ເຈົ້າແຂວງໄຊຍະບູລີ ຕິດຕາມກວດກາເສັ້ນທາງເປ່ເພ ຢູ່ເມືອງໄຊສະຖານ

ທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ ພ້ອມ ດ້ວຍພາກສ່ວນທີ່ກ່ຽວຂ້ອງ ລົງຕິດຕາມເບິ່ງສະພາບຄວາມ ເສຍຫາຍ ຈາກໄພພິບັດນ້ຳຖ້ວມ ຢູ່ ບ້ານພູຕຸ່ຍ, ບ້ານກີ່ວກອກ ແລະ ບ້ານສາມັກຄີໄຊ ເມືອງໄຊສະຖານ ໃນວັນທີ 27 ສິງຫາ 2024.

ທ່ານ ສີສະໝອນ ນາມວົງ ເຈົ້າເມືອງໄຊສະຖານ ໄດ້ລາຍງານວ່າ: ໃນລະຫວ່າງວັນທີ 15-23 ສິງຫາ 2024 ຜ່ານມາ, ເມືອງໄຊສະຖານ ໄດ້ຮັບຜົນກະທົບຈາກໄພທໍາມະຊາດ ເນື່ອງຈາກຝົນຕົກຫລາຍມື້ຕິດຕໍ່ກັນ ເຮັດໃຫ້ນໍ້າຫ້ວຍ, ນໍ້າຮ່ອງຕ່າງໆໄຫລຊຸເຂົ້າຖ້ວມ ເຂດພື້ນທີ່ຕໍ່າ ໂດຍສະເພາະ ເນື້ອທີ່ທໍາການຜະລິດຂອງປະຊາຊົນ, ເຮັດໃຫ້ເສັ້ນທາງ ແລະ ຂົວຈໍານວນໜຶ່ງເປ່ເພ, ຊຶ່ງສ້າງຄວາມເສຍຫາຍ 4 ຕື້ກວ່າກີບ ໃນນັ້ນ, ເສັ້ນທາງເຂດບ້ານພູເລີ່ນ -ບ້ານກໍ່-ບ້ານກີ່ວກອກ, ເສັ້ນທາງແຕ່ສາມແຍກດອຍກາວ- ບ້ານສະຖານ, ເສັ້ນທາງແຕ່ສາມແຍກບ້ານສະລາ-ບ້ານສາມັກຄີໄຊ, ບ້ານພູຕຸ່ຍ ແລະ ບ້ານເສົາດຽວ ມີດິນເຈື່ອນຖົມທາງ, ຕົ້ນໄມ້ຫັກຂວາງທາງ ແລະ ໜ້າທາງຍຸບຕັດຂາດບໍ່ສາມາດທຽວໄດ້.

ປັດຈຸບັນ ອໍານາດການປົກຄອງ ຂອງແຕ່ລະບ້ານ ພ້ອມດ້ວຍພໍ່ແມ່ປະຊາຊົນ ແລະ ພາກສ່ວນກ່ຽວຂອງເມືອງ ໄດ້ສ້ອມແປງແກ້ໄຂ ແລະ ສາມາດສັນຈອນໄປ-ມາໄດ້ຊົ່ວຄາວ. ນອກນີ້, ຍັງມີຂົວດາໂຫລຂ້າມນໍ້າກູດຫັກ ບໍ່ສາມາດຂ້າມໄດ້, ມີເສົາໄຟຟ້າເນີ້ງໃກ້ຈຸດດິນເຈື່ອນ ຊຶ່ງຈະໄດ້ຍົກຍ້າຍເສົາໄຟຟ້າອອກຈາກຈຸດດັ່ງກ່າວ, ມີນໍ້າເຊາະດິນຖົມເນື້ອທີ່ນາຂອງປະຊາຊົນ ບ້ານສາມັກຄີໄຊ 1,5 ເຮັກຕາ, ນາດັ່ງກ່າວແມ່ນບໍ່ສາມາດຊັບຊ່າວຄືນໄດ້.

ໃນໂອກາດນີ້, ທ່ານ ພົງສະຫວັນ ສິດທະວົງ ພ້ອມດ້ວຍຄະນະ ຍັງໄດ້ຢ້ຽມຢາມ ສວນປູກກາເຟຂອງປະຊາຊົນເຂດບ້ານກໍ່, ຊຶ່ງການປູກກາເຟຂອງປະຊາຊົນ ເມືອງໄຊສະຖານ ແມ່ນໄດ້ເລີ່ມປູກມາແຕ່ປີ 2023. ສຳລັບປີນີ້ເປັນປີທີ່ສອງ ໂດຍມີເນື້ອທີ່ທັງໝົດ 298 ເຮັກຕາ, ມີ 20 ບ້ານ, ການປູກກາເຟ ໂດຍແມ່ນການລົງທຶນຂອງບໍລິສັດວິນບິນລີ່ ຈາກ ສປປ ຈີນ ທີ່ໄດ້ສະໜອງເບ້ຍກາເຟ, ຝຸ່ນ-ປຸ໋ຍ ແລະ ພະນັກງານວິຊາການ ຊ່ວຍແນະນໍາດ້ານເຕັກນິກ, ສ່ວນປະຊາຊົມເປັນແຮງງານ, ການປົກປັກຮັກສາ ແລະ ເນື້ອທີ່ດິນ. ສຳລັບກາເຟ ດັ່ງກ່າວ ແມ່ນ 3 ປີໃຫ້ຜົນຜະລິດ, ສະເລ່ຍ 5 ໂຕນຕໍ່ເຮັກຕາ ໂດຍແມ່ນບໍລິສັດດັ່ງກ່າວເປັນຜູ້ເກັບຊື້ໃນລາຄາ 10 ພັນກີບຕໍ່ກິໂລກຣາມ.

ຂ່າວ-ພາບ: ອຸ່ນເຮືອນ ໂພທິລັກ