ທ່ານ ພອຍຄຳ ຮຸ່ງບຸນຍວງ ເຈົ້າແຂວງໆໄຊສົມບູນ ພ້ອມດ້ວຍຄະນະ ໄດ້ລົງຊຸກຍູ້, ຕິດຕາມ, ກວດກາ ໂຄງການຂຸດຄົ້ນ ແລະ ປຸງແຕ່ງແຮ່ຄຳ ຂອງບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈຳກັດ ຢູ່ເມືອງອະນຸວົງ ແຂວງໄຊສົມບູນ ໃນວັນທີ 5 ມິຖຸນາ 2024 ໂດຍການຕ້ອນຮັບຂອງທ່ານ ວັນດີ ກວາລີວົງ ຜູ້ອຳນວຍການ ບໍລິສັດ ຮ່ວມມືພັດທະນາບໍ່ແຮ່ ໄຊສົມບູນ ຈຳກັດ ພ້ອມດ້ວຍເຈົ້າເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ວັນດີ ກວາລີວົງ ໄດ້ລາຍງານສະພາບລວມຂອງໂຄງການຂຸດຄົ້ນ ແລະ ປຸງແຕ່ງແຮ່ຄຳ ຢູ່ເມືອງອະນຸວົງ ແຂວງໄຊສົມບູນ ຊຶ່ງຫລັງຈາກຕິດຕັ້ງເຄື່ອງຈັກສຳເລັດ ແລະ ໄດ້ທົດລອງເຄື່ອງຈັກມາແຕ່ເດືອນ ເມສາ ຈົນຮອດທ້າຍປີ 2023 ແລະ ໄດ້ທຳການຜະລິດ (ຊົ່ວໂມງເຮັດວຽກຕົວຈິງ) ແມ່ນ 1.700 ກວ່າຊົ່ວໂມງ ແລະ ໄດ້ປ່ອນແຮ່ເຂົ້າທັງໝົດ 50 ພັນກວ່າໂຕນ. ໃນປີ 2024 ໄດ້ເລີ່ມແຕ່ ເດືອນ ມັງກອນ-ເດືອນ ເມສາ ໄດ້ປ່ອນແຮ່ເຂົ້າທັງໝົດ 23 ພັນກວ່າໂຕນ, ເຊິ່ງນັບແຕ່ມື້ຕິດຕັ້ງເຄື່ອງສຳເລັດ ແລະ ເລີ່ມທົດລອງມາຮອດເດືອນ ເມສາ 2024 ນີ້ ຄາດວ່າຈະໄດ້ແຮ່ຄຳຢູ່ 33 ພັນກວ່າກິໂລກຣາມ, ສະເພາະເດືອນພຶດສະພາ ນັບແຕ່ວັນທີ 1 ເປັນຕົ້ນມາ ມື້ເຮັດວຽກຕົວຈິງແມ່ນ 300 ກວ່າຊົ່ວໂມງ ໄດ້ເອົາແຮ່ເຂົ້າທັງໝົດ 10.240 ກວ່າໂຕນ ຄາດວ່າຈະໄດ້ແຮ່ຄຳອອກມາ 4 ພັນກວ່າກຣາມ ເກືອບ 5 ກິໂລກຣາມ.
ການລົງຢ້ຽມຢາມບໍລິສັດຄັ້ງນີ້ ເພື່ອເປັນການຊຸກຍູ້, ຕິດຕາມ, ກວດກາ ໂຄງການດັ່ງກ່າວ ພ້ອມທັງເປັນການປຶກສາຫາລືຖອດຖອນບົດຮຽນ ລະຫວ່າງ ແຂວງໄຊສົມບູນ ກັບບໍລິສັດຮ່ວມມືພັດທະນາບໍ່ແຮ່ໄຊ ສົມບູນ ຈຳກັດ ເປັນຕົ້ນ ຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ເພື່ອພ້ອມກັນຊອກຫາວິທີທາງແກ້ໄຂ ໃນສະເພາະໜ້າ ແລະ ຍາວນານ ເພື່ອຮັບປະກັນໃຫ້ໂຄງການໄດ້ດຳເນີນໄປດ້ວຍຄວາມຖືກຕ້ອງ ຕາມຂັ້ນຕອນ ແລະ ລະບຽບຫລັກການ ພ້ອມນີ້ ກໍເພື່ອເປັນການຮັກສາສິດຜົນປະໂຫຍດ ຂອງທັງສອງຝ່າຍ ໃຫ້ມີຄວາມໂປ່ງໃສ ແລະ ສາມາດກວດສອບໄດ້ ໃນແຕ່ລະໄລຍະ ຂອງການຂຸດຄົ້ນດ້ວຍຄວາມເປັນທຳ.
ຂ່າວ-ພາບ: ແກ່ນຈັນ ທຳມະນີ
