ໃນລະຫວ່າງວັນທີ 21 – 23 ພຶດສະພາ 2024,ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມຄະນະນໍາ ໄດ້ເຄື່ອນໄຫວເຮັດວຽກຢູ່ນະຄອນຊົງຊິງ ສປ ຈີນ ເພື່ອເຂົ້າຮ່ວມກອງປະຊຸມສາກົນການຮ່ວມມື ເມືອງມິດຕະພາບຂອງນະຄອນຊົງຊິງ ປີ 2024 ເຊິ່ງມີ ເມືອງ ແລະ ນະຄອນທີ່ໄດ້ເຊັນບົດບັນທຶກການຮ່ວມມືຈາກ 30 ປະເທດ ປະກອບມີ 48 ນະຄອນ ແລະ ແຂວງໃນ 5 ທະວີບເຂົ້າຮ່ວມ.
ໃນກອງປະຊຸມຄັ້ງນີ້ ທ່ານ ອາລຸນໄຊ ສູນນະລາດ ຍັງໄດ້ເປັນຫົວໜ້ານໍາພາຄະນະຜູ້ແທນຈາກ 30 ປະເທດ ປະກອບມີ 48 ນະຄອນ ເຂົ້າຢ້ຽມຂໍ່ານັບ ທ່ານ ຢວນ ເຈຍ ຈຸນ ກໍາມະການກົມການເມືອງສູນກາງພັກ ຄອມມູນິດຈີນ ເລຂາຄະນະບໍລິຫານງານພັກນະຄອນຊົງຊິງ ສປ ຈີນ ເຊິ່ງທ່ານ ອາລຸນໄຊ ສູນນະລາດ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະ ການຕ້ອນຮັບຢ່າງອົບອຸ່ນຈາກການນໍາຂອງນະຄອນຊົງຊິງໃນຄັ້ງນີ້. ພ້ອມທັງຕີລາຄາສູງຕໍ່ຜົນສໍາເລັດໃນການນໍາພາພັດທະນາເສດຖະກິດ – ສັງຄົມຂອງ ສປ ຈີນ ໂດຍສະເພາະແມ່ນນະຄອນຊົງຊິງ ທີ່ເປັນສູນກາງທາງດ້ານເສດຖະກິດຂອງປະເທດ ໃນພາກຕາເວັນຕົກ ແລະ ຈຸດຍຸດທະສາດຂອງການຄົມມະນາຄົມ – ຂົນສົ່ງສິນຄ້າຕາມນະໂຍບາຍໜຶ່ງແລວໜຶ່ງເສັ້ນທາງ ຈາກປະເທດຈີນ ໄປຫາທະວີບເອີຣົບ. ກອງປະຊຸມສາກົນເມືອງມິດຕະພາບຄັ້ງນີ້ ໄດ້ກຳນົດເອົາການພັດທະນາຕາມທິດສີຂຽວ ແລະ ຍືນຍົງ ທີ່ນະຄອນຊົງຊິງ ໄດ້ເປັນຕົວແບບທີ່ພົ້ນເດັ່ນໃນການພັດທະນາ ແລະ ສອດຄ່ອງກັບທ່າອ່ຽງພັດທະນາຂອງທົ່ວໂລກໃນປະຈຸບັນ
ໃນໄລຍະເຄື່ອນໄຫວເຮັດວຽກຄັ້ງນີ້, ທ່ານ ອາລຸນໄຊ ສູນນະລາດ ແລະ ຄະນະນໍາແຂວງຈໍາປາສັກ ຍັງໄດ້ເຂົ້າຮ່ວມກອງປະຊຸມປິ່ນອ້ອມຕ່າງໆ ໂດຍສະເພາະແມ່ນກອງປະຊຸມສົ່ງເສີມການຄ້າ ແລະ ການລົງທຶນ ພາກຕະເວັນຕົກຂອງ ສປ ຈີນ, ກອງປະຊຸມພົບປະພາກທຸລະກິດ ຈາກບັນດາປະເທດຕ່າງໆ ແລະ.ງານວາງສະແດງສິນຄ້າສາກົນນະຄອນຊົງຊິງ. ພ້ອມນັ້ນ ຍັງໄດ້ເຄື່ອນໄຫວຢ້ຽມຢາມໂຮງງານຜະລິດລົດ ທີ່ເປັນຖານເສດຖະກິດດ້ານອຸດສະຫະກໍາຂອງນະຄອນຊົງຊິງ ເປັນການຜັນຂະຫຍາຍບົດບັນທຶກການຮ່ວມມື ລະຫວ່າງ ແຂວງຈໍາປາສັກ ແລະ ນະຄອນຊົງຊົງ ນັ້ນ ກໍໄດ້ບົດບັນທຶກຄວາມເຂົ້າໃຈ ວ່າດ້ວຍການສຶກສາສໍາຫຼວດຄວາມເປັນໄປໄດ້ ໃນການລົງທຶນພັດທະນາສວນກະສິກຳ ສາກົນຈີນ – ລາວ ເພື່ອປຸກຫົວກະບຸກ ເນື້ອທີ່ດິນ ຈໍານວນ 150 ເຮັກຕາຢູ່ເຂດເມືອງປາກຊ່ອງ, ຕາງໜ້າແຂວງຈໍາປາສັກ ລົງນາມໂດຍ ທ່ານ ປອ.ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງຈໍາປາສັກ ແລະ ທ່ານ ນາງ Tang YuLan ປະທານບໍລິສັດ Chongqing SinoKonjac Biotechnology CO, Ltd.
ສໍາລັບແຂວງຈໍາປາສັກ ສປປ ລາວ ແລະ ນະຄອນຊົງຊິງ ສປ ຈີນ ໄດ້ເຊັນບົດບັນທຶກສ້າງຕັ້ງການຮ່ວມມື ແລະ ເປັນເມືອງມິດຕະພາບ ໃນປີ 2023 ເປັນຕົ້ນມາ
ຂ່າວ: ທູນທອງໃຈ
