ວັນທີ 6 ສິງຫານີ້ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ສົມທົບກັບພະແນກການທີກ່ຽວຂ້ອງຂັ້ນແຂວງ – ເມືອງ ລົງຕິດຕາມສະພາບຄວາມເສຍຫາຍ ຂອງເສັ້ນທາງຫຼວງແຫ່ງຊາດເລກ 8A ເຂດເຊື່ອມຕໍ່ ເມືອງ ຄໍາເກີດ ຫາເມືອງ ຄູນຄໍາ ແຂວງຄໍາມ່ວນ ທີໄດ້ຮັບຜົນກະທົບຈາກດິນເຈື່ອນທັບເສັ້ນທາງຫຼາຍຈຸດ ເນື່ອງຈາກຂອບເຂດພື້ນທີ່ດັ່ງກ່າວມີຝົນຕົກລິນຕິດຕໍ່ກັນເປັນເວລາຫຼາຍວັນ.
ທ່ານ ເຈົ້າແຂວງ ພ້ອມດ້ວຍຄະນະ ໄດ້ລົງໄປພົບປະຢ້ຽມຢາມ ພໍ່ແມ່ປະຊາ ຊົນບ້ານ ໜອງກອກ ຢູ່ທີສະໂມສອນຂອງບ້ານ ເພື່ອຮັບຟັງການລາຍງານສະພາບຄວາມເສຍຫາຍ ຂອງພໍ່ແມ່ປະ ຊາຊົນພາຍໃນບ້ານ ທີ່ໄດ້ຮັບຜົນກະທົບໂດຍກົງຈາກໄພນໍ້າຖ້ວມ ແລະ ດິນເຊາະເຈື່ອນເສັ້ນທາງໃນໄລຍະຜ່ານມາ ຕະ ຫຼອດຮອດການຈັດຕັ້ງປະຕິບັດວຽກງານຂອງຄະນະສະເພາະກິດທີຮັບຜິດຊອບວຽກງານປະຈໍາພາກສະໜາມໃນດ້ານຕ່າງໆ ທີ່ກໍາລັງຈັດຕັ້ງປະຕິດບັດວຽກງານພາຍໃນຂອບເຂດພື່ນທີເສຍຫາຍແຫ່ງດັ່ງກ່າວ ໂດຍສະເພາະແມ່ນ ເຫດການດິນເຈື່ອນຖົມທາງ ຢູ່ເສັ້ນທາງເລກ 8A (ກິໂລແມັດທີ 46 -65) ຢູ່ລະຫວ່າງເຂດແດນ ຂອງເມືອງຄູນຄໍາ ແຂວງຄໍາມ່ວນ ແລະ ເມືອງຄໍາເກີດ ແຂວງບໍລິຄໍາໄຊ ເຊິ່ງຄະຮັບຜິດຊອບໄດ້ລາຍງານແບບບໍ່ເປັນທາງການໄດ້ໃຫ້ຮູ້ວ່າ: ເສັ້ນທາງຈຸດທີເປເພດັ່ງກ່າວ ມີພາຫະນະທີ່ຕົກຄ້າງປະມານ 90 ກວ່າຄັນ ແລະ ມີປະຊາຊົນຕົກຄ້າງປະມານ 80 ກວ່າຄົນ ມາຮອດປະຈຸບັນ ຄະນະຮັບຜິດຊອບໄດ້ລະດົມກໍາລັງ ປກຊ – ປກສ ກອບກູ້ເອົາຜູ້ຕົກຄ້າງ ອອກມາໄດ້ຢ່າງປອດໄພຈໍານວນໜຶ່ງ,
ໄພພິບັດຄັ້ງນີ້ ແມ່ນໄດ້ສົ່ງຜົນກະທົບຢ່າງໃຫຍ່ຫຼວງ ຕໍ່ຊີວິດ ແລະ ຊັບສິນຂອງພໍ່ແມ່ປະຊາຊົນ ແລະ ປະເທດຊາດຢ່າງຫຼວງຫຼາຍ.ໂອກາດດັ່ງກ່າວ ທ່ານ ເຈົ້າແຂວງ ໄດ້ຮຽກຮ້ອງມາຍັງພໍ່ແມ່ປະຊາຊົນ ຕະຫຼອດຮອດຄະນະຮັບຜິດຊອບວຽກງານທີ່ກ່ຽວຂ້ອງໃນແຕ່ລະດ້ານ ຈົ່ງໄດ້ເອົາໃຈໃສ່ ຕິດຕາມເຝົ້າລະວັງ ສະພາບການນໍ້າຖ້ວມ ທີ່ອາດຈະເກີດຂຶ້ນໃນຕໍ່ໜ້ານີ້ ເນື່ອງຈາກວ່າໃນປະຈຸບັນຍັງສຶບຕໍ່ມີຝົນຕົກລິ່ນຢ່າງຕໍ່ເນື່ອງ ພ້ອມນັ້ນທ່ານຍັງໄດ້ຮຽກຮ້ອງໃຫ້ຄະນະຮັບຜິດຊອບ ດໍາເນີນການແກ້ໄຂດິນເຈື່ອນອອກຈາກເສັ້ນທາງຕາມຄວາມເໝາະສົມ ແລະ ສະພາບຄວາມເປັນຈິງ ພ້ອມນີ້ ທ່ານເຈົ້າແຂວງ ພ້ອມດ້ວຄະນະ ຍັງໄດ້ລົງພາກສະໜາມສໍາຫຼວດເບີ່ງສະພາບຄວາມເສຍຫາຍບັນດາຈຸດຕ່າງ ຕາມບໍລິເວນເລາະລຽບເສັ້ນທາງ ເລກ 8A ຕະຫຼອດຮອດການຈັດຕັ້ງປະຕິບັດວຽກງານຂອງຄະນະຮັບຜິດຊອບປະຈໍາພາກສະໜາມ ການເຄືອນໄຫວສໍາຫຼວດສະພາບຄວາມເສຍຫາຍຂອງເສັ້ນທາງໃນຄັ້ງນີ້ ທ່ານຍັງໄດ້ນໍາເອົານໍ້າດື່ມ ປ໋ອງປາ ແລະ ໝີສໍາເລັດຮູບ ແລະ ເງິນສົດຈໍານວນໜຶ່ງມາມອບໃຫ້ຄະນະຮັບຜິດຊອບວຽກງານປະຈໍາສະໜາມ ທີກໍາລັງຈັດຕັ້ງປະຕິບັດວຽກງານໃນປະຈຸບັນຕື່ມອີກ. ແລະ ມາຮອດປະຈຸບັນສະພາບເສັ້ນທາງຍັງບໍ່ສາມາດເປີດການສັນຈອນໄດ້ເທື່ອ ເນື່ອງຈາກໄດ້ຮັບຜົນກະທົບຢ່າງໜັກໜ່ວງຖືກຕັດຂາດຫລາຍຈຸດ, ປະຈຸບັນພາກສ່ວນກ່ຽວຂ້ອງ ກຳລັງເລັ່ງແກ້ໄຂຢ່າງຮີບດ່ວນ, ຄາດວ່າຈະໃຊ້ເວລາໃນການສ້ອງແປງຫຼາຍວັນພໍ່ສົມຄວນ ສະນັ້ນ, ຜູ້ທີ່ຈະເດີນທາງ ໃຊ້ລົດໃຊ້ຖະໜົນຄວນມີສະຕິລະມັດລະວັງ, ຕິດຕາມກວດສອບສະພາບເສັ້ນທາງກ່ອນອອກເດີນທາງ,ຫຼີກລ້ຽງການນໍາໃຊ້ເສັ້ນທາງດັ່ງກ່າວເພຶ່ອໄປສູ້ຈຸດໝາຍ ຕິດຕາມສະພາບອາກາດ ຢ່າງເປັນປົກກະຕິ ເພື່ອກຽມພ້ອມຮັບມືຢ່າງທັນການ. ທັງນີ້ກໍເພຶ່ອຫຼີກລ້ຽງ ອຸປະຕິເຫດແບບບໍ່ຄາດຄິດໃນດ້ານຕ່າງໆທີອາດຈະເກີດຂຶ້ນ.
ຂ່າວ: ສຸກທະວີ