ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຄື່ອນຍ້າຍພຣະບໍຣົມມະຮູບຊົງຊ້າງ ສົມເດັດພຣະໄຊເຊດຖາທິຣາດ ຈາກໂຮງຫຫຼໍໄປວັດທາດຫລວງເໜືອ

ພິທີແຫ່ພະບໍລົມມະຮູບຊົງຊ້າງຂອງສົມເດັດພຣະໄຊເຊດຖາທິຣາດ ເຈົ້າພຣະວິຣະມະຫາຣາດຈາກໂຮງຫລໍ່ວິຈິດສິນ ບ້ານຈອມມະນີ ເມືອງໄຊເຊດຖາ ໄປວັດທາດຫລວງເໜືອ ນະຄອນຫລວງວຽງຈັນ ຈັດຂຶ້ນຕອນເຊົ້າວັນທີ 21 ກໍລະກົດ 2020 ໂດຍການເຂົ້າຮ່ວມຂອງທ່ານຈູມມະລີ ໄຊຍະສອນ ອາດີດປະທານປະເທດ ພ້ອມຄອບຄົວລູກຫລານ ມີອົງການປົກຄອງແຂວງອັດຕະປື ພາກສ່ວນກ່ຽວຂ້ອງ ພ້ອມດ້ວຍປະຊາຊົນຊາວນະຄອນຫລວງວຽງຈັນຈໍານວນຫລາຍ.

ທ່ານສຸກສະໄໝ ຈັນທະມາດ ອາດີດຮອງເຈົ້າແຂວງອັດຕະປື ທີ່ເຂົ້າຮ່ວມຂະບວນແຫ່ຄັ້ງນີ້ ໃຫ້ຮູ້ວ່າ: ພຣະບໍຣົມມະຮູບຊົງຊ້າງ ສົມເດັດພຣະເຈົ້າໄຊເຊດຖາທິຣາດ ພຣະວິຣະມະຫາຣາດ ຈະໄດ້ສືບຕໍແຫ່ລົງໄປປະດິດສະຖານ ຢູ່ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື ທ່ານຮູ້ສຶກເປັນກຽດ ແລະພາກພູມໃຈທີ່ຕາງໜ້າໃຫ້ປະຊາຊົນລາວບັນດາເຜົ່າ ຊາວແຂວງອັດຕະປື ຂຶ້ນມາອັນເຊີນພຣະບໍຣົມມະຮູບຊົງຊ້າງຂອງເພິ່ນ, ຍ້ອນວ່າໃນອາດີດ ພະອົງໄດ້ລົງໄປເຄື່ອນໄຫວກິດທຸລະທີ່ສໍາຄັນຂອງປະເທດຊາດຢູ່ແຂວງອັດຕະປື ແລະໄດ້ສິ້ນພະຊົນຢູ່ທີ່ນັ້ນ, ການປະດິດສະຖານພະບໍຣົມມະຮູບຊົງຊ້າງຂອງເພິ່ນ ເປັນທີ່ລະນຶກບຸນຄຸນ, ຄຸນງາມຄວາມດີຂອງເພິ່ນທີ່ມີຕໍ່ປະເທດຊາດບ້ານເມືອງ.

ພຣະບໍຣົມມະຮູບຊົງຊ້າງ ສົມເດັດພຣະເຈົ້າໄຊເຊດຖາທິຣາດ ພຣະວິຣະມະຫາຣາດ ຈະສະເຫຼີມສະຫຼອງຢູ່ຫໍທຳມະສະພາ ວັດທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ, ເລີ່ມແຕ່ວັນທີ 21 ເຖິງວັນທີ 26 ກໍລະກົດນີ້, ທຸກໆວັນເລີ່ມແຕ່ເວລາ 8 ໂມງອອກຕົນ ຍາດໂຍມຮ່ວມບຸນໂມທະນາທານ, ຟັງສູດປະຣິຕະມຸງຄຸນ, ໄຫວ້ພະສູດມົນ, ວັນທີ 26 ກໍລະກົດ ເວລາ 7 ໂມງ ມີພິທີໃສ່ບາດຖວາຍສັງຄະທານແດ່ພະສົງ 39 ອົງ ຄົບອາຍຸພະເຈົ້າໄຊຍະເສດຖາທິລາດ.

ວັນທີ 27 ກໍລະກົດ ຂະບວນແຫ່ໄປສະເຫຼີມສະຫຼອງທີ່ແຂວງບໍລິຄຳໄຊ, ວັນທີ 28 ສະເຫຼີມສະຫຼອງຢູ່ແຂວງຄຳມ່ວນ, ວັນທີ 29 ສະເຫຼີມສະຫຼອງຢູ່ແຂວງສະຫວັນນະເຂດ, ວັນທີ 30 ສະເຫຼີມສະຫຼອງຢູ່ແຂວງຈຳປາສັກ ແລະ ວັນທີ 31 ກໍລະກົດ ຈະສະເຫຼີມສະຫຼອງຢູ່ແຂວງອັດຕະປື ແລະ ຈະຍົກຂຶ້ນແທ່ນປະດິດສະຖານພ້ອມທັງບຳເພັນກຸສົນ ຖວາຍສັງຄະທານ ໃນວັນທີ 1 ສິງຫາໜ້ານີ້.