ໃນຕອນເຊົ້າວັນທີ 20 ກໍລະກົດ 2022 ນີ້, ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ ພ້ອມດ້ວຍຄະນະ ໄດ້ເຂົ້າຮ່ວມພິທີໂຮມຊຸມນຸມສະເຫຼີມສະຫຼອງ ປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ ທີ່ສະໂມສອນ ແຂວງຫຼວງພະບາງ, ເຂົ້າຮ່ວມມີບັນດາການນໍາທຸກພາກສ່ວນຂອງແຂວງຫຼວງພະບາງ, ມີການນໍາແຂວງພາກເໜືອ ສປປລາວ, ມີການນໍາ 5 ແຂວງຂອງ ສສ ຫວຽດນາມ ຄື: ແຂວງ ເຊີນລາ, ແຂວງດຽນບຽນ, ແຂວງລາຍເຈົ່າ, ແຂວງກວາງນິງ ແລະ ແຂວງທ້າຍຫງວຽນ ແລະ ຫົວໜ້າກົງສູນໃຫຍ່ ສສ ຫວຽດນາມ ປະຈໍາພາກເໜືອ ຂອງ ສປປລາວ ແລະ ກອງບັນຊາການທະຫານເຂດ 2 ສສ ຫວຽດນາມ ເຂົ້າຮ່ວມ.
ການຈັດງານໂຮມຊຸມນຸມຄັ້ງນີ້, ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ-ສສ ຫວຽດນາມ ເວົ້າລວມ, ເວົ້າສະເພາະແມ່ນແຂວງພາກເໜືອຂອງ ສປປ ລາວ ກັບບັນດາແຂວງ ສສ ຫວຽດນາມ, ການຊ່ວຍເຫຼືອຊຶ່ງກັນ ແລະ ກັນ ຮ່ວມສຸກຮ່ວມທຸກໃນອຸດົມການ ແລະ ຢືນຢູ່ຂຸມຄອງດຽວກັນ ເຂົ້າເມັດຫັກ ຜັກເສັ້ນໜຶ່ງ ກໍແບ່ງປັນກັນກິນເພື່ອພ້ອມກັນຕໍ່ສູ້ກັບພວກຈັກກະພັດຜູ້ຮຸກຮານ ທັງແບບເກົ່າ ແລະ ແບບໃໝ່ ຈົນສາມາດຍາດເອົາເອກະລາດ ອິດສະລະພາບ ແລະ ປົດປ່ອຍປະເທດຊາດໄດ້ຢ່າງມີໄຊ, ມາໃນພາລະກິດການປົກປັກຮັກສາ ແລະ ສ້າງສາພັດທະນາປະເທດຊາດ ສອງຊາດ ຫວຽດນາມ-ລາວ ກໍຍັງສືບຕໍ່ສາມັກຄີຊ່ວຍເຫຼືອຊຶ່ງກັນ ແລະ ກັນຢ່າງຮອບດ້ານ ແລະ ມີປະສິດທິຜົນອັນເຮັດໃຫ້ປະເທດຊາດ ແລະ ປະຊາຊົນ ທັງສອງພວກເຮົາມີຄວາມຈະເລີນຮັ່ງມີ ແລະ ເຂັ້ມແຂງຂຶ້ນເທື່ອລະກ້າວ.
ຂ່າວ-ພາບ: ອຸ່ນເຮືອນ ໂພທິລັກ
