ເຂດທົດລອງນະວັດຕະກໍາການສຶກສາສາກົນຫຼີອ່ານນະຄອນຫິຼງສຸ້ຍ (Lingshui Li’an International Education Innovation Pilot Zone) ຕັ້ງຢູ່ທາງຕາເວັນອອກສ່ຽງໃຕ້ຂອງນະຄອນຫຼິງສຸ້ຍ, ແຂວງໄຫຫຼໍາ (ໄຫຫນານ) ຄວບຄຸມເນື້ອທີ່ຕັ້ງແຕ່ຖະໜົນຊົງກຸຍ ກຸ້ຍຫົວ ທາງທິດເໜືອໄປຮອດເຂດສະຫງວນນານວານທາງທິດໃຕ້ ແລະ ຈາກທ່າເຮືອຫຼີອ່ານທາງຕາເວັນອອກຈົນຮອດທ່າເຮືອຊິນຈຸນ ທາງທິດຕາເວັນຕົກ, ມີເນື້ອທີ່ໂຄງການໄລຍະທີ 1 ປະມານ 250 ເຮັກຕາ.
ການກໍ່ສ້າງລວມມີ: ອາຄານສອນ, ອາຄານຫ້ອງທົດລອງ, ຫໍສະໝຸດ, ສູນການຮຽນຮູ້ສາກົນ, ຫໍພັກ, ອາຄານຄູສອນ, ແລະ ສິ່ງອໍານວຍຄວາມສະດວກອື່ນໆ. ໃນປີ 2022 ມີໂຄງການລົງທຶນຂອງລັດຖະບານຈີນທັງໝົດ 29 ໂຄງການໃນເຂດທົດລອງດັ່ງ ກ່າວ ເຊິ່ງມີການລົງທຶນ 1 ຕື້ 350 ລ້ານຢວນ ໂດຍເນັ້ນໃສ່ການຄວບຄຸມຂອງສັນຍານ 4G, 5G ແລະ WiFi ດ້ວຍການສ້າງຫ້ອງຮຽນອັດສະລິຍະ 45 ຫ້ອງ ແລະ ຫ້ອງປະຕິບັດການຕົວຈິງ 21 ຫ້ອງ, ທັງລິເລີ່ມການພັດທະນາ ແລະ ສ້າງລະບົບຊ໊ອຟແວ 3 ລະບົບ ແລະ ອື່ນໆ.
ອີງຕາມຂໍ້ມູນຈາກເຈົ້າຫນ້າທີ່ກ່ຽວຂ້ອງຂອງເຂດດັ່ງກ່າວທີ່ນໍາສະເຫນີໃນໂອກາດສື່ມວນຊົນຈີນ-ອາຊຽນ ທີ່ເຂົ້າຮ່ວມກິດຈະກໍາ “ຄູ່ຮ່ວມສື່ມວນຊົນອາຊຽນ ເບິ່ງຈີນຮ່ວມກັນ” ຈັດຂຶ້ນໂດຍວິທະຍຸໂທລະພາບສູນກາງຈີນ (CMG) ຢ້ຽມຢາມເຂດນີ້ໃນວັນທີ 25 ເມສາ 2024 ໃຫ້ຮູ້ວ່າ: ເຂດທົດລອງນະວັດຕະກໍາການສຶກສານີ້ ສາມາດຕອບສະໜອງຄວາມຕ້ອງການດ້ານການຮຽນຮູ້ ແລະ ການໃຊ້ຊີວິດຂອງນັກຮຽນທັງຫມົດ 30.000 ຄົນ. ແຕ່ເນື່ອງຈາກຍັງຢູ່ໃນໄລຍະທົດລອງໃຫມ່, ປັດຈຸບັນ ມີນັກ ສຶກສາ 2.000 ກວ່າຄົນທີ່ມາຈາກ 10 ກວ່າວິທະຍາໄລທີ່ໄດ້ເຊັນສັນຍາເຂົ້າຮ່ວມການຮຽນ-ການສອນໃນເຂດທົດລອງດັ່ງກ່າວ, ໃນນີ້ ມີນັກສຶກສາຕ່າງປະເທດຫລາຍກວ່າ 200 ຄົນ ທີ່ມາຈາກຫຼາຍ ກວ່າ 50 ປະເທດ.
ໃນໂອກາດນີ້ ນັກສຶກສາລາວທີ່ໄດ້ທຶນຈາກລັດຖະບານຈີນ ຈໍານວນ 2 ນ້ອງ ທີ່ກໍງລັງສຶກສາໃນລະດັບປະລິນຍາຕີ, ປີທີຫນຶ່ງຢູ່ວິທະຍາໄລພາສາ ແລະ ວັດທະທໍາປັກກິ່ງ ເຊິ່ງເປັນວິທະຍາໄລຫນຶ່ງທີ່ເຂົ້າຮ່ວມການຮຽນ-ການສອນຢູ່ເຂດທົດລອງນະວັດຕະກໍາການສຶກສາສາກົນຫຼີອ່ານ ນະຄອນຫິຼງສຸ້ຍ ຄື: ນາງ ວອນນິດາ ບົວສີສະຫວັດ, ສຶກສາໃນວິຊາການພົວພັນທາງການທູດ ແລະ ນາງ. ນາລິຕາ ໄຊຍະສອັນ ສຶກສາວິຊາພາສາຈີນ ຕ່າງສະແດງຄວາມຮູ້ສຶກດີໃຈທີ່ໄດ້ມາສຶກສາຢູ່ວິທະຍາໄລແຫ່ງນີ້.
ນາງ. ວອນນິດາ ບົວສີສະຫວັດ ບອກວ່າ: ການສຶກສາຢູ່ຈີນດີຫລາຍ ເພາະເນັ້ນໃສ່ການຮຽນທີ່ມີຄຸນນະພາບ ເຮັດໃຫ້ນັກຮຽນຕ້ອງໄດ້ຕັ້ງໃຈຄົ້ນຄວ້າຮໍ່າຮຽນຕະຫລອດເວລາ, ເຖີງວ່າພົບຄວາມຫຍຸ້ງຍາກດ້ານການສື່ສານ ໂດຍສະເພາະພາສາຈີນ ຍ້ອນບໍ່ມີພື້ນຖານມາກ່ອນ, ແຕ່ຖ້າຫມັ່ນຝຶກຝົນ ແລະ ຄົ້ນຄວ້າຮໍ່າຮຽນກໍຄ່ອຍໆ ດີຂຶ້ນ.
ສ່ວນ ນາງ ນາລິຕາ ໄຊຍະສອນ ບອກວ່າ: ການຮຽນຢູ່ວິທະຍາໄລທີ່ຈີນເນັ້ນໃສ່ໃຫ້ໄດ້ຄຸນນະພາບ ເຊິ່ງເປັນສິ່ງທີ່ດີເພາະເຮັດ ໃຫ້ເຮົາມີຄວາມພະຍາຍາມຢ່າງສຸດຄວາມສາມາດ ເຊິ່ງຕົນເອງແລະນັກສຶກສາລາວທີ່ຮຽນຢູ່ສະຖາບັນດຽວກັນຕ່າງຕັ້ງໃຈຄົ້ນຄວ້າຮໍ່າຮຽນຢ່າງໜັກ ເພື່ອໃຫ້ຜົນການຮຽນອອກມາດີທີ່ສຸດ.
ໃນໂອກາດນີ້, ນັກສຶກສາລາວທັງສອງນ້ອງ ໄດ້ຝາກມາຍັງນັກຮຽນຈາກລາວທຸກຄົນ ຖ້າຕ້ອງການມາສຶກສາທີ່ຈີນຕ້ອງຕັ້ງໃຈສຶກສາຮໍ່າຮຽນໃຫ້ດີ ເພາະການຮຽນຢູ່ຈີນແຕກຕ່າງກັນຫລາຍກັບການຮຽນທີ່ລາວ. ພ້ອມນີ້ ຕ້ອງຮຽນຮູ້ປັບຕົວໃຫ້ເຂົ້າກັບຫມູ່ຄົນອື່ນ ເພື່ອຮຽນຮູ້ຮ່ວມກັນເຊິ່ງຈະເປັນຜົນດີແກ່ຕົນເອງໃນການສຶກສາຮໍ່າຮຽນ.
ສໍາລັບ 10 ກວ່າວິທະຍາໄລທີ່ໄດ້ເຂົ້າຮ່ວມການຮຽນ-ການສອນຢູ່ເຂດທົດລອງນະວັດຕະກໍາການສຶກສາສາກົນຫຼີອ່ານນະຄອນຫິຼງສຸ້ຍ, ນອກຈາກເປັນວິທະຍາໄລທີ່ມີເຄືອຂ່າຍການຮຽນ-ການສອນພາຍໃນປະເທດ ຍັງມີການຮ່ວມມືກັບວິທະຍາໄລຢູ່ຕ່າງປະເທດ ລວມກັນຫຼາຍກວ່າ 10 ແຫ່ງ ຈຶ່ງເຮັດໃຫ້ການຮຽນ-ການສອນຮັບປະກັນໄດ້ດ້ານຄຸນນະພາບດີ.
