ເຈົ້າແຂວງໄຊຍະບູລີ ເຂົ້າຮ່ວມບຸນດອກແດງ ເມືອງໄຊສະຖານ

ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ໃນວັນທີ 7 ມັງກອນ 2024, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ເຂົ້າຮ່ວມບຸນປະເພນີຂອງເຜົ່າໄປຣ່(ບຸນດອກແດງ) ບ້ານ ປາກລອງ ເມືອງໄຊສະຖານ, ມີທ່ານ ສີສະໝອນ ນາມວົງ ເຈົ້າເມືອງໄຊສະຖານ, ມີຫົວໜ້າ, ຮອງຫົວໜ້າພະແນກການ, ກົມກອງ, ນັກທຸລະກິດອ້ອມຂ້າງແຂວງ, ມີເຈົ້າເມືອງຊຽງຮ່ອນ, ຫົງສາ, ໄຊຍະບູລີແລະ ເມືອງພຽງ, ພ້ອມດ້ວຍການນໍາເມືອງໄຊສະຖານ ແລະ ປະຊາຊົນພາຍໃນບ້ານ ປາກລອງເຂົ້າຮ່ວມຢ່າງຫລວງຫລາຍ. ທັງນີ້ ກໍເພື່ອເປັນການລະນຶກເຖິງບັນພະບູລຸດຜູ້ທີ່ລ່ວງລັບໄປ ແລະ ເປັນການສະເຫລີມສະຫລອງສົ່ງທ້າຍປີເກົ່າ ຕ້ອນຮັບປີໃໝ່, ຮັບໂຊກຮັບລາບ, ເປັນການຂັບສົ່ງສິ່ງບໍ່ດີໄປນໍາປີເກົ່າ, ຕ້ອນຮັບສິ່ງດີໆໃນປີໃໝ່, ທັງເປັນການສະຫລຸບການເກັບກ່ຽວຜົນຜະລິດ, ທັງເປັນການສົມມາຄາລະວະເຈົ້າກົກເຈົ້າເລົ່າ, ພໍ່ແມ່ ແລະ ຍາດພີ່ນ້ອງໃນຕະກຸນ.

ໃນພິທີ, ທ່ານ ຊອງ ຊາຍຍະສານ ຮອງນາຍບ້ານປາກລອງ ໄດ້ຜ່ານປະຫວັດຄວາມເປັນມາ ຂອງ ບຸນດອກແດງ ຂອງເຜົ່າໄປຣ່ ວ່າ: ເຜົ່າໄປຣ່ ແມ່ນມີມູນເຊື້ອສາມັກຄີ, ມີນໍ້າໃຈຮັກຊາດ, ຮັກບ້ານເກີດເມືອງນອນຂອງຕົນ ເຊິ່ງສະແດງອອກໃນເມືອກ່ອນ ເຜົ່ານີ້ແມ່ນໄດ້ປຸກເຮືອນຫລັງຍາວສາມາດຢູ່ໄດ້ 50-60 ຄອບຄົວ, ເມື່ອຄອບຄົວໃດໄດ້ແນວກິນກໍແບ່ງໃຫ້ທຸກຄອບຄົວທີ່ຢູ່ໃນເຮືອນຫລັງດຽວກັນ, ເວລາເຈັບເປັນກໍເບິ່ງແຍງຊ່ວຍເຫລືອເຊິ່ງກັນ ແລະ ກັນ, ເຜົ່າດັ່ງກ່າວມີຮີດຄອງ ແລະ ວັດທະນະທໍາທີ່ເປັນເອກະລັກສະເພາະຂອງຕົນ ເຊັ່ນ: ມີບຸນດອກແດງໃນກາງເດືອນ 1 ຂອງທຸກໆປີ, ພາຍໃນງານຈະມີ ຂັບສະເລາະ ແລະ ຕ່ອຍເກີ່ງ, ເຊື່ອຖືຜີບັນພະບູລຸດ, ການຈັດງານແຕ່ລະປີຖືວ່າເປັນປາງບຸນໃຫຍ່ທີ່ສໍາຄັນຂອງເຜົ່າ.

ທ່ານ ຊອງ ຊາຍຍະສານ ຍັງໃຫ້ຮູ້ອີກວ່າ: ກ່ອນຈະເກີດມີບຸນດອກແດງນີ້, ພາຍຫລັງທີ່ເກັບກ່ຽວຜົນຜະລິດ, ເອົາເຂົ້າຂຶ້ນເລົ້າ(ເຂົ້ານາປີ)ເປັນທີ່ຮຽບຮ້ອບແລ້ວ, ບັນດາເຖົ້າແກ່, ເຈົ້າກົົກເຈົ້າເລົ່າ ກໍໄດ້ປຶກສາຫາລື, ຫາມື້ຫາວັນເພື່ອເຮັດບຸນ ໂດຍໄດ້ກະກຽມຄວາມພ້ອມດ້ານຕ່າງໆ ແລະ ໄດ້ມອບໃຫ້ແຕ່ລະຄອບຄົວເຮັດຮີດຢູ່ເຮືອນຂອງໃຜລາວກ່ອນ, ຫລັງຈາກນັ້ນຈຶ່ງເຮັດງານບຸນຮວມກັນ ໃຫ້ມີຄວາມຟົດຟື້ນ, ມ່ວນຊື່ນ ແລະ ຖືກຕ້ອງຕາມຮີດຄອງປະເພນີ.

ຂ່າວ-ພາບ: ອຸ່ນເຮືອນ ໂພທິລັກ