ໃນວັນທີ 19 ສິງຫາ 2024 ທີ່ຫ້ອງວ່າການແຂວງຈໍາປາສັກ, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມຄະນະ ໄດ້ຕ້ອນຮັບ ຄະນະການນຳແຂວງຫູເປີຍ ເຊິ່ງນຳໂດຍ ທ່ານ ນາງ ຫວາງຫົງຫຼິງ ຮອງປະທານ ສະພາທີ່ປຶກສາການເມືອງແຂວງ ຫູເປີຍ ສປ. ຈີນ ໃນໂອກາດມາເຄື່ອນໄຫວ ວຽກງານຢູ່ທີ່ແຂວງຈໍາປາສັກ
ໂອກາດນີ້, ທ່ານ ອາລຸນໄຊ ສຸນນະລາດ ໄດ້ສະແດງການ ຕ້ອນຮັບ ພ້ອມທັງ, ຕີລາສູງຕໍ່ເຄື່ອນໄຫວເຮັດວຽກຂອງຄະນະ ໃນເທື່ອນີ້ ແລະໄດ້ກ່າວ ໃຫ້ເຫັນເຖິງທ່າແຮງຂອງແຂວງ, ທີ່ຕັ້ງທີ່ເປັນຍຸດທະສາດຂອງແຂວງ ທາງດ້ານການເມືອງ-ເສດຖະກິດ, ເປັນສູນກາງຂອງແຂວງພາກໃຕ້ ແລະ ເຊື່ອມຈອດກັບບັນດາປະເທດຕ່າງໆ, ເປັນຈຸດແລວທາງເຊື່ອມຕໍ່ຕອນໃຕ້ ໜື່ງເສັ້ນທາງ ໜື່ງແລວທາງຂອງ ສປ.ຈີນ, ໂລຈິດສະຕິກ ການຂົນສົ່ງເນື່ອງຈາກມີທີ່ຕັ້ງແລວທາງທາງເສດຖະກິດຕາເວັນອອກຕາເວັນຕົກ, ເປັນຈຸດໃຈກາງ ສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ, ມີປັດໃຈການການຜະລິດ ແລະ ສົ່ງເສີມ ພະລັງງານສະອາດ.
ນອກນັ້ນ ຍັງມີແຫຼ່ງທ່ອງທ່ຽວຫຼາຍຮູບແບບ, ເປັນແຂວງທີ່ມີປັດໃຈ ໃນການຜະລິດ ກະສິກໍາ ການປູກພືດທີ່ເປັນສິນຄ້າທີ່ມີຄຸນນະພາບ ໂດຍສະເພາະແມ່ນ ກາເຟ, ຊາ, ໝາກຖົ່ວລຽນ ໃນເຂດເມືອງບາຈຽງ ແລະ ເຂດພູພຽງບໍລະເວນ.
ໃນການພົບປະຄັ້ງນີ້, ທ່ານ ນາງ ຫວາງຫົງຫຼິງ ໄດ້ສະແດງຄວາມຂອບໃຈ ຕໍ່ການຕ້ອນຮັບ ອັນອົບອຸ່ນ ພ້ອມກ່າວໃຫ້ຮູ້ຈຸດປະສົງໃນການມາເຄື່ອນໄຫວວຽກງານຄັ້ງນີ້, ເພື່ອຊຸກຍູ້ການຮ່ວມມື ລະຫວ່າງລາວ-ຈີນ ຈີນ-ລາວ ຮ່ວມຊາຕາກຳ ໃຫ້ມີການພັດທະນາ ຂື້ນເທື່ອລະກ້າວ ໃນອະນາຄົດ, ນອກນັ້ນ, ໄດ້ກ່າວໃຫ້ຮູ້ເຖິງທີ່ ຕັ້ງພູມສັນຖານຂອງ ແຂວງຫູເປີຍ ເປັນສູນກາງຫຼັກທາງການຂົນສົ່ງ, ການເມືອງ ວັດທະນະທຳ ແລະ ເປັນແຂວງເສດຖະກິດໃນພາກກາງຂອງປະເທດຈີນ, ມີການຄົມມະນາຄົມ-ຂົນສົ່ງ ໃນຫຼາຍຮູບແບບ, ເປັນແຂວງອຸດສາຫະກຳ, ມີເທັກໂນໂລຢີທາງດ້ານສາທາລະນະ ສຸກ, ມີທ່າແຮງ ທາງດ້ານກະສິກຳ, ການທ່ອງທ່ຽວລະດັບຊາດ.
ສອງຝ່າຍ, ຕີລາຄາສູງຕໍ່ການພົບປະໃນຄັ້ງນີ້, ເພື່ອຊຸກຍູ້ການ ຮ່ວມມື ລະຫວ່າງສອງຝ່າຍ, ແລະ ສິ່ງທີ່ສໍາຄັນ ກໍ່ຄື ການສ້າງເສັ້ນທາງເສດຖະກິດລະຫວ່າງລາວ-ຈີນ ຈີນ-ລາວ, ຊຸກຍູ້ການສົ່ງ ອອກຜະລິດຕະພັນ ກະສິກຳຂອງລາວ ສູ່ຈີນ ກໍ່ຄືແຂວງ ຫູເປີຍ, ການແລກປ່ຽນຄວາມຮູ້ ດ້ານກະສິກຳທັນສະໄໝ, ການລົງທຶນດ້ານກະສິກຳປຸງແຕ່ງ, ວັດທະນະທຳ ແລະ ການທ່ອງທ່ຽວ ເຮັດໃຫ້ມີການໄປມາຫາສູ່ເພື່ອການຮ່ວມມື ເທື່ອລະກ້າວ.
——————
ທີ່ມາ: ສື່ມວນຊົນແຂວງຈຳປາສັກ
