ໃນມໍ່ໆນີ້, ທີ່ດ່ານສາກົ້ນໜອງນົກຂຽນ ເມືອງໂຂງ ແຂວງຈຳປາສັກ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ໂອ້ລົມເຈົ້າໜ້າທີ່, ພະນັກງານ ຂອງຄະນະຄຸ້ມຄອງດ່ານສາກົນໜອງນົກຂຽນ ໂດຍມີພາກສ່ວນທີ່ກ່ຽວຂ້ອງ ຈາກແຂວງ ແລະ ເມືອງໂຂງເຂົ້າຮ່ວມ.
ໂອກາດນີ້, ທ່ານ ພັນໂທ ສຸລິເດດ ວົງສັກເມືອງ ຫົວໜ້າຄະນະຄຸ້ມຄອງດ່ານສາກົນໜອງນົກຂຽນ ໄດ້ລາຍງານສະພາບການເຄື່ອນໄຫວວຽກງານຄຸ້ມຄອງດ່ານ ປະຈໍາເດືອນ 5/2021 ວ່າ: ແຜນຈັດເກັບລາຍຮັບເຂົ້າງົບປະມານພາສີ-ອາກອນ, ວີຊາ, ແຜນປີ 1 ຕື້ 200 ລ້ານກີບ, ການຈັດຕັ້ງປະຕິບັດເກັບລາຍຮັບໃນໄລຍະ 5 ເດືອນ ປະຕິບັດໄດ້ທັງໝົດ 1 ຕື້ 473 ລ້ານກວ່າກີບ ທຽບໃສ່ແຜນປີ 122,76%. ເຮັດໜ້າທີ່ກວດກາຄົນເຂົ້າ – ອອກເມືອງໃນ 1 ເດືອນຜ່ານມາ ມີ 15 ຄົນ, ໄດ້ກວດກາສິນຄ້າຜ່ານແດນແຕ່ລະປະເພດເຊັ່ນ: ເຄື່ອງສິນຄ້າ, ພາຫະນະເຂົ້າ – ອອກ ແລະ ເກັບເງິນ ພາສີ ອາກອນຄ່າທໍານຽມຕ່າງໆ ໄດ້ຈໍານວນທັງໝົດ 380 ລ້ານກວ່າກີບ.
ໂອກາດດັ່ງກ່າວ, ທ່ານເຈົ້າແຂວງຈຳປາສັກ ໄດ້ຕີລາຄາລູງຕໍ່ຜົນສຳເລັດຂອງຄະນະຄຸ້ມຄອງດ່ານສາກົນໜອງນົກຂຽນ ທີ່ຍາດມາໄດ້ໃນໄລຍະຜ່ານມາ ແລະ ສືບຕໍ່ຊີ້ນຳວຽກງານການເມືອງ-ແນວຄິດ ໃຫ້ສູງຂຶ້ນກວ່າເກົ່າ. ຮັບປະກັນວຽກງານວິຊາສະເພາະ ແລະ ຊີວິດການເປັນຢູ່ ໂດຍຖືເອົາຫ້ອງການຄຸ້ມຄອງດ່ານເປັນຈຸດໃຈກາງໃນການນໍາພາຊຸກຍູ້ການເຄື່ອນໄຫວປະຕິບັດໜ້າທີ່ຂອງແຕ່ລະໜ່ວຍງານ ແລະ ມີການປະສານສົມທົບກັບສາຍຕັ້ງທີ່ກ່ຽວຂ້ອງຢ່າງປົກກະຕິ. ເອົາໃຈໃສ່ຜັນຂະຫຍາຍມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະ ນະ ພັກແຂວງຈຳປາສັກ ໃຫ້ເລິກຊຶ່ງ ກຳແໜ້ນແຜນພັດທະນາ ເສດຖະ ກິດ- ສັງຄົມແຫ່ງຊາດ, ແຜນພັດທະນາ ເສດຖະກິດ-ສັງຄົມ ຄັ້ງທີ 9 ຂອງແຂວງ ແລະ ເມືອງ.
(ຂ່າວ-ພາບ: ທັດຊະນະ)
Loading...