ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຈົ້າແຂວງອັດຕະປື ຊຸກຍູ້ການຜະລິດຢູ່ເມືອງສະໜາມໄຊ

ໃນວັນທີ 7 ພຶດສະພາ 2020 ນີ້,ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມດ້ວຍພາກສ່ວນກ່ຽວຂ້ອງຂອງແຂວງ ແລະ ອໍານາດການປົກຄອງເມືອງສະໜາມໄຊ ໄດ້ລົງເຄື່ອນໄຫວຕິດຕາມຊຸກຍູ້ ເຂດຟື້ນຟູ ພື້ນທີ່ການຜະລິດທີ່ໄດ້ຮັບຜົນກະທົບຈາກເຫດການເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນໄລຍະຜ່ານມາ,ເປັນຕົ້ນແມ່ນການ ຟື້ນຟູດິນນາ,ດິນສວນ,ຄອງຊົນລະປະທານ,ລວມທັງການບຸກເບີກເນື້ອທີ່ການຜະລິດໃໝ່ ເພື່ອຕອບສະໜອງເນື້ອທີ່ການຜະລິດໃຫ້ປະຊາຊົນໄດ້ຢ່າງພຽງພໍ, ສາມາດລົງມືຜະລິດໃຫ້ທັນກັບລະດູການ ແລະ ຜະລິດເປັນຄ້າໄດ້ໃຫ້ ຫຼາຍຂື້ນ.

ການລົງເຄື່ອນໄຫວຄັ້ງນີ້ ໄດ້ຢ້ຽມຢາມຈຸດຟື້ນຟູດິນນາໃຫ້ປະຊາຊົນຢູ່ເຂດດອນບົກ-ທ່າແສງຈັນ,ເບິ່ງຈຸດຟື້ນຟູປັບປຸງລະບົບຊົນລະປະທານຫ້ວຍສະໝອງ ,ພ້ອມນັ້ນຍັງໄດ້ມອບແນວພັນເຂົ້າ ໃຫ້ປະຊາຊົນຢູ່ສູນພັກເຊົາບ້ານປິນດົງ ໃນເບື້ອງຕົ້ນ ຈໍານວນ 4 ໂຕນ.

ໂອກາດການລົງເຄື່ອນໄຫວຢ້ຽມຢາມຄັ້ງນີ້ ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ໃຫ້ທິດຊີ້ນໍາແກ່ອໍານາດການປົກຄອງເມືອງສະໜາມໄຊ ໃຫ້ເພີ່ມທະວີເອົາໃຈໃສ່ຊຸກຍູ້ ຕິດຕາມວຽກງານແກ້ໄຂ ແລະ ຟື້ນຟູຜົນກະທົບຢູ່ເມືອງສະໜາມໄຊ ໃນແຕ່ລະວຽກໃຫ້ມີຜົນສໍາເລັດໂດຍໄວ,ເອົາໃຈໃສ່ຊຸກຍູ້ໃຫ້ປະຊາຊົນ ມີອາຊີບຖາວອນ, ພ້ອມນັ້ນກໍ່ຕ້ອງຮີບຮ້ອນຊຸກຍູ້ປະຊາຊົນລົງມືເຮັດການຜະລິດລະດູຝົນໃຫ້ທັນລະດູການ,ສ້າງກຸ່ມການຜະລິດ ແລະຜະລິດໃຫ້ຫຼາຍກາຍເປັນສິນຄ້າ, ເພື່ອສ້າງລາຍຮັບແກ່ຄອບຄົວ ພ້ອມນັ້ນທ່ານ ເຈົ້າແຂວງຍັງເນັ້ນໃຫ້ເອົາໃຈໃສ່ ແກ້ໄຂບັນຫາປະກົດການຍໍ້ທໍ້ທີ່ເກີດຂື້ນຢູ່ເມືອງສະໜາມໄຊ ໂດຍສະເພາະສະພາບການລັກລອບຂຸດຄົ້ນຊັບພະຍາກອນທໍາມະຊາດ ແບບຜິດກົດໝາຍ,ເຊິ່ງໃຫ້ອໍານາດການປົກຄອງເມືອງ ເອົາໃຈໃສ່ແກ້ໄຂ ຢ່າງຈິງຈັງ ປະຕິບັດຕາມຂັ້ນຕອນ ແລະ ລະບຽດກົດໝາຍ ເພື່ອໃຫ້ປະກົດການຍໍ້ທໍ້ຫຼຸດລົງເທື່ອລະກ້າວ.

ຂ່າວ :ໄຊຍະສີນ ຄຸນມາລາ