ເພື່ອເປັນການຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານໃນໄລຍະໃໝ່ ໂດຍສະເພາະແມ່ນການຮັບປະກັນການຜະລິດສະບຽງອາຫານ ໃຫ້ພຽງພໍກັບຄວາມຕ້ອງການພາຍໃນ ເພື່ອຫຼຸດຜ່ອນການນຳເຂົ້າ ຊຶ່ງແຂວງສະຫວັນນະເຂດ ກໍເປັນແຂວງໜຶ່ງທີ່ມີເນື້ອທີ່ກວ້າງຂວາງ ແລະມີທ່າແຮງຫຼາຍດ້ານໃນການຜະລິດກະສິກຳ ແນໃສ່ເພື່ອໃຫ້ກຸ້ມຕົນເອງເທື່ອລະກ້າວ ດັ່ງນັ້ນ, ມາໃນຕອນບ່າຍຂອງວັນທີ 19 ສິງຫານີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມຄະນະ ຊຶ່ງປະກອບມີ: ທ່ານ ປະສົງສິນ ຈະເລີນສຸກ ເຈົ້ານະຄອນໄກສອນພົມວິຫານ, ຄະນະນຳຈາກພະແນກກະສິກຳ-ປ່າໄມ້, ພະແນກອຸດສາຫະກຳ-ການຄ້າ ຕະຫຼອດເຖິງພາກສ່ວນຕ່າງໆທີ່ກ່ຽວຂ້ອງ ໄດ້ພ້ອມກັນລົງຊຸກຍູ້ການຈັດຕັ້ງປະຕິບັດວຽກງານຂອງສູນພັດທະນາ ແລະ ບໍລິການກະສິກຳ-ປ່າໄມ້ໜອງເຕົ່າ ແລະ ກຸ່ມປູກຜັກບ້ານໂພນສິມ ນະຄອນໄກສອນພົມວິຫານ.
ໂອກາດນີ້, ທ່ານ ບຸນໂຈມ ອຸບົນປະເສີດ ກໍໄດ້ຮັບຟັງການລາຍງານກ່ຽວກັບການຈັດຕັ້ງເຄື່ອນໄຫວວຽກງານການປູກ-ການລ້ຽງພາຍໃນສູນ ແລະ ກຸ່ມດັ່ງກ່າວ ລວມເຖິງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ແຜນການໃນຕໍ່ໜ້າ ພ້ອມນີ້, ທ່ານເຈົ້າແຂວງ ກໍໄດ້ມີຄຳເຫັນໃຫ້ທິດຊີ້ນຳທີ່ເປັນປະໂຫຍດຕໍ່ກັບການພັດທະນາການປູກ-ການລ້ຽງພາຍໃນສູນພັດທະນາ ແລະ ບໍລິການກະສິກຳ-ປ່າໄມ້ໜອງເຕົ່າ ແລະ ກຸ່ມປູກຜັກບ້ານໂພນສິມ ຊຶ່ງຜ່ານມາແມ່ນປະຕິບັດໄດ້ດີສົມຄວນ, ແຕ່ເມື່ອທຽບໃສ່ທ່າແຮງ ແລະ ຄວາມຮຽກຮ້ອງຕ້ອງການຕົວຈິງຂອງສັງຄົມ ແມ່ນຍັງບໍ່ທັນສາມາດຕອບສະໜອງໄດ້ພຽງພໍ, ສະນັ້ນ ທາງສູນພວກເຮົາຕ້ອງໄດ້ມີການທົບທວນຄືນຈຸດໃດທີ່ຍັງຕ້ອງປັບປຸງ ໂດຍໃຫ້ມີການຮ່ວມມືກັບສູນເພາະພັນພືດປາກບໍ່ ແລະ ສູນຄົ້ນຄວ້າກະສິກຳທ່າຊະໂນ ໃນການຜະລິດແນວພັນປາ ທີ່ຕະຫຼາດມີຄວາມຕ້ອງການສູງ; ສ່ວນກຸ່ມການປູກຜັກບ້ານໂພນສິມ ທີ່ໄດ້ຮັບການສ້າງຕັ້ງມາແຕ່ປີ 2012 ປັດຈຸບັນ ພາຍໃນກຸ່ມມີສະມາຊິກ 13 ຄອບຄົວ(ສະເພາະບ້ານໂພນສິມມີ 9 ຄອບຄົວ) ໂດຍໄດ້ປູກຜັກໃນຫຼາຍໆຊະນິດ ເພື່ອສະໜອງຕະຫຼາດພາຍໃນ ແລະ ສົ່ງບໍລິສັດຊັນເປເປີ, ຊຶ່ງສາມາດສ້າງລາຍຮັບແກ່ຄອບຄົວໄດ້ 5-8 ລ້ານກີບ/ເດືອນ ແລະ ປັດຈຸບັນ ທາງກຸ່ມກຳລັງຂະຫຍາຍສະມາຊິກເພີ່ມ ໂດຍໄດ້ແລ້ວຈຳນວນ 27 ຄອບຄົວ, ລວມເປັນທັງໝົດ 40 ຄອບຄົວ ແລະ ຍັງຈະສືບຕໍ່ຂະຫຍາຍຕື່ມອີກ, ກຸ່ມປູກຜັກ ມີເນື້ອທີ່ການຜະລິດຈຳນວນ 5,5 ເຮັກຕາ ແລະ ຍັງມີເນື້ອທີ່ລວມຂອງບ້ານທີ່ມີແຜນຈະຂະຫຍາຍເປັນສວນປູກຂອງກຸ່ມ. ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ເນັ້ນໃຫ້ພາກສ່ວນກ່ຽວຂ້ອງຂັັ້ນແຂວງ-ນະຄອນ ຂຸ້ນຂ້ຽວໃນການຍົກລະດັບກຸ່ມປູກຜັກໂພນສິມ ເປັນສະຫະກອນໃຫ້ສຳເລັດໂດຍໄວ ຊຶ່ງສະຫະກອນ ຈະມີລະບົບການບໍລິຫານທີ່ເປັນລະບົບຄົບຊຸດ, ມີການແບ່ງວຽກກັນຢ່າງຄັກແນ່ ພາຍຫຼັງສຳເລັດແລ້ວ, ທາງການນຳພວກເຮົາ ຈະໄດ້ຊອກຊ່ອງທາງໃນການຊຸກຍູ້ສົ່ງເສີມເປັນຕົ້ນ: ດ້ານທຶນຮອນ, ເນື້ອທີ່ການຜະລິດ, ນ້ຳ ແລະ ອື່ນໆ ເພື່ອຍົກລະດັບການຜະລິດໃຫ້ຫຼາຍກວ່າເກົ່າ ແລະ ສາມາດສະໜອງພຽງພໍກັບຄວາມຕ້ອງການພາຍໃນແຂວງ ເວົ້າສະເພາະນະຄອນໄກສອນພົມວິຫານ ແລະເຮັດໃຫ້ຊີວິດການເປັນຢູ່ຂອງຊາວກະສິກອນພວກເຮົາ ດີຂຶ້ນເປັນກ້າວໆ.
ຂ່າວ: ສະຫວັນ
