ໂອກາດເດີນທາງເຄື່ອນໄຫວເຮັດວຽກຢູ່ເມືອງຄູນຄໍາ ໃນວັນທີ 26 ສິງຫາ 2023 ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ພ້ອມດ້ວຍຄະນະໄດ້ເຄື່ອນໄຫວຕິດຕາມໂຄງການຈັດຕັ້ງປະຕິບັດການກໍ່ສ້າງຕິດຕັ້ງລະບົບຕາຂ່າຍ 22 ກິໂລໂວນ ແຕ່ບ້ານ ນາພົງ ເມືອງປາກກະດິງ ຫາ ບ້ານ ຄູນເງິນ ເມືອງຄູນຄໍາ ເພື່ອສະໜອງໄຟຟ້າໃຫ້ເຂດເມືອງ ຄູນຄໍາ ໄດ້ຊົມໃຊ້.
ໂຄງການດັ່ງກ່າວ ກໍ່ສ້າງຂຶ້ນເນື່ອງຈາກລະບົບຕາຂ່າຍເກົ່າຖືກໄພທຳມະຊາດ ດິນເຈື່ອນທັບຖົມ ທີ່ເກີດຂຶ້ນໃນຄັ້ງວັນທີ 3 ສິງຫາ 2023 ເຮັດໃຫ້ແລວຕາຂ່າຍ 22 ກິໂລໂວນ, ແຕ່ສະຖານີ ທ່າສາລາ ເມືອງ ຄໍາເກີດ ຫາ ເມືອງ ຄູນຄຳ ໄລຍະທາງ 7.580 ແມັດ ບໍ່ສາມາດສົ່ງໄຟໄດ້ ຈົນຮອດປັດຈຸບັນ. ສະນັ້ນ, ເພື່ອເປັນການປັບປຸງຟື້ນຟູຕໍ່ສະພາບຜົນກະທົບດັ່ງກ່າວໃຫ້ເຂົ້າສູ່ສະພາບປົກກະຕິໂດຍໄວ, ເຮັດໃຫ້ການສະໜອງໄຟຟ້າ ແກ່ປະຊາຊົນເຂດເມືອງ ຄູນຄໍາ ໄດ້ຊົມໃຊ້ຢ່າງທົ່ວເຖິງ, ສາຂາ ລັດວິສາຫະກິດໄຟຟ້າລາວ ແຂວງຄຳມ່ວນ ໄດ້ປະສານກັບຝ່າຍຄຸ້ມຄອງລະບົບໄຟຟ້າພາກໃຕ້ ກ່ຽວກັບວຽກງານການກໍ່ສ້າງຕາຂ່າຍ 22 kV ເຊື່ອມຕໍ່ ລະຫວ່າງ ບ້ານ ນາພົງ, ເມືອງປາກກະດິງ, ແຂວງ ບໍລິຄໍາໄຊ ຫາ ບ້ານ ຄູນເງິນ, ເມືອງ ຄູນຄຳ, ແຂວງ ຄຳມ່ວນ ຊຶ່ງມີລວງຍາວທັງໝົດ 9.220 ແມັດ, ຄິດເປັນມູນຄ່າໃນການກໍ່ສ້າງທັງໝົດເປັນຈຳນວນເງິນ 3 ຕື້ກວ່າກີບ, ໂດຍໄດ້ເລີ່ມລົງມືຈັດຕັ້ງປະຕິບັດ ນັບແຕ່ວັນທີ 20 ສິງຫາ 2023 ເປັນຕົ້ນມາ. ປັດຈຸບັນ ແມ່ນກໍາລັງເລັ່ງປະຕິບັດຢ່າງຮີບດ່ວນ ເພື່ອໃຫ້ພໍ່ແມ່ປະຊາຊົນເຂດເມືອງ ຄູນຄໍາ ໄດ້ຊົມໃຊ້ໄຟຟ້າໃຫ້ໄວທີ່ສຸດ ຄາດວ່າຈະໃຫ້ສໍາເລັດ ແລະ ເປີດການນໍາໃຊ້ໃນຕົ້ນເດືອນ ກັນຍາ 2023 ນີ້.
(ຂ່າວ: ມະນີວັນ)
