ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຈົ້າແຂວງໆຈຳປາສັກລົງຢ້ຽມຢາມການດໍາເນີນກິດຈະການບໍລິສັດອາໂກເຕັກໂປຣລາວ ຢູ່ເມືອງປາກຊ່ອງ.

ທ່ານ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງເຈົ້າແຂວງໆຈຳປາສັກ ໄດ້ເຄື່ອນໄຫວຕິດຕາມຊຸກຍູ້ຄວາມຄືບໜ້າການຈັດຕັ້ງປະຕິບັດໂຄງການຮ່ວມມື, ການສົ່ງເສີມການຄ້າ ແລະ ປັບປຸງຊີວິດການເປັນຢູ່ຂອງຊາວກະສິກອນຂະໜາດນ້ອຍຢູ່ບ້ານຫ້ວຍເສັດ (ທົ່ງເສັດ) ເມືອງ ປາກຊ່ອງ ແຂວງຈຳປາສັກ ເຊີ່ງແມ່ນການດໍາເນີນກິດ ຈະການບໍລິສັດ ອາໂກເຕັກໂປຣລາວ ໃນຕອນເຊົ້າວັນທີ 11 ທັນວາ 2019 ນີ້. ໂດຍໄດ້ຮັບການຕ້ອນຮັບ ແລະ ພາທາງຢ້ຽມຢາມຂອງຄະນະຮັບຜິດຊອບໂຄງການ.
ໃນໂອກາດນີ້ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກໄດ້ຢ້ຽມຊົມການປູກໝາກສາລີຫວານ, ການປູກຜັກໃນເຮືອນຮົ່ມປອດສານພິດ, ໂຄງການກໍ່ສ້າງປັບປຸງໜ້າດິນ ແລະ ຕິດຕາມຄວາມຄືບໜ້າຕ່າງໆຂອງໂຄງການ ພ້ອມນີ້ກໍເນັ້ນໃຫ້ຄະນະຮັບຜິດຊອບສືບຕໍ່ພັດ ທະນາໂຄງການໃຫ້ມີປະສິທິຜົນເຊັ່ນ: ຮັບເອົາພະນັກງານແຮງງານລາວພາຍໃນທ້ອງຖິ່ນເຂົ້າເຮັດວຽກ ເພື່ອຖ່າຍທອດບົດຮຽນເຕັກນິກວິຊາການ ແລະ ລາຍໄດ້ແກ່ປະຊາຊົນ ໂດຍສະເພາະປະຊາຊົນທີ່ຢູ່ພາຍໃນບ້ານ ໂຄງການ (ຫຼືບໍລິສັດຕັ້ງຢູ່) ຍາດແຍ່ງເວລາຕາມເງື່ອນໄຂອົບຮົມການນຳໃຊ້ພາສາຕ່າງປະເທດແກ່ແຮງງານລາວທີ່ເຮັດວຽກນຳໂຄງການຕາມເງື່ອນໄຂເພື່ອແນໃສ່ເຮັດໃຫ້ໂຄງການກໍຄືການດຳເນີນທຸລະກິດຂອງບໍລິສັດ ອາໂກເຕັກໂປຣ ລາວຈຳກັດໄດ້ນຳປະໂຫຍດສູງສຸດສູ່ທ້ອງຖິ່ນຫຼາຍເທົ່າທີ່ຈະຫຼາຍໄດ້. ອິງຕາມບົດບັນທຶກຊ່ວຍຈຳໂຄງການຮ່ວມມື, ການສົ່ງເສີມການຄ້າ ແລະ ປັບປຸງຊີວິດການເປັນຢູ່ຂອງຊາວກະສິກອນຂະໜາດນ້ອຍ ລະຫວ່າງພະແນກກະສິກຳ ແລະ ປ່າໄມ້ ແຂວງຈຳປາສັກ ສປປ ລາວ ແລະ ບໍລິສັດ ອາໂກເຕັກໂປຣ ຈຳກັດ ປະເທດມາເລເຊຍ ຄັ້ງວັນທີ 11 ທັນວາ 2018. ຄະນະວິຊາການໄດ້ລົງສຳຫຼວດ, ປັກຫຼັກເຂດແດນໃຫ້ຈັດຕັ້ງປະຕິບັດໂຄງ ການຢູ່ບ້ານຫ້ວຍເສດ ເມືອງປາກຊ່ອງໃນເນື້ອທີ່ 40 ເຮັກຕາ.
ປະຈຸບັນໄດ້ກ້າເບ້ຍຜັກສະຫຼັດສຳລັບໂຮງເຮືອນຫຼັງທຳອິດ ຈຳນວນ 10.000 ເບົ້າ, ເລີ່ມກໍ່ສ້າງຮູບປັ້ນ(ຮູບມື) ສັນຍາລັກການຮ່ວມມືຂອງໂຄງການ. ປັດຈຸບັນໄດ້ໃຊ້ທຶນໄປແລ້ວ 1 ລ້ານ 5 ແສນ ໂດລາ ຂອງແຜນການລົງທຶນທັງໝົດ 2 ລ້ານໂດລາ ຫຼື ປະມານ 18 ຕື້ກວ່າກີບ. ແຜນທີ່ຈະຈັດຕັ້ງປະຕິບັດໃນຕໍ່ໜ້າ ແມ່ນຈະນຳເຂົ້າວັດຖູ, ອຸປະກອນ ແລະ ປັດໃຈການຜະລິດຂອງໂຄງການຄົ້ນຄວ້າ ເພື່ອຮັບໃຊ້ເຂົ້າໃນໂຄງການຄົ້ນຄວ້າ, ສາທິດ, ຊ່ວຍເຫຼືອດ້ານເຕັກນິກ, ການສົ່ງເສີມຊາວກະສິກອນເຊິ່ງຈະມີແຜນລາຍລະອຽດດັ່ງນີ້: ກໍ່ສ້າງເຮືອນພັກພະນັກງານ 3 ຫຼັງ, ຂໍຈົດທະບຽນການນຳເຂົ້າຝຸ່ນ, ກໍ່ສ້າງໂຄງລ່າງພື້ນຖານ, ກໍ່ສ້າງເຮືອນຮົ່ມ, ຕິດຕັ້ງລະບົບໄຮໂດຣໂພນິກ, ກະກຽມກໍ່ສ້າງຮ້ານຂາຍຜະລິດຕະພັນ ແລະ ຂາຍປີ້ເກັບປີ້ຕ່າງໆ, ເລີ່ມທົດລອງຄົ້ນຄວ້າ ແລະ ພັດທະນາການທົດລອງດ້ວຍເຕັກນິກໃໝ່ ແລະ ທັນສະໄໝ. ຄາດຄະເນຜົນຜະລິດທີ່ຈະໄດ້ຮັບຈາກການຄົ້ນຄວ້າ ລຸ້ນທຳອິດຂອງການປູກພືດຜັກແບບໄຮໂດຣໂພນິກໃນເດືອນທັນວາ 2019ນີ້.


ຂ່າວ;ພາບ: ເກດສະໜາ