ທ່ານ ພານຸສັກ ແກ່ນວົງພະຈັນ ຫົວໜ້າຫ້ອງການ ທະນາ ຄານ ແຫ່ງ ສປປ ລາວ ໃຫ້ຮູ້ໃນໂອກາດຖະແຫຼງຂ່າວຊິ້ແຈ້ງຕໍ່ສັງຄົມ ເມື່ອບໍ່ດົນມານີ້ວ່າ: ຈາກຄວາມຕື່ນຕົວຂອງສັງຄົມທີ່ພໍ່ ຄ້າ-ຊາວຂາຍ ໄດ້ຊຸກຍູ້ການນໍາໃຊ້ເງິນກີບຢ່າງກວ້າງຂວາງ ເຊິ່ງເປັນໜ້າຍ້ອງຍໍສັນລະເສີນ ແລະ ໄດ້ຮັບການຕອບຮັບຈາກສັງຄົມເປັນຢ່າງດີ.
ຢ່າງໃດກໍຕາມ, ມີບາງທັດສະນະຜ່ານສື່ສັງຄົມອອນລາຍນໍາສະເໜີວ່າ: ເປັນການເອົາປຽບລູກຄ້າ, ນັກທ່ອງທ່ຽວ, ກຳນົດອັດ ຕາແລກປ່ຽນທີ່ຕໍ່າກວ່າຄວາມເປັນຈິງ, ຫ້າມ ຫຼື ບໍ່ຮັບເງິນຕາ ຕ່າງປະເທດ ແລະ ອື່ນໆ.
ຕໍ່ທັດສະນະດັ່ງກ່າວ, ໃນນາມທະນາຄານແຫ່ງ ສປປ ລາວ (ທຫລ) ມີໜ້າທີ່ຄຸ້ມຄອງເງິນຕາຕ່າງປະເທດ ຂໍຊີ້ແຈງເພີ່ມເຕີມໃຫ້ບັນດາທ່ານຮັບຮູ້ ແລະ ເຂົ້າໃຈໃຫ້ຖືກຕ້ອງວ່າ: ອີງຕາມກົດ ໝາຍ ວ່າດ້ວຍ ການຄຸ້ມຄອງເງິນຕາຕ່າງປະເທດ (ສະບັບປັບປຸງ) ທີ່ມີຜົນບັງຄັບໃຊ້ ໃນເດືອນກໍລະກົດ ປີ 2022 ໄດ້ກໍານົດ ຄື:
1. ເງິນກີບເທົ່ານັ້ນ ທີ່ເປັນສື່ກາງໃນການຊໍາລະ, ຮັບຊໍາລະທີ່ຖືກຕ້ອງຕາມກົດໝາຍ, ທຸກການຕິດປະກາດລາຄາສິນຄ້າ, ຊໍາລະ-ຮັບຊໍາລະຄ່າສິນຄ້າ ແລະ ການບໍລິການພາຍໃນ ສປປ ລາວ ຈະຕ້ອງເປັນເງິນກີບ.
2. ການແລກປ່ຽນເງິນຕາຕ່າງປະເທດ ຕ້ອງດຳເນີນຜ່ານທະນາ ຄານທຸລະກິດ ແລະ ໜ່ວຍບໍລິການຂອງທະນາຄານທຸລະກິດທີ່ໄດ້ຮັບອະນຸຍາດເທົ່ານັ້ນ.
3. ການກຳນົດອັດຕາແລກປ່ຽນ ແມ່ນທະນາຄານທຸລະກິດເປັນຜູ້ກຳນົດພຽງຜູ້ດຽວ, ການກຳນົດລາຄາຄ່າສິນຄ້າ ແລະ ການບໍລິການ ຕ້ອງອີງໃສ່ອັດຕາແລກປ່ຽນຂອງທະນາຄານ ຈຶ່ງຖືວ່າຖືກຕ້ອງຕາມກົດໝາຍ.
4. ບຸກຄົນ, ນິຕິບຸກຄົນ, ການຈັດຕັ້ງ ສາມາດຄອບຄອງເງິນຕາ ຕ່າງປະເທດ, ມີບັນຊີເງິນຝາກເປັນເງິນຕາຕ່າງປະເທດ ແລະ ດຳເນີນທຸລະກໍາເງິນຕາຕ່າງປະເທດ ໃຫ້ຖືກຕ້ອງກັບຈຸດປະສົງ ແລະ ເປົ້າໝາຍທີ່ລະບຽບການກຳນົດ.
ທ່ານໃຫ້ຮູ້ຕື່ມວ່າ: ສໍາລັບຄວາມຕື່ນຕົວຂອງສັງຄົມໃນການສົ່ງເສີມການນໍາໃຊ້ເງິນກີບ ໃນໄລຍະຜ່ານມາ ຂໍໃຫ້ບັນດາທ່ານມີຄວາມເຂົ້າໃຈໃຫ້ຖືກຕ້ອງ, ບໍ່ຄວນຖືເປັນປະເດັນ ທີ່ຈະສ້າງຄວາມ ສັບສົນ ແລະ ເຂົ້າໃຈຜິດກັນ. ນັ້ນເປັນພຽງການສະແດງອອກ ດ້ວຍຄວາມສະໝັກໃຈຂອງສັງຄົມ ທີ່ຢາກຊ່ວຍກັນນໍາໃຊ້ເງິນກີບເຂົ້າໃນການຊໍາລະຢູ່ພາຍໃນ, ຫຼຸດຜ່ອນຄວາມຕ້ອງການເງິນຕາ ຕ່າງປະເທດທີ່ມີຄວາມຊິນເຄີຍນໍາໃຊ້ກັນຢ່າງຊະຊາຍ ເພື່ອຫຼຸດຜ່ອນຜົນກະທົບຈາກການເໜັງຕີງຂອງອັດຕາແລກປ່ຽນ, ເງິນ ເຟີ້ ແລະ ຕ້ອງການໃຫ້ຜູ້ມີເງິນຕາຕ່າງປະເທດ ບໍ່ວ່າຈະເປັນຄົນລາວ ແລະ ຄົນຕ່າງປະເທດ ໄປແລກປ່ຽນນໍາທະນາຄານ ເອົາເງິນກີບກ່ອນຈະໃຊ້ຈະຈ່າຍຢູ່ພາຍໃນ ໃຫ້ຖືກຕ້ອງຕາມກົດໝາຍຄືກັບປະເທດອື່ນໆທີ່ປະຕິບັດ.
ທຸກສະກຸນເງິນຕາຂອງແຕ່ລະປະເທດ ລ້ວນແລ້ວແຕ່ມີຄວາມໝາຍ, ມີຄຸນຄ່າ ແລະ ນໍາໃຊ້ໃຫ້ຖືກຕ້ອງກັບຈຸດປະສົງ ແລະ ເປົ້າ ໝາຍ ຕາມກົດໝາຍ ແລະ ລະບຽບການທີ່ກ່ຽວຂ້ອງກໍານົດໄວ້. ໃນອະນາຄົດອັນໃກ້ນີ້, ທະນາຄານແຫ່ງ ສປປ ລາວ ຈະອອກຂໍ້ຕົກ ລົງ ແລະ ຄຳແນະນໍາລະອຽດໃນການຊໍາລະຄ່າສິນຄ້າ, ຄ່າບໍລິການ ແລະ ຊໍາລະໜີ້ສິນ ຢູ່ ສປປ ລາວ ວ່າຄວນປະຕິບັດແບບໃດ ຈຶ່ງສອດຄ່ອງເໝາະສົມເປັນອັນລະອຽດຕື່ມ.
ດັ່ງນັ້ນ, ທະນາຄານແຫ່ງ ສປປ ລາວ ຈຶ່ງຮຽກຮ້ອງມາຍັງບັນ ດາທ່ານ ຈົ່ງໃຫ້ການຮ່ວມມືສົ່ງເສີມການນໍາໃຊ້ເງິນກີບໃນການຊໍາ ລະພາຍໃນ ດັ່ງຄໍາຂວັນ: “ຢູ່ເມືອງລາວ ໃຊ້ແຕ່ເງິນກີບ”, ກໍານົດອັດຕາແລກປ່ຽນໃຫ້ຖືກຕ້ອງ ແລະ ແລກປ່ຽນເງິນຕາກັບທະນາ ຄານກ່ອນຈະນໍາໄປໃຊ້ຈ່າຍ ເພື່ອຈັດຕັ້ງປະຕິບັດນິຕິກໍາຄຸ້ມຄອງເງິນຕາຕ່າງປະເທດ ຢ່າງເຂັ້ມງວດ.
