ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າໄດ້ກ່າວໃນພິທີເປີດງານວາງສະແດງສິນຄ້າລາວ – ຫວຽດນາມ ປະຈໍາປີ ວ່າ: ງານວາງສະແດງສິນຄ້າລາວ – ຫວຽດນາມ ປະຈຳປີ 2024 ຄັ້ງນີ້ ເຊິ່ງກໍເປັນຄັ້ງທີ 14 ທີ່ສອງກະຊວງອຸດສາຫະກຳ ແລະ ການຄ້າ ສປປ ລາວ ແລະ ສສ ຫວຽດນາມ ໄດ້ຮ່ວມກັນເປັນເຈົ້າພາບ ເພື່ອເສີມຂະຫຍາຍສາຍພົວພັນທາງດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງ ລາວ – ຫວຽດນາມ ເພື່ອເພີ່ມທະວີຮັດແໜ້ນ ແລະ ເຂົ້າສູ່ລວງເລິກ.
ທ່ານກ່າວວ່າ: ໃນ 6 ເດືອນຕົ້ນປີ 2024 ມູນຄ່າການຄ້າລະຫວ່າງ ລາວ – ຫວຽດນາມ ບັນລຸໄດ້ 928 ລ້ານໂດລາສະຫະລັດ, ເພີ່ມຂຶ້ນ 11% ເມື່ອທຽບໃສ່ໄລຍະດຽວກັນຂອງປີຜ່ານມາ ໃນນັ້ນການສົ່ງອອກຂອງ ລາວບັນລຸໄດ້ 639 ລ້ານໂດລາສະຫະລັດ, ເພີ່ມຂຶ້ນ12,8% ສິນຄ້ານຳເຂົ້າສ່ວນໃຫຍ່ແມ່ນ ຝຸ່ນ(ປຸຍ), ນໍ້າຕານ, ເຄື່ອງດື່ມ, ຢາງ ແລະ ເຄື່ອງໃຊ້ທີ່ເຮັດດ້ວຍຢາງ, ແຮ່ ແລະ ຂີ້ໂລຫະ, ສ່ວນການນຳເຂົ້າບັນລຸໄດ້ 289 ລ້ານໂດລາສະຫະລັດ ເພີ່ມຂຶ້ນ 7,4% ສິນຄ້ານໍາເຂົ້າອັນດັບ 1 ເຊື້ອໄຟທີ່ໄດ້ຈາກແຮ່, ປາລາສະຕິກ, ເຄື່ອງປະຕິສັງຄອນນິວເຄຣຍ, ເຄື່ອງຈັກໄຟຟ້າ ແລະ ອຸປະກອນໄຟຟ້າ, ພາຫະນະທາງບົກ ເຊິ່ງໂດຍລວມເຫັນວ່າມີທ່າອ່ຽງເພີ່ມຂຶ້ນ ແລະ ສາມາດບັນລຸຕາມຄາດໝາຍ.
ທ່ານກ່າວຕື່ມວ່າ: ງານວາງສະແດງສິນຄ້າລາວ – ຫວຽດນາມ ຄັ້ງທີ 14 ພາຍໃນງານມີການນຳສິນຄ້າທັງສອງປະເທດເຂົ້າຮ່ວມວາງສະແດງ ແລະ ຈຳໜ່າຍຢ່າງຫຼວງຫຼາຍໂດຍມີ ບໍລິສັດຫວຽດນາມ 60 ບໍລິສັດ ຈຳນວນ 120 ຫ້ອງວາງສະແດງ ແລະ ບໍລິສັດລາວ 37 ບໍລິສັດ ຈຳນວນ 65 ຫ້ອງວາງສະແດງ ເຊິ່ງປະເພດສິນຄ້າປະກອບມີ: ສິນຄ້າກະສິກຳປຸງແຕ່ງ, ເຄື່ອງຫັດຖະກຳແຜ່ນແພ, ອາຫານ ແລະ ເຄື່ອງດື່ມ, ເຄື່ອງເຟີນີເຈີ ສິນຄ້າໂອດ໊ອບ, ເຄື່ອງໃຊ້ໄຟຟ້າ, ຜະລິດຕະພັນການຢາ, ເຄື່ອງອຸປະໂພກ ແລະ ບໍລິໂພກ ແລະ ສິນຄ້າອື່ນໆ ເຊິ່ງງານຈະຈັດໄປຈົນເຖິງວັນທີ 29 ກໍລະກົດ 2024.
ພິທີເປີດງານໄດ້ຈັດຂຶ້ນໃນວັນທີ 25 ກໍລະກົດ 2024 ທີ່ສູນການຄ້າລາວໄອເຕັກ ໂດຍການເຂົ້າຮ່ວມຂອງທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ຫງຽນບາຮຸ່ງ ເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ ພ້ອມດ້ວຍພະນັກງານ ຜູ້ປະກອບການທັງສອງປະເທດເຂົ້າຮ່ວມ.
ຂ່າວ: ເສດຖະກິດ-ການຄ້າ
