ທ່ານ ຄໍາຜອຍ ວັນນະສານ ເຈົ້າແຂວງໆຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ ແລະ ຂັ້ນເມືອງ ລົງຕິດຕາມຊຸກຍູ້ການຜະລິດ ໂຮງງານປຸງແຕ່ງຊາ ຍອດຊາ ສັນພູມົງເຈົາ ຢູ່ເມືອງຜົ້ງສາລີ ໃນວັນທີ 21 ພຶດສະພາ 2024 ໂດຍການຕ້ອນຮັບຂອງທ່ານ ວັນໄຊ ແສນຍອດ ເຈົ້າເມືອງໆຜົ້ງສາລີ ພ້ອມດ້ວຍຄະນະ.
ທ່ານ ບຸນໄຊ ຫັດສະພອນ ເຈົ້າຂອງໂຮງງານປຸງແຕ່ງຊາ ຍອດຊາສັນພູມົງເຈົາ ໄດ້ລາຍງານວ່າ: ເມືອງຜົ້ງສາລີ ເປັນເມືອງໜຶ່ງທີ່ມີປະຊາຊົນເຮັດອາຊີບໃນການປູກຝັງ ເປັນຕົ້ນ ປູກຊາ ເຊິ່ງເປັນອາຊີບຄົງທີ່ ແລະ ໜັ້ນຄົງຂອງປະຊາຊົນ ສະນັ້ນຈຶ່ງມີຄວາມສົນໃຈ ແລະ ໄດ້ຕັດສິນໃຈສ້າງຕັ້ງໂຮງງານປຸງແຕ່ງຊາ ຍອດຊາສັນພູມົງເຈົາຂຶ້ນ ໃນປີ 2017 ພາຍໃນຄອບຄົວມີຈຳນວນສະມາຊິກທັງໝົດ 4 ຄົນ, ໄດ້ນຳໃຊ້ຕົ້ນທຶນຂອງຕົນເອງ 100%, ເຊິ່ງໃນໄລຍະນັ້ນໄດ້ເຮັດ ເປັນລັກສະນະເຕົາຂົ້ວຊາທົ່ວໄປ ແລະ ໃນເບື້ອງຕົ້ນ ມີທຶນໜູນວຽນໃນ 150 ລ້ານກີບ ໃນນີ້, ໄດ້ເອົາເງິນທີ່ມີໄປຊື້-ຂາຍຊາເປັນປົກກະຕິ ມາຮອດປີ 2020 ຈຶ່ງໄດ້ສ້າງໂຮງງານປຸງແຕ່ງຊາ ຍອດຊາສັນພູມົງເຈົາ ແລະ ໄດ້ລົງທຶນສົ່ງເສີມປະຊາຊົນ ບ້ານກໍແດງ ປູກ ແລະ ເກັບຊື້ຊາຈຳນວນ 25 ຄອບຄົວ, ການເກັບຊື້ໃນລາຄາ 7.000 ກີບຫາ 23.000 ກີບ ໂດຍອີງໃສ່ລະດູການຂອງແຕ່ລະໄລຍະ, ສະເລ່ຍມື້ໜຶ່ງສາມາດເກັບຊື້ໄດ້ 650 ກິໂລຕໍ່ມື້ ແລະ ສາມາດຜະລິດຊາແຫ້ງໄດ້ 162 ກິໂລຕໍ່ມື້, ເຊິ່ງໄດ້ສົ່ງອອກໃນລາຄາຊາແຫ້ງໂລລະ 50 – 100.000 ກີບຕໍ່ກິໂລ ຕະຫລາດສົ່ງອອກຫລັກໆແມ່ນ ສປ ຈີນ. ນອກຈາກນີ້, ທາງໂຮງງານຍັງ ໄດ້ຜະລິດລັກສະນະ ຫຸ້ມຫໍ່ສໍາເລັດຮູບ ແລະ ສິນຄ້າແບບຫັດຖະກໍາພື້ນເມືອງເປັນສ່ວນຫລາຍ ເພື່ອນຳໄປວາງສະແດງ ຫລື ຈຳໜ່າຍຢູ່ພາຍໃນ ແລະ ຕ່າງປະເທດຕື່ມອີກ. ສະເລ່ຍເດືອນໜຶ່ງສາມາດສ້າງລາຍຮັບ ໄດ້ປະມານ 18 ລ້ານກີບ ແລະ 200 ລ້ານກວ່າກີບຕໍ່ປີ.
ທ່ານ ບຸນໄຊ ຫັດສະພອນ ຍັງໄດ້ສະເໜີໃຫ້ພາກສ່ວນທີ່ກ່ຽວຂ້ອງຂັ້ນເມືອງ, ຂັ້ນແຂວງຊ່ວຍດ້ານການຝືກອົບຮົມ ໃນການບຳລຸງຮັກສາຕົ້ນຊາຂອງປະຊາຊົນ, ຊ່ວຍຊອກແຫລ່ງທຶນໃຫ້ກັບໂຮງງານ, ຊອກຕະຫລາດທີ່ໜັ້ນຄົງ ແລະ ຖາວອນ ມີລາຄາທີ່ສົມເຫດສົມຜົນ ເພື່ອແນ່ໃສ່ເຮັດໃຫ້ປະຊາຊົນມີວຽກເຮັດງານທຳ ແລະ ມີຊີວິດທີ່ດີຂຶ້ນ.
ໂອກາດນີ້, ທ່ານ ຄໍາຜອຍ ວັນນະສານ ໄດ້ສະແດງຄວາມຊົມເຊີຍ ຕໍ່ໂຮງງານປຸງແຕ່ງຊາ ຍອດຊາສັນພູມົງເຈົາ ທີ່ມີຄວາມຕັດສິນໃຈໃນການດຳເນີນທຸລະກິດທີ່ຕິດພັນກັບປະຊາຊົນ ສາມາດສ້າງລາຍຮັບເຂົ້າຄອບຄົວ, ທັງເປັນການສົ່ງເສີມການຜະລິດພາຍໃນ, ສ້າງວຽກເຮັດງານທຳ ເຮັດໃຫ້ປະຊາຊົນມີອາຊີບທີ່ໝັ້ນຄົງ, ພ້ອມທັງໄດ້ເນັ້ນໃຫ້ອົງການປົກຄອງເມືອງ ໃຫ້ຄວາມໃກ້ຊິດ ແລະ ອໍານວຍຄວາມສະດວກທາງດ້ານຕ່າງໆ, ສືບຕໍ່ປະຕິບັດຕາມແນວທາງຂອງພັກ-ລັດວາງອອກ ໂດຍການຮັກສາອາຊີບທີ່ມີຢູ່ແລ້ວ ແລະ ສືບຕໍ່ເພີ່ມອາຊີບທີ່ເຫັນວ່າຍັງມີທ່າແຮງຕື່ມ, ສືບຕໍ່ຊອກຕະຫລາດທາງສື່ອອນລາຍ ເພື່ອຈຳໜ່າຍຊາ ໃຫ້ໄດ້ຫລາຍກວ່າເກົ່າ.
ຂ່າວ-ພາບ: ແສງຄຳ ສາລີວັນ
