ເຂື່ອນໄຟຟ້າຫ້ວຍລໍາພັນຕອນລຸ່ມ ກຽມເປີດຜະລິດໄຟຟ້າຈໍາໜ່າຍເລີ່ມແຕ່ກາງເດືອນທັນວາ ປີ 2020 ເປັນຕົ້ນໄປ ພາຍຫລັງທີ່ການກໍ່ສ້າງມາຮອດປັດຈຸບັນສໍາເລັດແລ້ວ 96,76% ຂອງໜ້າວຽກທັງໝົດ ເຫລືອພຽງແຕ່ການກວດກາຂັ້ນຕອນສຸດທ້າຍຈາກພາກສ່ວນທີ່ກ່ຽວຂ້ອງເທົ່ານັ້ນ.

ທ່ານ ບຸນໂຮມ ຜິວລາລິນ ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ລາຍງານໃຫ້ຮູ້ໃນໂອ ກາດທີ່ ທ່ານ ສີນາວາ ສຸພານຸວົງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ພ້ອມດ້ວຍຄະນະ ເຄື່ອນໄຫວຕິດຕາມກວດກາດ້ານເຕັກນິກໂຄງການດັ່ງກ່າວໃນວັນທີ 27 ພະຈິກ 2020 ວ່າ: ການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ເລີ່ມຕົ້ນນັບແຕ່ວັນທີ 18 ຕຸລາ ປີ 2017 ເປັນຕົ້ນມາ, ຜ່ານການກໍ່ສ້າງທຸກໜ້າວຽກແມ່ນເກືອບສໍາເລັດແລ້ວ ເປັນຕົ້ນ: ການກໍ່ສ້າງຕົວເຂື່ອນດີນ, ປະຕູສົ່ງຂອງທໍ່ນໍ້າ, ປະຕູລະບາຍນໍ້າລົ້ນ, ເຮືອນຈັກ, ລານໄຟ ແລະອື່ນໆ ໂດຍໄດ້ເລີ່ມກັກເກັບນໍ້າເຂົ້າອ່າງນັບແຕ່ວັນທີ 3 ກັນຍາ 2020 ເປັນຕົ້ນມາ. ປັດຈຸບັນ ພວມລໍຖ້າໜ່ວຍງານທີ່ກ່ຽວຂ້ອງຈາກສູນກາງລົງມາກວດກາດ້ານເຕັກນິກຂອງເຂື່ອນທັງໝົດອີກຄັ້ງໃນໄວຯ ນີ້ ຫລັງຈາກນັ້ນ ໃນກາງເດືອນທັນວາ ປີ 2020 ຈະໄດ້ຜະລິດໄຟຟ້າຈໍາໜ່າຍຕາມແຜນການທີ່ກໍານົດໄວ້.

ທ່ານ ບຸນໂຮມ ຜິວລາລິນ ໃຫ້ຮູ້ຕື່ມວ່າ: ໂຄງການກໍ່ ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ຖືກຈັດເປັນບູລີມະສິດຂອງແຂວງເຊກອງ ເພື່ອເປັນການສ້າງພື້ນ ຖານໂຄງລ່າງທີ່ເອື້ອອໍານວຍ ແລະ ສົ່ງເສີມໃຫ້ແກ່ການລົງທຶນພາຍໃນ ໂດຍສະເພາະແມ່ນການດຶງດູດຫົວໜ່ວຍທຸລະກິດດ້ານການທ່ອງທ່ຽວ, ພ້ອມນີ້ ເຂື່ອນແຫ່ງນີ້ ຈະເປັນບ່ອນຫາປາຂອງປະຊາຊົນ, ຄຽງຄູ່ກັນນີ້ ນໍ້າໃນອ່າງຈະຖືກນໍາໄປຜະລິດນໍ້າປະປາຮັບໃຊ້ພາຍໃນເທດສະບານແຂວງເຊກອງໃນຕໍ່ໜ້າ.

ໃນໂອກາດເຄື່ອນໄຫວຕິດຕາມກວດກາໂຄງການກໍ່ ສ້າງເຂື່ອນໄຟຟ້າຫ້ວຍລໍາພັນຕອນລຸ່ມໃນຄັ້ງນີ້ ນອກຈາກ ທ່ານ ສີນາວາ ສຸພານຸວົງ ແລະ ຄະນະ ໄດ້ຮັບຟັງການລາຍງານຈາກຄະນະຮັບຜິດຊອບການກໍ່ສ້າງເຂື່ອນ ຍັງໄດ້ໄປກວດກາຕົວຈິງໂຕເຂື່ອນ, ທາງນໍ້າລົ້ນ, ໂຮງຈັກໄຟຟ້າ ແລະ ອຸປະກອນຕິດຕາມພຶດຕິກໍາຕ່າງໆ ຂອງເຂື່ອນ, ພ້ອມນີ້ ທາງຄະນະໄດ້ເນັ້ນໜັກໃຫ້ໂຄງການຕ້ອງເຂັ້ມງວດຂັ້ນຕອນກັກເກັບນໍ້າ ຕາມລະບຽບການ ແລະ ຂັ້ນຕອນດ້ານເຕັກນິກ, ຕ້ອງໄດ້ປະສົມປະສານການບັນຊານໍ້າກັບໂຄງ ການຫ້ວຍລໍາພັນໃຫຍ່ທີ່ຢູ່ຕອນເທິງຢ່າງໃກ້ສິດ, ເປັນລະ ບົບ, ຮັບປະກັນມີເຄື່ອງມືທີ່ ຈໍາເປັນໃຫ້ພຽງພໍ ແລະ ການປະສານງານກັບທ້ອງຖິ່ນໃຫ້ວ່ອງໄວ ແລະ ທັນການຫາກມີກໍລະນີສຸກເສີນຕ່າງຯ ເກີດຂຶ້ນ.

ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມ ຕັ້ງຢູ່ບ້ານລາວີລໍາພັນ ເມືອງລະມາມ, ຫ່າງຈາກເທດສະບານແຂວງເຊກອງໄປທາງທິດຕາເວັນຕົກ ປະມານ 24 km, ເປັນປະເພດເຂື່ອນດິນໜຽວ, ມີລວງຍາວ 492 ແມັດ, ສູງ 55 ແມັດ, ມີກໍາລັງຕິດຕັ້ງທັງໝົດ 15 MW (7.5 MWx2), ສາມາດຜະລິດກະແສໄຟຟ້າໄດ້ 68,31 ລ້ານ GWh/ປີ, ເປັນໂຄງການເຂື່ອນຂະໜາດນ້ອຍ ທີ່ໄດ້ຮັບອະນຸຍາດພັດທະນາ ແລະ ຄຸ້ມຄອງຂອງແຂວງເຊກອງ, ມູນຄ່າການກໍ່ສ້າງທັງ ໝົດ 48.235.294,12 ໂດລາສະຫະລັດ. ຜູ້ພັັດທະນາໂຄງການແມ່ນບໍລິສັດຜະລິດໄຟຟ້າລາວມະຫາຊົນ (EDL-GEN) ຖືຮຸ້ນ 60% ແລະ ບໍລິສັດ ວຽງຈັນ ອໍໂຕເມຊັນ ແອນເອັນຈີເນຍຣິງ ຈຳກັດ (VASE) ຖືຮຸ້ນ 40%. ຜູ້ອອກແບບແລະດຳເນີນການກໍ່ສ້າງແມ່ນບໍລິສັດ CGGC ຈາກ ສປຈີນ. ສໍາລັບພະລັງງານໄຟຟ້າທີ່ຜະລິດໄດ້ທັງໝົດຈະຈໍາໜ່າຍໃຫ້ລັດວິສາຫະກິດໄຟຟ້າລາວ.

ໂດຍ: ມົດແດງນ້ອຍ

Loading...