ໃນວັນທີ 14 ສິງຫານີ້, ທ່ານ ນາງ ຢາງ ມິ ຄິມ ຫົວໜ້າອົງການອາຫານ ແລະ ການກະເສດ ປະຈຳ ສປປ ລາວ ໄດ້ເຂົ້າຢ້ຽມຂໍ່ານັບທ່ານບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ທີ່ຫ້ອງປະຊຸມຂອງຫ້ອງວ່າການປົກຄອງແຂວງ ໃນໂອກາດທີ່ທ່ານໄດ້ລົງມາເຄື່ອນໄຫວວຽກງານຢູ່ແຂວງສະຫວັນນະເຂດ.
ຫຼັງຈາກນັ້ນ, ທ່ານ ນາງ ຢາງ ມິ ຄິມ ໄດ້ແຈ້ງຈຸດປະສົງໃນການມາເຮັດຽກຢູ່ແຂວງສະຫວັນນະເຂດໃຫ້ທ່ານເຈົ້າແຂວງໄດ້ຮັບຊາບ, ຈາກນັ້ນ ທ່ານເຈົ້າແຂວງສະຫວັນນະເຂດ ກໍໄດ້ລາຍງານໃຫ້ທ່ານຫົວໜ້າອົງການອາຫານ ແລະ ການກະເສດ ປະຈຳ ສປປ ລາວໄດ້ຮັບຊາບກ່ຽວກັບສະພາບຈຸດພິເສດ ແລະ ທີ່ຕັ້ງຂອງແຂວງສະຫວັນນະເຂດ ຊຶ່ງເປັນແຂວງທີ່ມີເນື້ອທີ່ກວ້າງຂວາງ, ໃນນີ້ທົ່ວແຂວງ ມີເນື້ອທີ່ການກະເສດ ປະມານ 651.000 ກວ່າເຮັກຕາ, ມີເນື້ອທີ່ນາ 210.000 ກວ່າເຮັກຕາ, ເນື້ອທີ່ປູກພືດໄລຍະສັ້ນ 300.000 ກວ່າເຮັກຕາ, ພືດອຸດສາຫະກຳເກືອບ 200.000 ເຮັກຕາ ຊຶ່ງເປັນທ່າແຮງໃຫ້ແກ່ການພັດທະນາເສດຖະກິດຂອງແຂວງ, ພ້ອມນັ້ນ ແຂວງສະຫວັນນະເຂດກໍມີທ່າແຮງທາງດ້ານທີ່ຕັ້ງ ທີ່ເອື້ອອຳນວຍໃຫ້ແກ່ການລົງທຶນທັງພາຍໃນ ແລະ ຕ່າງປະເທດ ເພາະວ່າແຂວງສະຫວັນນະເຂດນອນໃນແລວທາງເສດຖະກິດຕາເວັນອອກ-ຕາເວັນຕົກ, ມີດ່ານສາກົນເບື້ອງຕາເວັນອອກຕິດກັບ ສສ ຫວຽດນາມ ແລະ ເບື້ອງຕາເວັນຕົກຕິດກັບປະເທດໄທ. ລາຍໄດ້ຂອງປະຊາຊົນສ່ວນໃຫຍ່ແມ່ນມາຈາກການຜະລິດກະສິກຳເປັນຫຼັກ, ສະເພາະຜົນຜະລິດເຂົ້າທົ່ວແຂວງ ໄດ້ປະມານ 850.000 ໂຕນຕໍ່ປີ, ຜົນຜະລິດມັນຕົ້ນປະມານ 600.000 ໂຕນຕໍ່ປີ, ອ້ອຍ 1 ລ້ານກວ່າໂຕນຕໍ່ປີ ແລະ ກ້ວຍ 300.000 ໂຕນຕໍ່ປີ, ນອກນັ້ນ ແຂວງສະຫວັນນະເຂດ ຍັງມີໂຄງການລົງທຶນຂະໜາດໃຫຍ່ ເຊັ່ນ: ໂຮງງານຜະລິດເຈ້ຍທີ່ໃຫຍ່ລະດັບໂລກ ຄືໂຮງານຊັນເປເປີຜະລິດເຈ້ຍຄົບວົງຈອນ ທີ່ມີກຳລັງການຜະລິດ 1,5 ລ້ານໂຕນຕໍ່ປີ.
ໃນໂອກາດນີ້, ທັງທ່ານເຈົ້າແຂວງສະຫວັນນະເຂດ ບຸນໂຈມ ອຸບົນປະເສີດ ແລະ ທ່ານ ນາງ ຢາງ ມິ ຄິມ ກໍໄດ້ສົນທະນາຫຼາຍບັນຫາຮ່ວມກັນ ໂດຍບັນຫາຕົ້ນຕໍແມ່ນການສະໜອງອາຫານ ແລະ ພືດພັນທາງດ້ານການກະສິກຳ ເພື່ອຮັບໃຊ້ພາຍໃນແຂວງສະຫວັນນະເຂດ ໃຫ້ພຽງພໍ ຊຶ່ງທ່ານເຈົ້າແຂວງກໍໝັ້ນໃຈວ່າອົງການອາຫານ ແລະ ການກະເສດ ຈະມີສ່ວນຮ່ວມສຳຄັນ ໃນການເຮັດໃຫ້ແຂວງສະຫວັນນະເຂດ ກາຍເປັນແຂວງທີ່ມີຄວາມເຂັ້ມແຂງທາງດ້ານການຜະລິດສະບຽງອາຫານ ສຳລັບຮັບໃຊ້ພາຍໃນແຂວງ ແລະ ສົ່ງອອກຂາຍເປັນສິນຄ້າເພີ່ມຂຶ້ນເລື້ອຍໆ.
ຂ່າວ: ສະຫວັນນະເຂດ
