊິ່ງນຳພາໂດຍ ທ່ານ ສອນສຸກ ພວງແກ້ວ ຮອງເລຂາພັກເມືອງ, ພ້ອມດ້ວຍທ່ານ ອຸດອນ ສະກຸນທອງ ຫົວໜ້າຫ້ອງການແຮງງານສະຫວັດດີການ-ສັງຄົມເມືອງ ຕະຫຼອດຮອດພາກສ່ວນທີ່ກ່ຽວຂ້ອງ ໄດ້ນຳເຄື່ອງບັນເທົາທຸກໄປມອບໃຫ້ຄອບຄົວທີ່ຖືກອັກຄີໄພໄຟໄໝ້ເຮືອນຢູ່ທີ່ບ້ານ ຜາແດງ ເມືອງເງິນ ແຂວງ ໄຊຍະບູລີ.

ອັກຄີໄພໄຟໄໝ້ເຮືອນ ປະຊາຊົນບ້ານຜາແດງ ຈຳນວນ 2 ຫຼັງຄາເຮືອນ ເຫດດັ່ງກ່າວແມ່ນເກີດຂຶ້ນໃນເວລາ 2: 00 ນາທີ ຂອງຄໍ່າຄືນວັນທີ 6 ມີນາ 2020 ເຮັດໃຫ້ໄຟໄໝ້ຢ່າງໄວວາ, ພາຍຫຼັງເກີດເຫດປະຊາຊົນບ້ານ ຜາແດງ ກໍ່ໄດ້ຊ່ວຍເຫຼືອກັນດັບມອດ ເພື່ອບໍ່ໃຫ້ລຸກລາມໄປສູ່ເຮືອນຫຼັງອື່ນ, ສຳລັບເຮືອນ 2 ຫຼັງທີ່ໄຟໄໝ້ນັ້ນແມ່ນເຫຼືອແຕ່ເທົ່າຖ່ານ ເພາະວ່າເປັນເຮືອນທີ່ແອ້ມດ້ວຍໄມ້, ມຸງດ້ວຍສັງກະສີເຮັດໃຫ້ໄຟໄໝ້ຢ່າງໄວວາບໍ່ສາມາດດັບມອດໄດ້ ມູນຄ່າເສຍຫາຍທັງໝົດ 122 ລ້ານກວ່າກີບ, ໂຊກດີທີ່ບໍ່ມີຜູ້ໄດ້ຮັບບາດເຈັບ ແລະ ເສຍຊີວິດ. ພາຍຫຼັງໄດ້ຮັບແຈ້ງເຫດທາງເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງກໍ່ຄື: ຫ້ອງການແຮງງານສະຫວັດດີການ-ສັງຄົມເມືອງ ກໍ່ໄດ້ລົງເກັບກຳຂໍ້ມູນ, ພິສູດໃນທີ່ເກີດເຫດຕົວຈິງ ປາກົດວ່າໄຟດັ່ງກ່າວແມ່ນເກີດຈາກການດັງໄຟ ປຸງແຕ່ງອາຫານ ແລ້ວບໍ່ດັບມອດ ບວກກັບສະພາບດິນຟ້າອາກາດທີ່ແຫ້ງແລ້ງ ແລະ ລົມ ຈຶ່ງເຮັດໃຫ້ເກີດອັກຄີໄພໄດ້ງ່າຍ.

ດັ່ງນັ້ນ, ທາງອົງການປົກຄອງເມືອງ ກໍ່ບໍ່ໄດ້ນິ້ງນອນໃຈ ຈຶ່ງໄດ້ນຳເອົາເຄື່ອງໄປຊ່ວຍເຫຼືອບັນເທົາທຸກ,ເພື່ອເປັນຂັວນ ແລະ ກຳລັງໃຈໃຫ້ແກ່ຄອບຄົວ ທີ່ຖືກເຄາະຮ້າຍ ໄຟໄໜ້ເຮືອນ ເຄື່ອງທີ່ນຳມາມອບໃນຄັ້ງນີ້ ມີ ສັງກະສີ ຈຳນວນ 50 ແຜ່ນ, ເຄື່ອງນອນ, ເຄື່ອງນຸ່ງຮົ່ມ, ພາຊະນະນຳໃຊ້ໃນຄົວເຮືອນ, ອາຫານແຫ້ງ ແລະ ອື່ນໆ, ລວມມູນຄ່າ 3.200.000 ກີບ ເຊິ່ງໃຫ້ກຽດມອບໂດຍແມ່ນ ທ່ານ ສອນສຸກ ພວງແກ້ວ ຮອງເລຂາພັກເມືອງ ແລະ ທ່ານ ອຸດອນ ສະກຸນທອງ ຫົວໜ້າຫ້ອງການແຮງງານສະຫວັດດີການ-ສັງຄົມເມືອງ ໃຫ້ກຽດຮັບໂດຍແມ່ນ ຄອບຄົວຜູ້ຖືກເຄາະຮ້າຍທັງ 2 ຄອບຄົວ ໂດຍສ່ອງໜ້າກັບອົງການຈັດຕັ້ງບ້ານຜາແດງ ຈາກນັ້ນ ທ່ານ ສອນສຸກ ພວງແກ້ວ ໄດ້ຮຽກຮ້ອງເຖິງອຳນາດການປົກຄອງບ້ານ ແລະ ປະຊາຊົນແຕ່ລະບ້ານມີສະຕິ ລະມັດລະວັງໃນການສູມຟືນສູມໄຟ ແຕ່ງຢູ່ຄົວກິນແລ້ວ ໃຫ້ດັບມອດໄຟເສຍກ່ອນ ເພື່ອເປັນການປ້ອງກັນ ແລະ ຕ້ານອະຄີໄພອີກດ້ວຍ.

ໂດຍ: ອິນແປງ ແຫວນຄຳ