ວັນທີ 13 ກໍລະກົດ 2024 ບໍລິສັດ ເຂື່ອນໄຟຟ້ານ້ຳກົງ 1 ຈຳກັດ ເມືອງພູວົງ ແຂວງ ອັດຕະປື ໄດ້ສ້າງຂະບວນການປ່ອຍປາ ແລະ ປູກຕົ້ນໄມ້ ເນື່ອງໃນໂອກາດສະເຫີຼມສະຫຼອງວັນປ່ອຍປາ ແລະອະນຸລັກສັດນ້ຳ ແລະ ວັນປູກຕົ້ນໄມ້ແຫ່ງຊາດ, ຂຶ້ນທີ່ເຂດບໍລິເວນອ່າງໂຕ່ງເຂື່ອນໄຟຟ້ານ້ຳກົງ 1 ໂດຍມີທ່ານ ນາງ ບຸນນານ ບຸນນະແສງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີ ທ່ານ ຈູຊີ້ ຮອງຄະນະອຳນວຍການ ບໍລິສັດ ເຂື່ອນໄຟຟ້ານ້ຳກົງ 1 ຈຳກັດ, ມີຕາງໜ້າຄະນະນໍາຂັ້ນແຂວງ, ຄະນະນໍາຂັ້ນເມືອງ, ອຳນາດການປົກຄອງບ້ານ, ພະນັກງານວິຊາການ ແລະ ຫຼານນ້ອຍນັກຮຽນເຂົ້າຮ່ວມ.
ຂະບວນການປ່ອຍປາ ແລະ ປູກຕົ້ນໄມ້ ຢູ່ເຂື່ອນໄຟຟ້ານ້ຳກົງ 1 ແມ່ນເປັນການສືບຕໍ່ເອົາໃຈໃສ່ປົກປັກຮັກສາສິ່ງແວດລ້ອມ, ປູກຈິດສຳນຶກ ໃຫ້ນ້ອງນັກຮຽນ ແລະ ພະນັກງານໃນບໍລິສັດ ໄດ້ຮູ້ຈັກປົກປັກຮັກສາສິ່ງແວດລ້ອມ, ເປັນແບບຢ່າງໃຫ້ທຸກພາກສ່ວນໃນສັງຄົມ ພ້ອມກັນຫັນມາໃສ່ໃຈຕໍ່ການອະນຸລັກສັດນ້ຳ-ສັດປ່າ ທັງພ້ອມກັນສ້າງສະພາບແວດລ້ອມທີ່ດີ ໃຫ້ທຳມະຊາດ ເພື່ອເຮັດໃຫ້ແຕ່ລະທ້ອງຖິ່ນ ມີຄວາມອຸດົມສົມບູນ ທາງດ້ານທຳມະຊາດໃຫ້ນັບມື້ຫລາຍຂຶ້ນ, ເປັນການປຸກຈິດສຳນຶກ ແລະ ທັງເປັນການປຸກລະດົມ ໃຫ້ທາງບໍລິສັດໄດ້ຮ່ວມແຮງຮ່ວມໃຈກັນຢ່າງຈິ່ງຈັງ, ໃຫ້ແກ່ອານຸຊົນລຸ້ນຫຼັງຮູ້ຮັກທໍາມະຊາດ ແລະ ຍັງໄດ້ຊຸກຍູ້ສົ່ງເສີມໃຫ້ປະຊາຊົນຫັນມາປູກຕົ້ນໄມ້ໃຫ້ໝາກ, ໄມ້ອຸດສາຫະກໍາ ແລະ ໄມ້ອື່ນໆໃຫ້ກາຍເປັນປ່າໄມ້ປົກຫຸ້ມ, ພ້ອມທັງເປັນເຈົ້າການປົກປັກຮັກສາສັດນ້ຳ-ສັດປ່າ ໃຫ້ຢູ່ຄຽງຄູກັບ ທໍາມະຊາດ ແລະສະພາບແວດລ້ອມໃຫ້ມີຄວາມສົມດູນ ພ້ອມກັນປົກປັກຮັກສາ ແລະ ແກ້ໄຂສິ່ງແວດລ້ອມ, ສະນັ້ນ ທຸກພາກສ່ວນໃນສັງຄົມ ຈົ່ງຮ່ວມແຮງຮ່ວມໃຈກັນປົກປັກຮັກສາສິ່ງແວດລ້ອມໂດຍຫັນປ່ຽນພຶດຕິກຳ ແລະ ຈິນຕະນາການ ຈາກການພັດທະນາເສດຖະດິດ-ສັງຄົມ ທີ່ທຳລາຍສິ່ງແວດລ້ອມ ມາເປັນການພັດທະນາທີ່ເປັນມິດຕໍ່ສິ່ງແວດລ້ອມເພື່ອໃຫ້ມີຄວາມຍືນຍົງ ແລະ ຍາວນານ.
ສໍາລັບເບ້ຍໄມ້ທີ່ນຳມາປູກໃນຄັ້ງນີ້ ແມ່ນຕົ້ນໄມ້ໃຫ້ໝາກຫຼາຍຊະນິດລວມທັງໝົດ 250 ຕົ້ນ ພ້ອມນີ້ຍັງໄດ້ປ່ອຍປາໃສ່ອ່າງນໍ້າກົງ 1 ຊະນິດພັນປາ ມີ: ປາປາກ, ປານວນຈັນ, ປາກົດ, ປາສະຫວາຍ ລວມທັງໝົດ 1 ແສນໂຕ ພ້ອມນີ້ໃນພິທີ ຍັງໄດ້ມີການມອບອຸປະກອນການຮຽນ ໃຫ້ນ້ອງນັກຮຽນໃນບ້ານເປົ້າໝາຍຂອງໂຄງການ .
ຂ່າວ: ວັດທະນາ ຂ,ອັດຕະປື
