ວັນທີ 23 ພຶດສະພາ ປີ 2021 ແມ່ນວັນຄົບຮອບ 70 ປີແຫ່ງການປົດປ່ອຍເຂດຕິເບດໂດຍສັນຕິ. ໃນເວລາສະຖາປະນາສາທາລະນະລັດປະຊາຊົນຈີນໃນປີ 1949, ເຂດຕິເບດທີ່ຕັ້ງຢູ່ພາກຕາເວັນຕົກສຽງໃຕ້ຂອງປະເທດຊາດ ຍັງບໍ່ທັນໄດ້ຮັບການປົດປ່ອຍເທື່ອ. ວັນທີ 23 ພຶດສະພາປີ 1951, ການລົງນາມໃນ “ສັນຍາວ່າດ້ວຍວິທີປົດປ່ອຍເຂດຕິເບດໂດຍສັນຕິລະຫວ່າງລັດຖະບານກາງແລະອົງການປົກຄອງທ້ອງຖິ່ນເຂດຕິເບດ” ໄດ້ເປັນຂີດໝາຍສະແດງໃຫ້ເຫັນວ່າ: ເຂດຕິເບດໄດ້ຮັບການປົດປ່ອຍໂດຍສັນຕິ, ຈາກນັ້ນ ເຂດຕິເບດຈຶ່ງໄດ້ເປີດປະຫວັດສາດໜ້າໃໝ່.
ພາຍໃຕ້ການນຳພາຂອງພັກກອມມູນິດຈີນ, ລະບອບສັງຄົມຂອງເຂດຕິເບດ ໄດ້ບັນລຸການຂ້າມຜ່ານທີ່ຕ້ອງໃຊ້ເວລາເປັນພັນປີ, ວຽກງານການພັດທະນາຕ່າງໆຈຶ່ງໄດ້ເລັ່ງລັດໃຫ້ໄວຂຶ້ນ. ນັບແຕ່ເຂດຕິເບດໄດ້ຮັບການປົດປ່ອຍໂດຍສັນຕິເປັນເວລາ 70 ປີມານີ້, ລັດຖະບານກາງຂອງຈີນໄດ້ວາງນະໂຍບາຍບູລິມະສິດພິເສດຈຳນວນຫລວງຫລາຍໃຫ້ກັບເຂດຕິເບດ, ການເງິນສູນກາງໄດ້ເພີ່ມງົບປະມານໃຫ້ແກ່ເຂດຕິເບດໃນແຕ່ລະປີ ຈຶ່ງເຮັດໃຫ້ລະດັບຊີວິດການເປັນຢູ່ ແລະ ເງື່ອນໄຂການຜະລິດຂອງປະຊາຊົນເຂດຕິເບດ ໄດ້ຮັບການປັບປຸງໃຫ້ດີຂຶ້ນຢ່າງຫລວງຫລາຍ, ຄວາມຮູ້ສຶກໄດ້ຮັບຜົນປະໂຫຍດ ຄວາມຮູ້ສຶກວ່າມີຄວາມສຸກ ແລະ ຄວາມຮູ້ສຶກວ່າມີຄວາມໝັ້ນຄົງປອດໄພຂອງປະຊາຊົນບັນດາເຜົ່າໄດ້ເພີ່ມຂຶ້ນຢ່າງບໍ່ຢຸດຢັ້ງ.
ການທີ່ເສດຖະກິດ-ສັງຄົມຂອງເຂດຕິເບດ ໄດ້ຮັບການພັດທະນາຢ່າງວ່ອງໄວນັ້ນ ແມ່ນຕັດແຍກອອກຈາກການໃຊ້ງົບປະມານຂອງລັດເຂົ້າໃນການກໍ່ສ້າງພື້ນຖານໂຄງລ່າງຂອງເຂດຕິເບດນັ້ນບໍ່ໄດ້. ນັບແຕ່ເຂດຕິເບດໄດ້ຮັບການປົດປ່ອຍໂດຍສັນຕິເປັນຕົ້ນມາ, ເຂດດັ່ງກ່າວໄດ້ສ້າງເຄືອຂ່າຍຄົມມະນາຄົມຄົບວົງຈອນທີ່ກວມເອົາຫຼາຍຮູບແບບການຂົນສົ່ງເຊັ່ນ: ທາງຫລວງ, ທາງລົດໄຟ, ການບິນແລະອື່ນໆ. ການຄົມມະນາຄົມທີ່ສະດວກສະບາຍ ໄດ້ນຳເອົາໂອກາດມາໃຫ້ປະຊາຊົນທ້ອງຖິ່ນຫລາຍກວ່າເກົ່າ, ຫລາຍປີມໍ່ໆມານີ້, ລະດັບຊີວິດການເປັນຢູ່ຂອງປະຊາຊົນໃນເຂດຕິເບດ ໄດ້ຖືກຍົກສູງຂຶ້ນຢ່າງຈະແຈ້ງ. ກ່ອນການປົດປ່ອຍໂດຍສັນຕິ, ປະຊາຊົນຕິເບດຫລາຍກວ່າ 90% ບໍ່ມີເຮືອນຢູ່ເປັນຂອງຕົນເອງ, ບໍ່ມີເຄື່ອງນຸ່ງຫົ່ມ ແລະ ອາຫານທີ່ພຽງພໍ. ປັດຈຸບັນ, ປະຊາຊົນບັນດາເຜົ່າຂອງເຂດຕິເບດ ໄດ້ມີຊີວິດການເປັນຢູ່ທີ່ອີ່ມໜຳສຳລານຢ່າງຮອບດ້ານແລ້ວ.
ຊີວິດການເປັນຢູ່ຂອງເຂດຕິເບດ ທີ່ນັບມື້ນັບຮັ່ງມີຂຶ້ນ ໄດ້ມີຄວາມຮຽກຮ້ອງຕ້ອງການທີ່ສູງກວ່າເກົ່າຕໍ່ລະບົບບໍລິການດ້ານວັດທະນະທຳສາທາລະນະ, ການບໍລິການສາທາລະນະຂັ້ນພື້ນຖານຈຶ່ງໄດ້ຮັບການພັດທະນາຢ່າງຮອບດ້ານ. ກ່ອນການປົດປ່ອຍໂດຍສັນຕິ, ຢູ່ເຂດຕິເບດ ມີພຽງແຕ່ໂຮງໝໍແຜນຕິເບດຂອງທາງການທີ່ມີຂະໜາດນ້ອຍ ແລະ ນຳໃຊ້ອຸປະກອນແບບງ່າຍດາຍຈຳນວນ 3 ແຫ່ງ ແລະ ມີຄຼິກນິກເອກະຊົນຈຳນວນໜ້ອຍໜຶ່ງ. ປັດຈຸບັນ, ເຂດຕິເບດໄດ້ສ້າງລະບົບການບໍລິການທີ່ຄົບຖ້ວນ, ເຊັ່ນ: ການບໍລິການດ້ານການແພດ, ການຮັກສາສຸຂະພາບແມ່ແລະເດັກ, ການຄວບຄຸມ ແລະ ປ້ອງກັນພະຍາດ, ການປິ່ນປົວດ້ວຍແພດແຜນຕິເບດແລະຢາພື້ນເມືອງເຜົ່າຕິເບດ ແລະ ອື່ນໆ. ລັດຖະບານຈີນຍັງໄດ້ຈັດຕັ້ງໜ່ວຍງານຜູ້ຊ່ຽວຊານດ້ານການແພດ ໄປຊ່ວຍເຫລືອເຂດຕິເບດ, ເຮັດໃຫ້ປະຊາຊົນບັນດາເຜົ່າໃນເຂດຕິເບດ ສາມາດຊົມໃຊ້ການບໍລິການດ້ານການແພດທີ່ມີລະດັບສູງຢູ່ໜ້າບ້ານໄດ້.
ຢູ່ເຂດຕິເບດເກົ່າ ບໍ່ມີໂຮງຮຽນທີ່ໄດ້ມາດຕະຖານຄືກັບຍຸກປັດຈຸບັນຈັກແຫ່ງ, ອັດຕາການກືກໜັງສືສູງເຖິງ 95%, ຕະຫລອດໄລຍະ 70 ປີຫຼັງການປົດປ່ອຍໂດຍສັນຕິເປັນຕົ້ນມາ, ວຽກງານສຶກສາທິການຢູ່ເຂດຕິເບດໄດ້ຮັບການປັບປຸງໃຫ້ດີຂຶ້ນຢ່າງຫຼວງຫຼາຍ, ໂດຍສະເພາະແມ່ນ ນັບແຕ່ປີ 2015 ເປັນຕົ້ນມາ, ລັດຖະບານຈີນໄດ້ຈັດສົ່ງໜ່ວຍງານຜູ້ມີຄວາມຮູ້ຄວາມສາມາດດ້ານການສຶກສາໄປຊ່ວຍເຫລືອເຂດຕິເບດ, ເຊິ່ງໄດ້ຊ່ວຍຍົກລະດັບການສຶກສາຂອງເຂດຕິເບດໃຫ້ສູງຂຶ້ນຢ່າງຫລວງຫລາຍ.
ໄຊຊະນະຮອບດ້ານໃນບັ້ນລຶບລ້າງຄວາມທຸກຍາກ ບໍ່ພຽງແຕ່ແມ່ນຜົນສຳເລັດອັນຍິ່ງໃຫຍ່ໃນປະຫວັດສາດຂອງມວນມະນຸດເທົ່ານັ້ນ, ສຳລັບເຂດຕິເບດທີ່ເປັນເຂດທີ່ມີອັດຕາທຸກຍາກສູງສຸດ, ລະດັບຄວາມທຸກຍາກສູງສຸດ, ຕົ້ນທຶນດ້ານການຫລຸດຜ່ອນຄວາມທຸກຍາກສູງສຸດ ແລະ ຄວາມຫຍຸ້ງຍາກໃນການລຶບລ້າງຄວາມທຸກຍາກຫລາຍທີ່ສຸດ, ຍິ່ງມີຄວາມໝາຍຄວາມສຳຄັນເປັນພິເສດ.
ຄັນຢາກໃຫ້ຜູ້ທຸກຍາກໃນເຂດຕິເບດ ຫຼຸດພົ້ນອອກຈາກຄວາມທຸກຍາກໃຫ້ໄດ້, ກໍຈຳເປັນຕ້ອງນຳໃຊ້ມາດຕະການທີ່ບັງເກີດຜົນ, ຜູ້ທຸກຍາກຂອງເຂດຕິເບດສ່ວນຫລາຍອາໄສຢູ່ເຂດທີ່ສູງກວ່າລະດັບສະເລ່ຍຂອງໜ້ານ້ຳທະເລຫຼາຍ ແລະ ບໍ່ມີເງື່ອນໄຂເອື້ອຍອຳນວຍ, ຍ້ອນຈັ່ງຊັ້ນ, ການຈັດສັນຍົກຍ້າຍປະຊາຊົນໄປອາໄສຢູ່ເຂດທີ່ມີເງື່ອນໄຂດີ ຈຶ່ງເປັນທາງເລືອກທີ່ສົມເຫດສົມຜົນໃນການລຶບລ້າງຄວາມທຸກຍາກ
ມາຮອດປີ 2020, ເຂດຕິເບດໄດ້ສ້າງເຂດຈັດສັນຍົກຍ້າຍເພື່ອການຫລຸດພົ້ນອອກຈາກຄວາມທຸກຍາກສຳເລັດ 964 ແຫ່ງຢູ່ສະຖານທີ່ທີ່ມີຄວາມສູງຈາກລະດັບສະເລ່ຍຂອງໜ້ານ້ຳທະເລບໍ່ຫຼາຍປານໃດ ທັງເໝາະກັບການດຳລົງຊີວິດ ແລະ ການຜະລິດ, ມີປະຊາຊົນ 2 ແສນ 6 ໝື່ນ 6 ພັນຄົນໄດ້ຍົກຍ້າຍໄປເຂດດັ່ງກ່າວດ້ວຍຄວາມສະໝັກໃຈ. ໃນຈຳນວນງົບປະມານທັງໝົດເພື່ອສະໜັບສະໜູນຂະແໜງການຫລຸດຜ່ອນຄວາມທຸກຍາກຢູ່ເຂດຕິເບດ, ມີ 5%ແມ່ນນຳໃຊ້ເຂົ້າໃນການພັດທະນາຂະແໜງການຢູ່ເຂດຍົກຍ້າຍ, ຮັບປະກັນໃຫ້ຄອບຄົວຍົກຍ້າຍແຕ່ລະຄອບຄົວ ມີວຽກເຮັດງານທຳຢ່າງໜ້ອຍແມ່ນ 1 ຄົນ. ໄດ້ບັນລຸເປົ້າໝາຍທີ່ເຮັດໃຫ້ຊີວິດການເປັນຢູ່ທີ່ມີຄວາມໝັ້ນຄົງ, ມີວຽກເຮັດງານທຳ ແລະສາມາດສ້າງຄວາມຮັ່ງມີຂຶ້ນໄດ້ເທື່ອລະກ້າວ.
ທ້າຍປີ 2019, ຜູ້ທຸກຍາກທີ່ໄດ້ລົງທະບຽນຈຳນວນ 6 ແສນ 2 ໝື່ນ 8ພັນຄົນໃນເຂດຕິເບດ ສາມາດລຶບລ້າງຄວາມທຸກຍາກໄດ້ທັງໝົດ, ເມືອງທຸກຍາກ 74 ເມືອງສາມາດລຶບລ້າງຄວາມທຸກຍາກໄດ້ທັງໝົດ, ເຊິ່ງເປັນການລຶບລ້າງຄວາມທຸກຍາກໄດ້ແບບເດັດຖານໃນປະຫວັດສາດ. ປັດຈຸບັນ, ລາຍຮັບທີ່ສາມາດໃຊ້ຈ່າຍໄດ້ສະເລ່ຍຕໍ່ປີຂອງປະຊາຊົນຜູ້ທີ່ໄດ້ລຶບລ້າງຄວາມທຸກຍາກແລ້ວນັ້ນ ແມ່ນບັນລຸຫລາຍກວ່າ 1 ໝື່ນຢວນ, ເຊິ່ງເປັນການປົກປັກຮັກສາຜົນສຳເລັດໃນການລຶບລ້າງຄວາມທຸກຍາກໃຫ້ມີຄວາມໝັ້ນຄົງຕື່ມອີກ.
ແຕ່ໃດໆມາ, ລັດຖະບານກໍໄດ້ເອົາໃຈໃສ່ຢ່າງສູງ ຕໍ່ການປົກປັກຮັກສາແລະພັດທະນາວັດທະນະທຳທີ່ເປັນມູນເຊື້ອຂອງເຂດຕິເບດ, ໄດ້ລົງທຶນໃສ່ດ້ານບຸກຄະລາກອນ, ຈັດສັນງົບປະມານ ແລະວັດຖຸຢ່າງຫລວງຫລາຍ, ນຳໃຊ້ຫລາຍວິທີເຊັ່ນ: ກົດໝາຍ, ເສດຖະກິດ, ການບໍລິຫານການເມືອງ ແລະ ອື່ນໆ, ເຮັດໃຫ້ວັດທະນະທຳທີ່ເປັນມູນເຊື້ອອັນດີງາມຂອງເຂດຕິເບດ ໄດ້ຮັບການສືບທອດແລະພັດທະນາບົນພື້ນຖານການອະນຸລັກຢ່າງບັງເກີດຜົນ. ພາສາ ແລະ ຕົວໜັງສືຂອງເຜົ່າຕິເບດ ໄດ້ຖືກນຳໃຊ້ຢ່າງກວ້າງຂວາງ, ຮີດຄອງປະເພນີກໍໄດ້ຮັບການເຄົາລົບນັບຖືຢ່າງເຕັມປ່ຽມ, ມໍລະດົກວັດທະນະທຳກໍໄດ້ຮັບການອະນຸລັກແລະສືບທອດຢ່າງບັງເກີດຜົນ. ພ້ອມກັນນັ້ນ, ລັດຖະບານຍັງໄດ້ວາງທິດທາງນະໂຍບາຍຕ່າງໆ, ເພື່ອຈັດຕັ້ງປະຕິບັດລະບອບການປົກຄອງຕົນເອງໃນເຂດຊົນເຜົ່າ, ປົກປ້ອງກິດຈະກຳດ້ານສາສະໜາທີ່ເປັນປົກກະຕິຕາມກົດໝາຍ, ຊຸກຍູ້ໃຫ້ປະຊາຊົນບັນດາເຜົ່າມີຄວາມສາມັກຄີສູ້ຊົນຮ່ວມກັນ, ຮ່ວມກັນພັດທະນາໃຫ້ຈະເລີນຮຸ່ງເຮືອງ.
ການທີ່ວຽກງານຕ່າງໆຂອງເຂດຕິເບດ ໄດ້ຮັບການພັດທະນາຢ່າງສະດວກ,ຄວາມເປັນເອກະພາບຂອງຊາດແລະຄວາມໝັ້ນຄົງທາງສັງຄົມເປັນສິ່ງຮັບປະກັນທີ່ສຳຄັນ. ແຕ່ເປັນໄລຍະເວລາດົນນານມາແລ້ວ, ອິດທິກຳລັງຕາເວັນຕົກທີ່ຕໍ່ຕ້ານປະເທດຈີນໄດ້ແຊກແຊງວຽກງານຕິເບດຂອງຈີນຢ່າງບໍ່ຢຸດຢັ້ງ, ມີເຈດຕະນາຢາກທຳລາຍຄວາມໝັ້ນຄົງຂອງສັງຄົມຕິເບດ.
ໃນເວລາສັ້ນໆພຽງແຕ່ຫລາຍສິບປີ ເຂດຕິເບດໄດ້ບັນລຸການຂ້າມຜ່ານທີ່ຕ້ອງໃຊ້ເວລາເຖິງພັນປີ. ພຶດຕິກຳຕົວຈິງໄດ້ພິສູດໃຫ້ເຫັນວ່າ: ມີພຽງແຕ່ຍຶດໝັ້ນໃນການປົກປັກຮັກສາຄວາມເປັນເອກະພາບຂອງປະເທດຊາດ ແລະ ຜືນແຜ່ນດິນອັນຄົບຖ້ວນເທົ່ານັ້ນ,ຈຶ່ງສາມາດຮັບປະກັນຜົນປະໂຫຍດພື້ນຖານຂອງປະຊາຊົນບັນດາເຜົ່າຂອງເຂດຕິເບດໄວ້ໄດ້; ມີພຽງແຕ່ຍຶດໝັ້ນໃນແນວຄວາມຄິດການພັດທະນາທີ່ຖືປະຊາຊົນເປັນໃຈກາງເທົ່ານັ້ນ, ຈຶ່ງສາມາດຕອບສະໜອງຄວາມຮຽກຮ້ອງຕ້ອງການຂອງປະຊາຊົນບັນດາເຜົ່າຂອງເຂດຕິເບດທີ່ຢາກມີຊີວິດການເປັນຢູ່ທີ່ດີງາມນັ້ນໄດ້; ມີພຽງແຕ່ຍຶດໝັ້ນທິດທາງຍຸດທະສາດການຄຸ້ມຄອງບໍລິຫານເຂດຕິເບດຂອງພັກກອມມູນິດຈີນໃນສະໄໝໃໝ່ເທົ່ານັ້ນ, ຈຶ່ງສາມາດສ້າງສາເຂດຕິເບດສັງຄົມນິຍົມອັນໃໝ່ທີ່ທັນສະໄໝໄດ້.
Loading...