ຕອນບ່າຍວັນທີ 12 ກັນຍາ 2021 ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ ໄດ້ລົງຢ້ຽມຢາມພົບປະຄອບຄົບ ຜູ້ທີ່ຖືກລົມພະຍຸເຂດຮ້ອນ ໂກນເຊີນພັດ ທີ່ບ້ານໂພນໃຜ ເມືອງແລະແຂວງສາລະວັນ ໃນຕອນແລງວັນທີ 11 ກັນຍາ ເຮັດໃຫ້ ມີ 88 ຫຼັງຄາເຮືອນ ເສຍຫາຍ, ໃນນັ້ນເສຍຫາຍໜັກ 25 ຫຼັງຄາເຮືອນ, ເສຍຫາຍປານກາງ 53 ຫຼັງຄາເຮືອນ, ເສຍຫາຍເລັກນ້ອຍ 10 ຫຼັງຄາເຮືອນ, ເຮັດໃຫ້ມີ139ຄົນຂາດທີ່ຢູ່ອາໃສ, ໃນນັ້ນມີຜູ້ເສຍຊີວິດ 1 ຄົນ ເພດຍິງ ອາຍຸ 53ປີ, ມີຜູ້ບາດເຈັບສາຫັດ 2 ຄົນ ແລະບາດເຈັບເລັກນ້ອຍ 6ຄົນ.
ການລົງຢ້ຽມຢາມ ພົບປະຂອງທ່ານ ເຈົ້າແຂວງສາລະວັນຄັ້ງນີ້ ທ່ານກໍ່ໄດ້ມີຄຳເຫັນໂອ້ລົມ ສະແດງຄວາມເສົ້າສະຫຼົດໃຈມາຍັງຄອບຄົວທີ່ເສຍຊີວິດ ແລະໃຫ້ກຳລັງໃຈ ບັນດາຄອບຄົວພໍ່ແມ່ປະຊາຊົນທີ່ໄດ້ຮັບຜົນກະທົບ ດ້ວຍຄວາມເປັນຫ່ວງເປັນໄຍ, ໃຫ້ມີແນວຄິດອຸ່ນອຽງທຸນທ່ຽງ, ເຕົ້າໂຮມຄວາມສາມະຄີກັນ ຜ່ານຜາອຸປະສັກ ອັນແສນສາຫັດນີ້ໄປດ້ວຍກັນ. ຈາກນັ້ນທ່ານຍັງໄດ້ຖາມເຖິງແນວຄິດຈິດໃຈ ແລະຄວາມຕ້ອງການອັນຈຳເປັນ ໃນເບື້ອງຕົ້ນຂອງພໍ່ແມ່ປະຊົນຕື່ມອີກ.
ໂອກາດດຽວກັນນັ້ນທ່ານເຈົ້າແຂວງສາລະວັນ ກໍ່ ມອບເງິນສົດ ໃຫ້ແກ່ຄອບຄົວ ຜູ້ທີ່ເສຍຊີວິດ 1 ຄອບຄົວ ຈຳນວນ 2.000.000 ກີບ, ມອບໃຫ້ກັບບຸກຄົນ ທີ່ໄດ້ ຮັບບາດເຈັບ ຈຳນວນ 8 ຄົນ ຜູ້ລະ 1.000.000 ກີບ, ຈາກນັ້ນຍັງໄດ້ມອບເຄື່ອງຊ່ວຍເຫຼືອໃຫ້ເປັນສ່ວນລວມ ເປັນປະເພດ ຊຸດບ່ອນນອນ ຈຳນວນ 20 ຊຸດ ແລະເງິນສົດຈຳນວນ 12.800.000ກີບ ເຊິ່ງມີຄ່າລວມ 15.200.000 ກີບ ຮັບໂດຍທ່ານ ຈັນສີລອນ ສີສົມບູນ ເຈົ້າເມືຶອງໆສາລະວັນ ມີພາກສ່ວນທີ່ກ່ຽວຂ້ອງເຂົ້າຮ່ວມ.
ຂ່າວ-ພາບ: ໂສພາ ສໍພະໄຊ
