ໃນຕອນເຊົ້າວັນທີ 8 ສິງຫາ 2024 ທ່ານ ອາລຸນໄຊ ສູນນະ ລາດ ເຈົ້າແຂວງຈຳປາສັກ ພ້ອມຄະນະນຳຂອງແຂວງ, ພະແນກການກ່ຽວຂ້ອງ, ໄດ້ເຄື່ອນໄຫວຢຽມຢາມ, ຊຸກຍູ້, ຊີ້ນຳວຽກງານຢູ່ສະຖານີວິທະຍຸ, ໂທລະພາບ ແລະ ໜັງສືພິມ ພະແນກ ຖວທ ແຂວງຈໍາປາສັກ.
ໂອກາດນີ້ໄດ້ຕິດຕາມເບິ່ງພື້ນຖານໂຄງລ່າງ, ອຸປະກອນເຕັກນິກ, ເຄື່ອງສົ່ງ ,ຫ້ອງອ່ານຂ່າວ, ຈັດລາຍການ, ອອກອາກາດສົດ ແລະ ພົບປະໂອ້ລົມຕໍ່ຄະນະນຳ ແລະ ພະນັກງານສື່ມວນຊົນທັງ 3 ສື່ ວິທະຍຸ,ໂທລະພາບ ແລະ ສື່ສິ່ງພິມ ຂອງແຂວງ ແລະ ຟັງລາຍງານ ສະພາບການເຄື່ອນໄຫວວຽກງານໃນໄລຍະຜ່ານມາ.
ປະຈຸບັນສື່ມວນຊົນແຂວງຈຳປາສັກ ໄດ້ປະຕິບັດພາລະບົດໜ້າທີ່ຂອງຕົນ ຢ່າງຕັ້ງໜ້າ ເປັນກະບອກສຽງອັນແຫຼຼມຄົມຂອງອົງຄະນະພັກແຂວງ. ໃນນັ້ນ ສະຖານີວິທະຍຸ-ໂທລະພາບ ໄດ້ເຮັດໜ້າທີ່ເຄື່ອນໄຫວວຽກວິຊາສະເພາະ ດ້ວຍຄວາມເອົາໃຈໃສ່ ແລະ ຕິດພັນກັບຫຼາຍເຫດການທີ່ເກີດຂຶ້ນ ແລະ ດ້ານພົ້ນເດັ່ນ ເຊັ່ນ ເກັບກຳຂ່າວປາກົດການຫຍໍ້ທໍ້ຕ່າງໆຂອງສັງຄົມ ມານໍາສະເໜີຜ່ານຫຼາຍຊ່ອງທາງ ເປັນຕົ້ນ: ອອກອາກາດທາງສະຖານີວິທະຍຸ, ໄດ້ອອກອາກາດຄວບຄູ່ໃນເວລາດຽວກັນ ຄື: ຜ່ານຄວາມຖີ່ພາກພື້ນດິນ ລະບົບ FM 100,7 MHz ຮັບຟັງໄດ້ໄດ້ (60 ກິໂລແມັດ), ໃນຂະນະດຽວ ກັນກໍໄດ້ອອກອາກາດຜ່ານລະບົບ Aplication, facebook Live, ລວມເວລາອອກອາກາດແມ່ນ 16,15 ຊົ່ວໂມງຕໍ່ວັນ, ເລີ່ມແຕ່ 5:45 ໂມງຕອນເຊົ້າ ເຖິງ 21:30 ໂມງຕອນຄໍ່າ, ປະກອບມີ 36 ລາຍການ, ໃນນັ້ນ ລາຍການພາຍໃນມີ 18 ລາຍການ, ລາຍການຈາກພະແນກການກົມກອງອ້ອມຂ້າງແຂວງມີ 15 ລາຍການ, ລາຍການ ຂ່າວທ້ອງຖິ່ນ 01 ລາຍການ (ອອກອາກາດເປັນ 03 ພາກຄື ພາກເຊົ້າ, ທ່ຽງ, ແລງ, ພິເສດໄດ້ຂະຫຍາຍເວລາໃຫ້ລາຍການຂ່າວວັນນີ້ ພາກຄໍ່າເຖິງ ເວລາ 21:30 ນາທີ) ມີລາຍການອອກອາກາດໄລສົດຈໍານວນ 08 ລາຍການ, ຖ່າຍທອດຈາກສູນກາງ 03 ລາຍການຄື: ພາກຂ່າວທົ່ວໄປ, ຂ່າວອາຊຽນວັນນີ້, ລາຍການຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XI ຂອງພັກ.
ນອກນັ້ນຍັງໄດ້ອອກພາກຂ່າວຂອງແຂວງ ໃນສະຖານີວິທະຍຸຂອງ 04 ເມືອງຄື: ສະຖານີວິທະຍຸເມືອງໂຂງ, ສະຖານີວິທະຍຸເມືອງໂພນທອງ, ສະຖານີວິທະຍຸເມືອງຊະນະສົມບູນ ແລະ ສະຖານີວິທະຍຸເມືອງສຸຂຸມາ. ສ່ວນການອອກອາກາດທາງໂທລະພາບ, ສື່ສິ່ງພິມກໍ່ໄດ້ເຄື່ອນໄຫວຢ່າງຕັ້ງໜ້າ ແລະ ມີຜົນສຳເລັດຫຼຼາຍດ້ານ
ພາຍຫຼັງຮັບຟັງລາຍງານວຽກງານສື່ມວນຊົນ ທ່ານເຈົ້າແຂວງ ໄດ້ຖືໂອກາດນີ້ໂອ້ລົມ ໂດຍຫວນຄືນມູນເຊື້ອຂອງສື່ມວນຊົນລາວ ທີ່ຈະໝູນວຽນມາ ຄົບຮອບ 74 ປີ ວັນທີ 13 ສິງຫາ 1950 -13 ສິງຫາ 2024, ເພື່ອໃຫ້ສື່ມວນຊົນຂອງແຂວງຮັບຮູ້ເຂົ້າໃຈ ແລະ ເສີມຂະຫຍາຍມູນເຊື້ອອັນດີເລີດຂອງສື່ມວນຊົນລາວຮຸ່ນກ່ອນມາໝູນໃຊ້. ສືບຕໍ່ເພີ່ມທະວີປະຕິບັດໜ້າທີ່ຄວາມຮັບຊອບຂອງຕົນໃຫ້ສູງຂຶ້ນ ຕາມທີ່ພັກ ລັດ ແລະປະຊາຊົນມອບໝາຍໃຫ້.ຈາກນີ້ກໍເນັ້ນໃຫ້ເອົາໃຈໃສ່ຫຼາຍບັນຫາ ເພື່ອພັດທະນາໃນຕໍ່ໜ້າ.
ພິເສດໂອກາດພົບປະຢ້ຽມຢາມ ຄະນະນຳ ແລະ ສື່ມວນຊົນແຂວງ ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ ຍັງໄດ້ມອບເງິນ 221 ລ້ານກ່ວາກີບ ເເລະ ຄອມພິວເຕີ ໂນດບຸກ 1 ຊຸດ ໃຫ້ ສື່ມວນຊົນ ວິທະຍຸ, ໂທລະພາບ ແລະ ໜັງສືພິມ ພະແນກ ຖວທ ແຂວງ ເພື່ອນຳໃຊ້ເຂົ້າໃນການປັບຸງພື້ນກຖານເຕັກນິກ, ພາຫະນະສື່ມວນຊົນ ໃຫ້ມີຄວາມສະດວກ ວ່ອງໄວ ທັນສະໄໝ ຕອບສະໜອງໄດ້ກັບຄວາມຮຽກຮ້ອງຕ້ອງການຂອງພັກໃນລຍະໃໝ່.
Cr: ເກດສະໜາ ແກ້ວສຸວັນນະແສງ
