ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເຂື່ອນໄຟຟ້າເຊປຽນ-ເຊນ້ຳນ້ອຍ ບົດຮຽນສຳຄັນຂອງການກໍ່ສ້າງ ເຂື່ອນໄຟຟ້າຢູ່ລາວ

ຈາກເຫດການທີ່ສັນເຂື່ອນກັ້ນນ້ຳອ່າງເກັບນ້ຳສຳຮອງໂຄງການເຂື່ອນໄຟຟ້າເຊປຽນ-ເຊນ້ຳນ້ອຍຢູ່ເມືອງ ສະໜາມໄຊ, ແຂວງ ອັດຕະປືແຕກ ໃນຄືນວັນທີ 23 ກໍລະກົດ 2018 ຊຶ່ງຖືເປັນເຫດການກ່ຽວກັບເຂື່ອນແຕກຄັ້ງທີ 3 ທີ່ເກີດຂຶ້ນຢູ່ລາວ ຫລັງຈາກທີ່ເຄີຍເກີດຂຶ້ນມາແລ້ວ 2 ຄັ້ງ ຄື: ອຸບມົງໄຟຟ້າເຂື່ອນເຊກະໝານ 3 ຢູ່ເມືອງ ດາກຈຶງ ແຂວງ ເຊກອງແຕກໃນເດືອນ ທັນວາ ປີ 2016 ແລະ ເຂື່ອນໄຟຟ້ານ້ຳອ້າວຢູ່ເມືອງ ຜາໄຊ, ແຂວງ ຊຽງຂວາງແຕກ ໃນເດືອນກັນຍາ ປີ 2017.  ສະເພາະສັນເຂື່ອນກັ້ນນ້ຳອ່າງເກັບນ້ຳສຳຮອງໂຄງການເຂື່ອນໄຟຟ້າເຊປຽນ-ເຊນ້ຳນ້ອຍແຕກໃນຄັ້ງນີ້ ເຮັດໃຫ້ປະຊາ ຊົນຫລາຍກ່ວາ 13.000 ຄົນໃນ 13 ບ້ານຂອງເມືອງ ສະໜາມໄຊ ໄດ້ຮັບຜົນກະທົບ, ໃນນັ້ນ ໜັກໜ່ວງກ່ວາໝູ່ແມ່ນປະຊາຊົນຫລາຍກ່ວາ 7.000 ຄົນ ທີ່ອາໃສຢູ່ 6 ບ້ານລຽບຕາມສາຍນ້ຳເຊປຽນ ເຮັດໃຫ້ເຮືອນຊານ ແລະ ຊັບສິນມີຄ່າຕ່າງຯ ຖືກນ້ຳຊຸທັ່ງພັງເພເສຍຫາຍເກືອບໝົດ, ເນື້ອທີ່ທຳການຜະລິດກາຍເປັນທະເລຕົມພຽງຊົ່ວຄ່ຳຄືນ, ເຮືອນຊານຈຳນວນຫລວງຫລາຍພັງເພ, ບາງຫລັງເຫັນແຕ່ເສົາ ແລະ ມີຈຳນວນຫນ້ອຍທີ່ຍັງພໍເປັນຮູບຮ່າງເຮືອນໃຫ້ເຫັນ. ຮ້າຍແຮງໄປກ່ວານັ້ນ ມີປະຊາຊົນ 131 ຄົນສູນຫາຍ ແລະ ປະຊາຊົນອີກຫລາຍຮ້ອຍຄົນຍັງບໍ່ສາມາດຕິດຕໍ່ໄດ້. ບາງຄອບຄົວຕ້ອງສູນເສຍຄົນໃນຄອບຄົວໄປແບບບໍ່ມີມື້ກັບມາ, ຫລາຍຄອບຄົວ ຫລື ຫລາຍຄົນ ໄດ້ແຕ່ເສື້ອຄາຄີງ. ປັດ ຈຸບັນ ຄວາມເສຍຫາຍດ້ານຕ່າງຯ ທີ່ເກີດຂຶ້ນຍັງບໍ່ທັນສາມາດປະເມີນໄດ້ເທື່ອ. ຂະນະດຽວກັນ ຕົວເລກຈຳນວນຜູ້ປະ ສົບອຸທົກກະໄພທີ່ລະອຽດຊັດເຈນ ອົງການປົກຄອງແຂວງ ອັດຕະປື ຍັງບໍ່ສາມາດເກັບກຳໄດ້ເທື່ອ  ແລະ ພວມຮ່ວມກັບກະຊວງກ່ຽວຂ້ອງເກັບກຳຂໍ້ມູນຕົວຈິງຢູ່ເພື່ອໃຫ້ໄດ້ຕົວເລກທີ່ລະອຽດຊັດເຈນທີ່ສຸດ.

ຈາກເຫດການທີ່ເກີດຂຶ້ນ ເຮັດໃຫ້ລັດຖະບານຕ້ອງຮີບຮ້ອນຊອກຫາວິທີແກ້ໄຂ ໂດຍໄດ້ແຕ່ງຕັ້ງຄະນະກຳມະການສະເພາະກິດແກ້ໄຂໄພພິບັດລະດັບຊາດຂຶ້ນ, ຕໍ່ມາໄດ້ແຕ່ງຕັ້ງຄະນະສືບສວນ-ສອບສວນຂຶ້ນ ຊຶ່ງຄະນະນີ້ສາມາດຮັບເອົາການຊ່ວຍເຫຼືອທາງດ້ານການເງິນ, ເຕັກນິກ ແລະ ຊ່ຽວຊານຈາກຕ່າງປະເທດທີ່ມີມາດຕະຖານສາກົນມາຊ່ວຍພິສູດ, ກວດກາທາງດ້ານເຕັກນິກ, ຊອກໃຫ້ເຫັນສາເຫດທີ່ເຮັດໃຫ້ເກີດການແຕກຂອງສັນເຂື່ອນ ແລະ ສາມາດເຊີນຕົວແທນລັດຖະບານຂອງປະເທດທີ່ມີບໍລິສັດຜູ້ປະກອບການ ແລະ ຂາຮຸ້ນມາໃຫ້ຄຳປຶກສາ ເພື່ອໃຫ້ການສືບສວນ-ສອບສວນມີຄຸນນະພາບສູງ, ໂປ່ງໃສ ແລະ ເປັນທີ່ຍອມຮັບຕໍ່ພາຍໃນ ແລະ ຕ່າງປະເທດ. ທັງສອງຄະນະນີ້ໄດ້ຕັ້ງໜ້າປະຕິບັດໜ້າທີ່ຂອງຕົນຢ່າງຕໍ່ເນື່ອງ ໂດຍສະເພາະຄະນະກຳມະການສະເພາະກິດແກ້ໄຂໄພພິບັດລະດັບຊາດຕາມການຊີ້ນຳຂອງ ນາຍົກລັດຖະມົນຕີ ທອງລຸນ ສີສຸລິດ ທີ່ໄດ້ເນັ້ນໃຫ້ຄະນະນີ້ເອົາໃຈໃສ່ຈັດຕັ້ງປະຕິບັດມີ 4 ວຽກງານຮີບດ່ວນ ຄື: 1. ຕ້ອງກອບກູ້ເອົາຜູ້ທີ່ສູນຫາຍໃຫ້ຄົບຕາມຈຳນວນຢ່າງສຸດຄວາມສາມາດ ແລະ ໄວເທົ່າທີ່ຈະໄວໄດ້. 2. ຕ້ອງຈັດສັນທີ່ໄດ້ຮັບຜົນກະທົບໄດ້ຢູ່ບ່ອນທີ່ປອດໄພ ແລະ ມີຊີວິດການເປັນຢູ່ດີຂຶ້ນຈົນກ່ວາເຂົາເຈົ້າຈະສາມາດໄປຢູ່ບ້ານເກີດເມືອງນອນຂອງຕົນໄດ້, ໄປພ້ອມຯ ກັບການເອົາໃຈໃສ່ເບິ່ງແຍງດ້ານສຸຂະພາບທັງຮ່າງກາຍ ແລະ ຈິດຂອງເຂົາເຈົ້າທີ່ດີ. 3.ການຈັດສັນເຄື່ອງຊ່ວຍເຫລືອທີ່ເປັນເຄື່ອງອຸປະໂພກ-ບໍລິໂພກຕ້ອງລະອຽດ, ມີແຜນການໃນການນຳໃຊ້ເງິນທີ່ໄດ້ຮັບການຊ່ວຍເຫລືອທີ່ຊັດເຈນ ແລະ ຕົກລົງເປັນໝູ່ຄະນະ ແລະ 4. ການແບ່ງວຽກງານກັນຂອງແຕ່ລະໜ່ວຍງານຢ່າງມີແບບ ແຜນຊັດເຈນ, ມີການປະສານງານກັນຢ່າງຖືກ ຕ້ອງ ແລະ ວ່ອງໄວ.

ປັດຈຸບັນ ການຄົ້ນຫາຜູ້ສູນຫາຍ, ລວມເຖີງຜູ້ທີ່ຍັງບໍ່ສາມາດຕິດຕໍ່ຫາໄດ້ຈາກອຸທົກກະໄພທີ່ເມືອງ ສະໜາມໄຊ ຍັງສືບຕໍ່ດຳເນີນໄປຢ່າງຮີບດ່ວນ, ໄປພ້ອມຯ ກັບການຊ່ວຍເຫລືອຜູ້ປະສົບໄພທີ່ອາໃສຢູ່ສູນທີ່ພັກຊົ່ວຄາວແຕ່ລະຈຸດຢ່າງຕໍ່ເນື່ອງ ໂດຍມີຫລາຍພາກສ່ວນທັງພາຍໃນ ແລະ ຕ່າງປະເທດຍື່ນມືເຂົ້າໄປໃຫ້ການຊ່ວຍເຫລືອເປັນຢ່າງຫລວງ ຫລາຍ. ແຕ່ການປະຕິບັດພາລະກິດຄົ້ນຫາຜູ້ສູນຫາຍເປັນໄປໄດ້ຍາກທີ່ສຸດ ຍ້ອນສະພາບອາກາດບໍ່ອຳນວຍເພາະເປັນໄລຍະລະດູຝົນ ແລະ ເຂດປະສົບໄພໄດ້ພົບພໍ້ກັບສະພາບນ້ຳຖ້ວມເປັນຄັ້ງທີ 2 ແລ້ວ ເຮັດໃຫ້ໂອກາດທີ່ຈະຄົ້ນພົບຜູ້ສູນຫາຍນີ້ນັບມື້ຫລຸດລົງ ແລະ ບໍ່ຮູ້ວ່າຈະສາມາດຄົ້ນພົບໝົດທຸກຄົນ ຫລື ບໍ່. ຂະນະທີ່ຜູ້ປະສົບໄພຫລາຍພັນຄົນຕ້ອງອາໃສຢູ່ສູນທີ່ພັກຊົ່ວຄາວທີ່ອົງການປົກຄອງແຂວງຈັດສັນໃຫ້ ໂດຍບໍ່ຮູ້ເລີຍວ່າຈະຕ້ອງອາໃສຢູ່ທີ່ພັກຊົ່ວຄາວນີ້ອີກດົນປານໃດ ແລະ ອີກດົນປານໃຈຈິ່ງຈະມີເຮືອນຢູ່ທີ່ຖາວອນ, ພ້ອມກັບຊີວິດການເປັນຢູ່ທີ່ມີຄວາມສຸກ-ຄວາມອົບອຸ່ນຄືເມື່ອກ່ອນ.

ອີງຕາມຂໍ້ມູນຈາກ​ກະຊວງ​ພະ​ລັງ​ງານ  ​ແລະ ບໍ່​ແຮ ໃຫ້ຮູ້ວ່າ: ປັດຈຸບັນລາວເຮົາ​ມີ​ແຫ​ລ່ງຜະລິດ​​ໄຟຟ້າ​ 54 ​ແຫ່ງ,  ນອກນີ້ຍັງມີ​ແຫ​ລ່ງຜະລິດ​ພະລັງງານ​ໄຟຟ້າທີ່​ກຳລັງ​ກໍ່ສ້າງ  ​ແລະ ກຳລັງ​ຈະ​ລົງມືກໍ່ ສ້າງ 46 ​ແຫ່ງ,  ຄາດ​​ວ່າ​ຈະ​ສຳ​ເລັດ​ທັງ​ໝົດ​ໃນປີ 2021. ເມື່ອຮອດເວລານັ້ນ ຈະ​ເຮັດໃຫ້ປະເທດລາວມີ​ແຫ​ລ່ງຜະລິດ​ພະລັງງານ​ໄຟຟ້າເພີ່ມຂຶ້ນເປັນ  100 ​ແຫ່ງ ໂດຍຈະມີ​ກຳລັງ​ຜະລິດ​ເຖີງ 66.944 ລ້ານກິໂລວັດໂມງຕໍ່ປີ, ​ໃນ​ນີ້ 85% ຈະ​ສົ່ງ​ອອກ​ໄປ​ຈຳໜ່າຍ​ຢູ່​ຕ່າງປະ​ເທດ.  ແນ່ນອນວ່າ ຖ້າປະຕິບັດໄດ້ຄືແນວນີ້ ຈະເຮັດໃຫ້ປະເທດລາວກາຍເປັນແຫລ່ງສະໜອງພະລັງງານໄຟຟ້າ ຫລື ເອີ້ນວ່າເປັນໝໍ້ໄຟທີ່ສຳຄັນຂອງອາຊຽນ ແລະ ຈະເຮັດໃຫ້ປະເທດລາວມີລາຍຮັບຈາກການສົ່ງອອກກະແສໄຟຟ້າເພີ່ມຂຶ້ນຢ່າງຫລວງຫລາຍ.

ແນວໃດກໍຕາມ ຍ້ອນເຫດການທີ່ເກີດຂຶ້ນກັບສັນເຂື່ອນໄຟຟ້າເຊປຽນ-ເຊນ້ຳນ້ອຍ. ໃນກອງປະຊຸມລັດຖະບານສະໄໝວິສາມັນ ປະຈໍາເດືອນ ສິງຫາ 2018 ທີ່ຈັດຂຶ້ນໃນວັນທີ 6 ຫາ 7 ສິງຫາ 2018 ລັດຖະບານ ໄດ້ສັ່ງໃຫ້ກວດກາຄືນບັນດາເຂື່ອນໄຟຟ້າທີ່ກໍ່ສ້າງສໍາເລັດແລ້ວ, ລວມເຖີງເຂື່ອນພວມດໍາເນີນການກໍ່ສ້າງ ແລະ ສຶກສາຄວາມເປັນໄປໄດ້. ໃນນັ້ນ, ອາດມີການໂຈະໄວ້ກ່ອນເພື່ອດໍາເນີນການກວດກາ 54 ເຂື່ອນໃນທົ່ວປະເທດຄືນໃໝ່ ໂດຍໄດ້ແຕ່ງຕັ້ງຄະນະຮັບຜິດຊອບກວດກາຄືນທາງດ້ານເຕັກນິກ ແລະ ຄຸນນະພາບຂອງເຂື່ອນທີ່ກຳລັງກໍ່ສ້າງ ແລະ ກໍ່ສ້າງສຳເລັດແລ້ວໃນທົ່ວປະເທດ, ຖ້າກວດເຫັນສິ່ງຜິດປົກກະຕິໃນການອອກແບບ ຫຼື ໃນມາດຕະຖານກໍ່ສ້າງໃຫ້ລາຍງານລັດຖະບານເປັນແຕ່ລະກໍລະນີ ເພື່ອວາງມາດຕະການປັບປຸງແກ້ໄຂ. ພ້ອມກັນນີ້ ລັດຖະບານຈະໃຫ້ໂຈະຊົ່ວຄາວການພິຈາລະນາຮັບເອົາການສະເໜີໂຄງການໃໝ່ໄວ້ກ່ອນ ເພື່ອສຶກສາຄືນໃໝ່ຍຸດທະສາດ ແລະ ແຜນພັດທະນາເຂື່ອນໄຟຟ້າຢູ່ລາວໃນຕໍ່ໜ້າ.

ບັນຫາທີ່ເກີດຂຶ້ນຍ້ອນສັນເຂື່ອນກັ້ນອ່າງເກັບນ້ຳສຳຮອງເຂື່ອນໄຟຟ້າເຊປຽນ-ເຊນ້ຳນ້ອຍ ເປັນເຫດການທີ່ບໍ່ມີໃຜຢາກໃຫ້ເກີດຂຶ້ນ ແລະ ບໍ່ໄດ້ເກີດຂຶ້ນສະເພາະຢູ່ລາວເທົ່ານັ້ນ ເພາະຜ່ານມາເຄີຍມີເຂື່ອນໄຟຟ້າແຕກເກີດຂຶ້ນມາແລ້ວຫລາຍປະເທດ, ໃນນີ້ ຮ້າຍແຮງກ່ວາໝູ່ແມ່ນເກີດຂຶ້ນຢູ່ຈີນໃນປີ 1975 ເຮັດໃຫ້ມີຜູ້ເສຍຊີວິດເຖີງ 20.000 ຄົນ, ຕໍ່ມາແມ່ນເກີດຂຶ້ນຢູ່ສີລັງກາໃນປີ 1986 ມີຜູ້ເສຍຊີວິດ 2.500 ຄົນ ແລະ ອື່ນຯ. ດັ່ງນັ້ນ ເມື່ອເຫດການທີ່ບໍ່ຄາດຝັນແບບນີ້ເກີດຂຶ້ນ ເຮົາຄົນລາວດ້ວຍກັນຕ້ອງສາມັກຄີຮ່ວມຈິດຮ່ວມໃຈຊ່ວຍເຫລືອເຊີ່ງກັນ ແລະ ກັນ. ຈາກເຫດການທີ່ເກີດຂຶ້ນຢູ່ເມືອງ ສະໜາມໄຊ ໄດ້ສະແດງໃຫ້ເຫັນແລ້ວວ່າ: ຄົນລາວຍາມໃດກໍບໍ່ຖີ້ມກັນ ເພາະແຕ່ລະພາກສ່ວນໄດ້ອ່ວຍໜ້າ ແລະ ຍື່ນມືເຂົ້າໄປໃຫ້ການຊ່ວຍເຫລືອຜູ້ປະສົບໄພຢ່າງບໍ່ຂາດສາຍ ແລະ ທຸກຄົນໄດ້ພາວະນາ ວ່າ: ຈະບໍ່ມີເຫດການສູນເສຍຍ້ອນເຂື່ອນແຕກໃນລາວເກີດຂຶ້ນເປັນປະຫວັດສາດຊໍ້າຮອຍອີກເປັນຄັ້ງທີ 4. ຫວັງວ່າເຫດການທີ່ເກີດຂຶ້ນກັບເຂື່ອນໄຟຟ້າເຊປຽນ-ເຊນ້ຳນ້ອຍຄັ້ງນີ້ ຈະກາຍເປັນສິ່ງເຕືອນໃຈ ແລະ ບົດຮຽນອັນລ້ຳຄ່າໃຫ້ແກ່ການກໍ່ສ້າງເຂື່ອນໄຟຟ້າຢູ່ໃນລາວທີ່ບໍ່ອາດສາມາດຫລົງລືມໄດ້ ເພື່ອເຮັດໃຫ້ປະເທດລາວກ້າວຂຶ້ນເປັນແຫລ່ງສະໜອງພະລັງງານໄຟຟ້າ ຫລື ໝໍ້ໄຟອາຊຽນ ທີ່ປາດສະຈາກການສູນເສຍຄັ້ງຮ້າຍແຮງແບບນີ້ອີກໃນຕໍ່ໜ້າ.

ໂດຍ: ບຸນຕຽງ ຈັນທະວົງ