ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ ພ້ອມດ້ວຍຄະນະ ເຄື່ອນໄຫວຕິດຕາມເສັ້ນທາງ ແລະ ຂົວຂ້າມນໍ້າໂດນ ຈຸດຄຸ້ມນາສະໂທ ບ້ານສີວິໄລ ໃນເທສະບານເມືອງທ່າແຂກ ໃນວັນທີ 14 ສິງຫາ 2024 ເນື່ອງຈາກມີການເປ່ເພ ແລະ ຊຸດໂຊມ.
ຂົວຂ້າມນໍ້າໂດນ ເປັນປະເພດຂົວໄມ້ ມີຄວາມຍາວ 50 ແມັດ ໄດ້ສ້າງຂຶ້ນແຕ່ປີ 2006. ປັດຈຸບັນຂົວດັ່ງກ່າວ ໄດ້ເປ່ເພ ແລະ ຊຸດໂຊມຫລາຍ ເຮັດໃຫ້ການສັນຈອນໄປ-ມາ ຂອງປະຊາຊົນທີ່ນຳໃຊ້ຂົວດັ່ງກ່າວພົບຄວາມຫຍຸ້ງຍາກ. ສຳລັບເສັ້ນທາງ ຢູ່ບ້ານທ່າແຂກກາງ ແຕ່ຄອງລະບາຍນໍ້າ ລົງຫາປາກຫ້ວຍສະຄາມ ມີຄວາມຍາວປະມານ 400 ກວ່າແມັດ ໃນນັ້ນ, ປະມານ 170 ແມັດ ຍັງເປັນທາງດິນແດງ ແລະ ອີກ 240 ແມັດ ຍັງບໍ່ໄດ້ບຸກເບີກ ແລະ ຈຸດທີ່ຈະສ້າງເສັ້ນທາງເລາະຕາມແຄມແມ່ນໍ້າຂອງ ແຕ່ວັດບ້ານທ່າແຂກໃຕ້ ເຂດຈ້ອມແຈ້ງ ຫາປາກຫ້ວຍຊີມັງ ມີຄວາມຍາວ 2.000 ກວ່າແມັດ ເຊິ່ງຈຸດດັ່ງກ່າວນີ້ແມ່ນຍັງບໍ່ທັນໄດ້ບຸກເບີກ.
ໂອກາດນີ້, ທ່ານ ວັນໄຊ ພອງສະຫວັນ ໄດ້ມີຄໍາເຫັນຊີ້ນໍາ ໂດຍສະເພາະຈຸດຂົວຂ້າມນໍ້າໂດນ ຄຸ້ມນາສະໂທ ແມ່ນມອບໃຫ້ພະແນກໂຍທາທິການ ແລະ ຂົນສົ່ງແຂວງ ຄິດໄລ່ ອອກແບບ ພ້ອມທັງປະເມີນລາຄາ ໃນການປັບປຸງກໍ່ສ້າງຂົວໃໝ່ ເຊິ່ງໃນໄລຍະນີ້ແມ່ນມອບໃຫ້ຂະແໜງການກ່ຽວຂ້ອງ ລົງຊຸກຍູ້ ຕິດຕາມ ອຳນາດການປົກຄອງບ້ານ ນໍາພາພໍ່ແມ່ປະຊາຊົນສ້ອມແປງ ຈຸດທີ່ເປ່ເພ ເພື່ອໃຫ້ສາມາດທຽວ ໄປ-ມາໄດ້. ສ່ວນທາງຢູ່ບ້ານທ່າແຂກກາງ ແລະ ບ້ານທ່າແຂກໃຕ້ ແມ່ນມອບໃຫ້ພະແນກໂຍທາທິການ ແລະ ຂົນສົ່ງແຂວງ ແລະ ພາກສ່ວນກ່ຽວຂ້ອງ ເພື່ອສຳຫລວດ, ຄິດໄລ່ມູນຄ່າ ແລະ ຂຶ້ນແຜນສະເໜີໃນການບຸກເບີກ-ກໍ່ສ້າງ ພ້ອມນີ້, ໃຫ້ອົງການປົກຄອງເມືອງທ່າແຂກ ສົມທົບກັບອຳນາດການປົກຄອງບ້ານ ລົງຕິດຕາມ, ໄກ່ເກ່ຍ ສິ່ງປຸກສ້າງ, ເນື້ອທີ່ປູກຝັງ, ຕົ້ນໄມ້ ແລະ ອື່ນໆ ທີ່ກີດຂວາງ ຢູ່ໃນຂອບເຂດດັ່ງກ່າວ.
ຂ່າວ-ພາບ: ກອງຄໍາ
