ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຈົ້າແຂວງສະຫວັນນະເຂດ ລົງເຄື່ອນໄຫວຕິດຕາມ ການກັກກັນ ຜູ້ທີ່ເດີນທາງມາແຕ່ປະເທດ ທີ່ມີຄວາມສຽງຈາກພະຍາດໂຄວິດ-19 ຢູ່ ເມືອງພີນ ແລະເມືອງເຊໂປນ

ໃນວັນທີ 4 ເມສາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ພ້ອມດ້ວຍ ດ໋ອກເຕີ ບົງສຸວັນ ພັນທະວົງສາ ຫົວໜ້າພະແນກສາລະນະສຸກແຂວງ, ທ່ານ ພັອ ສົມໝາຍ ພົມມະຈັນ ຫົວໜ້າ ປກສ ແຂວງ, ໄດ້ລົງຢ້ຽມຢາມຕິດຕາມສູນກັກກັນ ຂອງແຮງງານລາວ ທີ່ມາຈາກປະເທດກຸ່ມສ່ຽງ ແລະມາຈາກນະຄອນຫຼວງວຽງຈັນ. ຢູ່ເມືອງພີນ ແລະເມືອງເຊໂປນ. ກ່ອນອື່ນ ທ່ານເຈົ້າແຂວງ ພ້ອມດ້ວຍຄະນະ ໄດ້ລົງຢ້ຽມຢາມສູນກັກກັນ ມ.ສ ພີນ.

ໂອກາດນີ້ ທ່ານ ສາລີ ວິນລາວັນ ເຈົ້າເມືອງໆ ພີນ ພ້ອມດ້ວຍຄະນະສະເພາະກິດ ທີ່ຕິດຕາມຢູ່ສູນດັ່ງກ່າວ ໄດ້ລາຍງານໃຫ້ຮູ້ວ່າ: ສູນກັກກັນແຫ່ງນີ້ ແມ່ນໄດ້ເປີດຮັບແຮງງານ ທີ່ກັບມາຈາກຕ່າງປະເທດ ຕັ້ງແຕ່ວັນທີ 24 ມີນາ ເຖິງປັດຈຸບັນ, ມີຈຳນວນພົນທີ່ກັກກັນທັງໝົດ 861 ຄົນ, ຍິງ 491 ຄົນ, ມີຕ່າງປະເທດ 4 ຄົນ, ຍິງ 1 ຄົນ, ໃນນັ້ນ ມີຄົນຫວຽດນາມ 3 ຄົນ, ຍິງ 1 ຄົນ, ຄົນໄທ 1 ຄົນ, ໄດ້ແບ່ງເປັນ 13 ສູນ, ສູນທີ່ໃຫຍ່ ແມ່ນສູນ ມ/ສ ພີນ ມີຈຳນວນພົນ 118 ຄົນ, ຍິງ 63 ຄົນ, ສູນແຫ່ງນີ້ ແມ່ນຍັງມີຄວາມແອອັດ ເພາະຈຳນວນພົນຫຼາຍເກີນໄປ, ດັ່ງນັ້ນ ເຈົ້າແຂວງກໍ່ໄດ້ເນັ້ນໃຫ້ການນຳເມືອງ ກໍ່ຄືຄະນະສະເພາະກິດຂັ້ນເມືອງ ຕ້ອງໄດ້ແຍກຈຳນວນຄົນອອກ ໃຫ້ຍັງຫ້ອງລະ 4-5 ຄົນເທົ່ານັ້ນ ແລະຕ້ອງໄດ້ແຍກອອກໄປສູນໃໝ່ ຫຼືຂະຫຍາຍສູນຕື່ມອີກ, ເພື່ອຄວາມປອດໄພຂອງທຸກຄົນ.

ຈາກນັ້ນ ທ່ານເຈົ້າແຂວງພ້ອມຄະນະ ກໍ່ໄດ້ໄປເບິ່ງສູນກັກກັນຢູ່ຈຸດສຸມ ຫ້ວຍຫອຍ-ທູນຂາມ ທີ່ ມ.ຕ ໄຊພູວຽງ ເຊິ່ງສູນດັ່ງກ່າວນີ້ ມີແຮງງານມາຈາກປະເທດກຸ່ມສ່ຽງ 17 ຄົນ, ຍິງ 6 ຄົນ, ຄົນສັນຊາດຫວຽດນາມ 1 ຄົນ, ໂດຍການປະຕິບັດລະບຽບຂອງສູນກັກກັນແຫ່ງນີ້ ແມ່ນເປັນລະບຽບຮ້ອຍດີ ຍ້ອນມີຈຳນວນພົນໜ້ອຍ ເຮັດໃຫ້ການຄວບຄຸມ ແລະຕິດຕາມງ່າຍ. ຈາກນັ້ນ ໃນຕອນບ່າຍຂອງວັນດຽວກັນ ທ່ານເຈົ້າແຂວງພ້ອມຄະນະ ກໍ່ໄດ້ໄປຢ້ຽມຢາມສູນກັກກັນ ຢູ່ເມືອງເຊໂປນ.

ໂອກາດດັ່ງກ່າວ ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ພ້ອມຄະນະສະເພາະກິດເມືອງ ກໍ່ໄດ້ລາຍງານໃຫ້ຮູ້ວ່າ: ທົ່ວເມືອງເຊໂປນມີສູນກັກກັນ ມີພຽງ 1 ສູນ, ມີຈຳນວນແຮງງານທີ່ເຂົ້າມາໃນສູນມີ 57 ຄົນ, ຍິງ 26 ຄົນ, ແຮງງານລາວມາແຕ່ໄທມີ 47 ຄົນ, ຍິງ 23 ຄົນ, ມາແຕ່ນະຄອນຫຼວງວຽງຈັນ 11 ຄົນ, ຍິງ 3 ຄົນ, ນັກສຶກສາລາວມາແຕ່ຫວຽດນາມ1 ຄົນ, ພ້ອມນີ້ກໍ່ໄດ້ສົ່ງແຮງງານກັກກັນກັບບ້ານ 1 ຄົນ, ທີ່ຢູ່ຄົບຕາມກຳນົດເວລາ 14 ວັນ ແລະໄດ້ຍົກຍ້າຍໄປສູນກັກກັນ ຢູ່ເມືອງທ່າແຂກ, ແຂວງຄຳມ່ວນ 1 ຄົນ.

ຈາກການລາຍງານ ແລະເບິ່ງກັບສະພາບຕົວຈິງເຫັນວ່າ ຢູ່ສູນແຫ່ງນີ້ ມີການປະຕິບັດລະບຽບໄດ້ດີ ເປັນຕົ້ນ: ການຮັກສາໄລຍະຫ່າງ, ການກິນ, ການນອນ ແລະການຢູ່ຮ່ວມກັນ, ໃນນັ້ນ ແຕ່ລະຫ້ອງຄະນະສະເພາະກິດ ໄດ້ມີເຈວລ້າງມື ແລະຜ້າອັດປາກ ມີໄວ້ໃຫ້ເປັນປະຈຳ ພ້ອມທັງມີການວັດແທກອຸນຫະພູມຮ່າງກາຍ ມື້ໜຶ່ງ 2 ເທື່ອ (ເຊົ້າ-ແລງ). ຜ່ານການຈັດຕັ້ງໃນແຕ່ລະສູນ ທັງສອງເມືອງເຫັນວ່າ ຍັງບໍ່ພົບຜູ້ຕ້ອງສົງໃສ. ໂອກາດນີ້ ທ່ານເຈົ້າແຂວງກໍ່ໄດ້ກ່າວຍ້ອງຍໍ ຊົມເຊີຍ ແລະໃຫ້ກຳລັງໃຈຄະນະສະເພາະກິດ ພ້ອມທັງໃຫ້ມີການໂຄສະນາເຜີຍແຜ່ໃຫ້ ປະຊາຊົນໄດ້ເຂົ້າໃຈເຖິງການແຜ່ລະບາດຂອງພະຍາດໂຄວິດ19 ໄດ້ຢ່າງທົ່ວເຖິງ ແລະໄດ້ຮຽກຮ້ອງ ແຮງງານທີ່ຖືກກັກກັນ ຈົ່ງພ້ອມກັນອົດທົນ, ເອົາໃຈໃສ່ປະຕິບັດລະບຽບຢ່າງເຂັ້ມງວດ ທັງນີ້ກໍ່ເພື່ອເປັນການຄວບຄຸມແລະຕ້ານການແຜ່ລະບາດຂອງພະຍາດ ໂຄວິດ-19 ພ້ອມກັນຜ່ານຜ່າວິກິດການຄັ້ງນີ້ ໃຫ້ລຸລ່ວງໄປໄດ້ດ້ວຍດີ ແລະມີຄວາມປອດໄພທຸກໆຄົນ.