ວັນທີ 10 ພຶດສະພາ 2024, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ພ້ອມດ້ວຍຄະນະ ໄດ້ລົງກວດກາຕິດຕາມການກໍ່ສ້າງໂຄງການປ້ອງກັນຕາຝັ່ງ ແລະ ພັດທະນາແຄມຂອງໄລຍະທີ 2 ແຕ່ຫລັກ 3 ໂຮງຮຽນການຊ່າງລາວ-ເຢຍລະມັນ ເມືອງສີສັດຕະນາກ ຫາ ຫາດດອກແກ້ວ ເມືອງຫາດຊາຍຟອງ ມີຄວາມຍາວເກືອບ 8 ກິໂລແມັດເຄິ່ງ.
ທ່ານ ພຸດທະເສນ ສິນທະວົງ ຮອງຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ, ຫົວໜ້າໂຄງການປ້ອງກັນຕາຝັ່ງ ແລະ ພັດທະນາແຄມຂອງໄລຍະທີ 2 ລາຍງານວ່າ: ໂຄງການປ້ອງກັນຕາຝັ່ງ ແລະ ພັດທະນາແຄມຂອງໄລຍະທີ 2 ຢູ່ ນະຄອນຫລວງວຽງຈັນ ເລີ່ມຈັດຕັ້ງປະຕິບັດມາແຕ່ເດືອນກຸມພາ 2022 ໜ້າວຽກປະກອບມີ ລະບົບປ້ອງກັນຕາຝັ່ງ, ກໍ່ສ້າງຄູປ້ອງກັນນໍ້າຖ້ວມທີ່ສາມາດນໍາໃຊ້ເປັນທາງລຽບຕາມແຄມຂອງ ແລະ ກໍ່ສ້າງລະບົບປ້ອງກັນຕາຝັ່ງບໍ່ໃຫ້ມີການເຊາະເຈື່ອນມີຄວາມຍາວເກືອບ 8 ກິໂລແມັດເຄິ່ງ, ຈາກຫລັກ 4 ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ ເຊິ່ງປະກອບດ້ວຍເສັ້ນທາງຍ່າງຊົມວິວ, ສວນກິລາກາງແຈ້ງ ແລະ ຈຸດທ່ອງທ່ຽວທຳມະຊາດທີ່ເຊື່ອມຈອດກັບຕົວເມືອງ.
ມາຮອດເດືອນມີນາ 2024 ໜ້າວຽກຂອງໂຄງການສຳເລັດ 53,3% ທຽບໃສ່ແຜນການ (56,6%) ສາເຫດຊັກຊ້າຍ້ອນມີຄວາມຫຍຸ້ງຍາກໃນການຂົນສົ່ງວັດສະດຸກໍ່ສ້າງຈາກພາກສະໜາມເຂົ້າຫາໂຄງການ ເຊິ່ງຕ້ອງໄດ້ຜ່ານເສັ້ນທາງຕົວເມືອງ ຈຳກັດໂມງເວລາການຂົນສົ່ງ ແລະ ນໍ້າໜັກ, ຄາດວ່າໂຄງການຈະໃຫ້ສຳເລັດທ້າຍປີ 2025.
ໂຄງການປ້ອງກັນຕາຝັ່ງ ແລະ ພັດທະນາແຄມຂອງໄລຍະທີ 2 ໄດ້ຮັບການສະໜັບສະໜູນເງິນກູ້ຢືມດອກເບ້ຍຕໍ່າຈາກ ສ ເກົາຫລີ ມູນຄ່າ 257.605.000 ໂດລາສະຫະລັດ ແລະ ທຶນສົມທົບຂອງລັດຖະບານລາວ ມູນຄ່າ 9.957.000 ໂດລາ ລວມມູນຄ່າທັງໝົດ 267.562.000 ໂດລາ ໂດຍແມ່ນບໍລິສັດ ຮ່ວມ JV-Saman Corp ແລະ Korea Engineering Consultants (SAMAN ແລະ KECEC) ສ ເກົາຫລີ ເປັນທີ່ປຶກສາໂຄງການ ແລະ ບໍລິສັດຮ່ວມ Dongbu Corporation ແລະ Kumho Industrail Co.,Ltd ສ ເກົາຫລີເປັນຜູ້ຮັບເໝົາກໍ່ສ້າງ.
