ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຈົ້າແຂວງ ໄຊຍະບູລີ ໂອ້ລົມປະຊາຊົນ ບ້ານ ໃຫຍ່ພັດທະນາ ຄົກແອກ ເມືອງ ຫົງສາ

ໃນວັນທີ 19 ພຶດສະພາ 2020 ນີ້ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະໄດ້ລົງຢ້ຽມຢາມ ແລະ ໂອ້ລົມປະຊາຊົນ ບ້ານໃຫຍ່ພັດທະນາ ຄົກແອກ ເມືອງ ຫົງສາ ແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ຄໍາຫຼ້າ ຜີວວັນນາ ເຈົ້າເມືອງ ຫົງສາ ພ້ອມດ້ວຍອໍານາດການປົກຄອງບ້ານ ແລະ ປະຊາຊົນພາຍໃນບ້ານໃຫ້ການຕ້ອນຮັບຢ່າງອົບອຸ່ນ.

ທ່ານ ອົ້ນ ປະທຸມທອງ ນາຍບ້ານ-ບ້ານໃຫຍ່ພັດທະນາ ຄົກແອກ ໄດ້ລາຍງານສະພາບການພັດທະນາຂອງບ້ານ, ບາງຕອນທ່ານໄດ້ກ່າວວ່າ: ບ້ານໃຫຍ່ພັດທະນາ ຄົກແອກ ເປັນບ້ານລຽບແຄມຂອງ, ຫ່າງຈາກເທດສະບານເມືອງ 46 ກິໂລແມັດ, ມີ 260 ຄອບຄົວ, ມີພົນລະເມືອງ 1.570 ຄົນ, ຍິງ 763 ຄົນ, ປະກອບມີ 3 ເຜົ່າຄື: ເຜົ່າລາວກວມ 24%, ເຜົ່າ ກຶມມຸ 30% ແລະ ເຜົ່າມົ້ງ 46%, ອາຊີບຕົ້ນຕໍຂອງປະຊາຊົນສ່ວນໃຫຍ່ແມ່ນຊາວກະສິກອນ, ການຄ້າ ແລະ ບໍລິການ, ຜ່ານມາຄະນະບ້ານແມ່ນໄດ້ຊຸກຍູ້ປະຊາຊົນ ໃນການປູກຝັງ-ລ້ຽງສັດ ແລະ ດໍາເນີນທຸລະກິດ-ບໍລິການຄ້າ-ຂາຍ ເພື່ອພັດທະນາຊີວິດການເປັນຢູ່, ເຮັດໃຫ້ຄອບຄົບມີລາຍຮັບນັບມື້ຫຼາຍຂຶ້ນ, ປີຜ່ານມາບ້ານສາມາດສ້າງລາຍຮັບໄດ້ 19,36 ຕື້ກີບ, ສະເລ່ຍໄດ້ 12,33 ລ້ານກີບຕໍ່ຄົນຕໍ່ປີ, ຜະລິດເຂົ້າໄດ້ 591 ໂຕນ, ສະເລ່ຍໃສ່ຫົວຄົນໜຶ່ງໄດ້ 377 ກິໂລ/ຄົນ/ປີ, ນອກນີ້ປະຊາຊົນຍັງໄກ້ປູກພືດອຸດສາຫະກໍາເຊັ່ນ: ສາລີ, ໝາກງາ, ໝາກເດືອຍ, ມັນຕົ້ນ ແລະ ອື່ນໆ, ພ້ອມດຽວກັນຍັງໄດ້ລ້ຽງສັດໃຫຍ່ເຊັ່ນ: ງົວ-ຄວາຍ ມີທັງໝົດ 1.622 ໂຕ, ໝູ-ແບ້ 2.058 ໂຕ ແລະ ສັດປີກ 6.788 ໂຕ, ທົ່ວບ້ານຍັງມີຄອບຄົວບໍ່ທັນພົ້ນທຸກຕາມດໍາລັດ 309 ມີທັງໝົດ 6 ຄອບຄົວ, ຈາກນັ້ນ ທ່ານ ພົງສະຫວັນ ສິດທະວົງ ກໍ່ໄດ້ໃຫ້ກຽດໂອ້ລົມຕໍ່ປະຊາຊົນບັນດາເຜົ່າພາຍໃນບ້ານ, ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ບ້ານຍາດມາໄດ້, ພ້ອມທັງໄດ້ເນັ້ນໜັກໃຫ້ຄະນະບ້ານ ແລະ ປະຊາຊົນພາຍໃນບ້ານຈົ່ງສືບຕໍ່ເອົາໃຈໃສ່ໃນການສ້າງເສດຖະກິດຂອງແຕ່ລະຄອບຄົວໃຫ້ມີຢູ່ມີກິນ, ໂດຍການຊຸກຍູ້ສົ່ງເສີມປະຊາຊົນປູກພືດອຸດສາຫະກໍາເປັນສິນຄ້າ ທີ່ຕະຫຼາດຕ້ອງການຫຼາຍທີ່ສຸດ, ການລ້ຽງສັດໃຫຍ່ກໍ່ຕ້ອງຕິດພັນກັບການປູກຫຍ້າ, ເອົາໃຈໃສ່ສຶກສາອົບຮົມລູກຫຼານ ແລະ ພໍ່ແມ່ປະຊາຊົນໃຫ້ຫຼີກເວັ້ນຈາກບັນຫາປະກົດການຫຍໍ້ທໍ້ຕ່າງໆເຊັ່ນ: ບັນຫາຢາເສບຕິດ, ລັກເລັກຂະໂມຍນ້ອຍ ແລະ ບັນຫາອື່ນໆທີ່ເປັນໄພຕໍ່ສັງຄົມ, ຊຸກຍູ້ລູກຫຼານໃນເກນອາຍຸໃຫ້ໄດ້ເຂົ້າຮຽນ, ປ້ອງກັນບໍ່ໃຫ້ມີການປະລະການຮຽນ, ເອົາໃຈໃສ່ເຝົ້າລະວັງຕໍ່ພະຍາດ ໂຄວິດ-19, ການລະບາດຂອງພະຍາດໄຂ້ຍຸງລາຍ ດ້ວຍການເຮັດອານາໄມບ້ານ-ເຮືອນ ສໍາຄັນແມ່ນໃຫ້ປະຕິບັດຕາມ 5 ປໍຂອງສາທາລະນະສຸກວາງອອກໃຫ້ເປັນປົກກະຕິ, ໂອກາດດັ່ງກ່າວທ່ານເຈົ້າແຂວງກໍ່ໄດ້ມອບເງິນຈໍານວນ 20 ລ້ານກີບໃຫ້ບ້ານເພື່ອເປັນເງິນກອງທຶນພັດທະນາບ້ານ.

 

ຂ່າວ-ພາບ: ອຸ່ນເຮືອນ ໂພທິລັກ