ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ມາຮອດປັດຈຸບັນ, ເຂດພັດທະນາກວມລວມໄຊເຊດຖາ ສາມາດສ້າງວຽກເຮັດງານທໍາໄດ້ແລ້ວຫລາຍກວ່າ 10.000 ຕໍາແໜ່ງ ແລະ ຄາດວ່າຈະເພີ່ມຂຶ້ນອີກຈໍານວນຫລາຍໃນຕໍ່ໜ້າ ເພາະນັກລົງທຶນຈາກຫລາຍປະເທດ ແລະ ພາກພື້ນໃຫ້ຄວາມສົນໃຈເຂົ້າມາລົງທຶນນັບມື້ເພີ່ມຂຶ້ນ.
ໃນໂອກາດການປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນ ທາງ ຄົບຮອບ 10 ປີ, ທ່ານ ຫວາງຊາງ ອຸປະທູດແຫ່ງ ສປ ຈີນ ປະຈຳ ສປປ ລາວ ໃຫ້ສຳພາດຕໍ່ສື່ມວນຊົນລາວ-ຈີນ ໃນວັນທີ 19 ກັນຍາ 2023 ນີ້ທີ່ເຂດພັດທະນາດັ່ງກ່າວ ວ່າ: ເຂດພັດທະນາກວມລວມໄຊເສດຖາ ແມ່ນອີງໃສ່ທ່າແຮງຂອງທີ່ຕັ້ງ, ໄດ້ປັບປຸງການສ້າງພື້ນຖານໂຄງລ່າງ ແລະ ການບໍລິການທີ່ກ່ຽວຂ້ອງໃຫ້ດີຂຶ້ນຢ່າງບໍ່ຢຸດຢັ້ງ ແລະ ໄດ້ກາຍເປັນຈຸດສຳຄັນຂອງນະຄອນຫລວງວຽງຈັນ ໃນການດຶງດູດການລົງທຶນຂອງຕ່າງປະເທດ, ສາມາດສ້າງວຽກເຮັດງານທຳ ແລະ ປັບປຸງຊີວິດການເປັນຢູ່ຂອງປະຊາຊົນ ເປັນຈຳນວນຫລາຍ. ປັດຈຸບັນ, ມີວິສາຫະກິດ 129 ຫົວ ໜ່ວຍ ໄດ້ເຂົ້າປະຈຳຢູ່ເຂດພັດທະນາກວມລວມໄຊເສດຖາ, ໃນນີ້ ມີ 65 ແຫ່ງໄດ້ສ້າງສຳເລັດ ແລະ ເລີ່ມການຜະ ລິດ, ຄາດວ່າຖ້າວິສາຫະກິດທັງໝົດ 129 ຫົວໜ່ວຍ ເລີ່ມດຳເນີນການຜະລິດ ມູນຄ່າການຜະລິດຈະບັນລຸເຖິງ 7,8 ຕື້ໂດລາສະຫະລັດ ແລະ ຈະສາມາດສ້າງວຽກເຮັດງານທຳໄດ້ປະມານ 10.000 ກວ່າຕໍາແໜ່ງ.
ສໍາລັບເຂດພັດທະນາກວມລວມໄຊເຊດຖາ ແມ່ນໂຄງ ການຮ່ວມມືລະດັບຊາດທີ່ສອງລັດຖະບານລາວ ແລະຈີນ ໄດ້ກໍານົດຮ່ວມກັນ, ທັງເປັນເຂດຮ່ວມມືເສດຖະກິດການຄ້າ ລະດັບຊາດຂອງ ສປ ຈີນ ໜື່ງດຽວຢູ່ໃນ ສປປ ລາວ, ເປັນໂຄງການທຳອິດທີ່ໄດ້ຈັດເຂົ້າໃນແຜນຍຸດທະສາດ ໜຶ່ງແລວ ໜຶ່ງເສັ້ນທາງ, ຊຶ່ງໄດ້ຮັບຄວາມເອົາໃຈໃສ່ ແລະ ສະ ໜັບສະໜູນຈາກລັດຖະບານທັງສອງປະເທດຢ່າງສູງ.
ສໍາລັບວິສາຫະກິດທີ່ເຂົ້າມາລົງທຶນຢູ່ເຂດດັ່ງກ່າວ, ແມ່ນມາຈາກຫລາຍປະເທດ ແລະ ພາກພື້ນ ລວມມີ: ສປ ຈີນ, ຍີ່ປຸ່ນ, ສະຫະລັດອາເມລິກາ, ໄທ, ມາເລເຊຍ ແລະ ຮົງກົງຂອງຈີນ, ເນື້ອທີ່ລົງທຶນທັງໝົດຫລາຍກວ່າ 133,2 ເຮັກ ຕາ, ຂະແໜງການລົງທຶນລວມມີການຜະລິດ, ຜະລິດຕະ ພັນເອເລັກໂຕຣນິກ, ພະລັງງານສະອາດ, ຢາປົວພະຍາດ, ການປຸງແຕ່ງຜະລິດຕະພັນກະສິກຳ, ການຜະລິດເຄື່ອງນຸ່ງຫົ່ມ ແລະ ຂະແໜງການອື່ນໆ.
Cr: ບຸນຕຽງ ຈັນທະວົງ