ວັນທີ 9 ສິງຫາ 2024, ທ່ານ ອາລຸນໄຊ ສຸນນະລາດ ເຈົ້າແຂວງຈໍາປາສັກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ເຮັດວຽກຢູ່ ເມືອງມຸນລະປາໂມກ ໂດຍມີ ທ່ານ ວັນນະສັກ ຊາດຕະກຸນ ເຈົ້າເມືອງມຸນລະປະໂມກ ພ້ອມດ້ວຍຄະນະພັກ-ຄະນະນໍາຂອງເມືອງໃຫ້ການຕ້ອນຮັບ ແລະ ລາຍງານກ່ຽວກັບທີ່ຕັ້ງ,ຈຸດພິເສດ ແລະ ທ່າແຮງການພັດທະາເສດຖະກິດ -ສັງຄົມຂອງເມືອງ ໃຫ້ຮັບຊາບ.
ເມືອງມຸນລະປາໂມກມີ ທ່າແຮງທາງດາ້ນການຜະລິດກະສິກຳ, ການຜະລິດສິນຄ້າ ເຊິ່ງໄດ້ຮັບການຮັບຮອງເປັນ ສິນຄ້າ ODOP ຈໍານວນ 3 ກຸ່ມ: ກຸ່ມຫັດຖະກຳຈັກສານຫວາຍ, ກຸ່ມຈັກສານສາດເຕີຍ, ເສັ້ນເຟີ ແລະ ແຜ່ນແໜມ, ປັບປຸງການກະກຽມຂະຫຍາຍຕະຫຼາດສອງແຫ່ງ, ການປູກພືດ ອຸດສາຫະກຳ ແລະ ອື່ນໆ ຜ່າມາຍັງໄດ້ສໍາເລັດການສ້ອມແປງ-ກໍ່ສ້າງເສັ້ນທາງ, ການດຳເນີນໂຄງການກໍ່ສ້າງຫໍຫຼັກເມືອງ, ສະພາບການຈັດຕັ້ງປະຕິບັດວຽກງານວຽກກໍ່ສ້າງຮາກຖານ, ການເມືອງ-ພັດທະນາຊົນນະບົດ ໃນໄລຍະ 6 ເດືອນ ຕົ້ນປີ 2024.
ໃນໂອກາດດຽວກັນນີ້, ເຈົ້າແຂວງຈໍາປາສັກ ກໍ່ໄດ້ສະແດງຄວາມເປັນຫ່ວງເປັນໄຍ ພ້ອມທັງໃຫ້ທິດຊີ້ນໍາ ຕໍ່ກັບບັນຫາທ້າທາຍ ຂໍ້ຫຍຸ້ງຍາກ ໂດຍສະເພາະ ພື້ນຖານໂຄງລ່າງ, ລະບົບຊົນລະປະທານ, ການຄຸ້ມຄອງການເຂົ້າ-ອອກ , ສະເໜີໃຫ້ ຄະນະພັກ-ຄະນະນໍາແຕ່ລະຂັ້ນ ຈົ່ງພ້ອມກັນເອົາໃຈໃສ່ໃນການວາງ ແບບແຜນການນໍາພາ ໂດຍສະເພາະການນໍາພາແນວຄິດ ໃຫ້ພະນັກງານ ສະມາຊິກພັກ ພະນັກງານຖັນແຖວ ກຳລັງປ້ອງກັນຊາດ-ປ້ອງກັນຄວາມສະຫງົບ ພໍ່ແມ່ປະຊາຊົນ ສອດຄ່ອງກັບສະພາບຕົວຈິງ ໃນໄລຍະໃໝ່, ຮັບປະກັນວຽກງານຄວາມໝັ້ນຄົງ ໂດຍສະເພາະວຽກງານຊາຍແດນ ເພີ່ມມິດຫຼຸດຜ່ອນສັດຕູ ໄປມາຫາສູ່ ການແລກປ່ຽນເປັນຊາຍແດນພັດທະນາ, ກຳລັງປ້ອງກັນຊາດ ປ້ອງກັນຄວາມສະຫງົບ ຮັບປະກັນການດຳລົງຊີວິດຂອງປະຊາຊົນ, ສືບຕໍ່ການຜະລິດ ເພື່ອກຸ້ມຕົນເອງ ສາມາດຄົງຕົວໄດ້, ຂະຫຍາຍຖານສິນຄ້າໄດ້ ແລະ ແຂ່ງຂັນໄດ້, ໂດຍມີການຈັດສັນເນື້ອທີ່ທໍາການຜະລິດ ການບໍລິການ ແລະ ເຂດອຸດສາຫະກຳ, ສືບຕໍ່ການຜະລິດກະສິກຳ ທີ່ຕິດພັນກັບການປຸ່ງແຕ່ງ ເຮັດໃຫ້ເກີດມູນຄ່າເພີ່ມ, ມີການຜະລິດ, ການຈ້າງງານ ແລະ ມີຕະຫຼາດຮອງຮັບ ກາຍເປັນທຶນໝຸນວຽນພາຍໃນຕາມທິດ ແຜນເສດຖະກິດເອກະລາດ ເປັນເຈົ້າຕົນເອງ. ສ້າງການຫັນປ່ຽນໃໝ່ທີ່ແຂງແຮງ ວຽກງານວິຊາສະເພາະຂອງໂຕເອງ ໃຫ້ມີບາດກ້າວໃໝ່ ມີການຫັນປ່ຽນທີ່ດີຂຶ້ນ ເພື່ອກະກຽມໃຫ້ແກ່ກອງປະຊຸມໃຫ່ຍສາມຂັ້ນຂອງພັກ.
ໃນການເຄື່ອນໄຫວຄັ້ງນີ້, ທ່ານ ເຈົ້າແຂວງຈໍາປາສັກ ພ້ອມຄະນະ ໄດ້ຢ້ຽມຢາມ ເຂດການຜະລິດຂອງກຸ່ມຜະລິດເຂົ້າຈ້າວ ຂອງຄອບຄົວຕົງ ແລະການປູກເຂົ້າ ບ້ານສະພັງເໜືອ, ກຸ່ມຜະລິດເສັ້ນເຝີ ແລະ ແຜ່ນແໜມ, ເຂດການຜະລິດເຂົ້າບ້ານປ່າໂມກ ຂອງບໍລິສັດ ກໍ່ສ້າງຂົວ-ທາງ ແລະ ຕິດຕັ້ງໄຟຟ້າຄົບວົງຈອນໄຊສົມບູນ,ສວນປູກໄມ້ ສີພັນດອນພັດທະນາ, ສວນປູກໄມ້ ບໍລິສັດຊັນເປເປີ້, ໂຮງງານບໍລິສັດ ສີພັນດອນລາດລາວ, ສວນກ້າເບ້ຍໄມ້ຊັນເປເປີ້ ນໍາອີກດ້ວຍ.
Cr: ພູທິບສະຫວັນ
