ຈາກກໍລະນີມີຜູ້ຊົມໃຊ້ສື່ອອນລາຍ ໂພສຮູບພາບ ແລະ ວີດີໂອເຫດການຕັດໄມ້ ແລະ ຈູດປ່າແປກ ຢູ່ບໍລິເວນຈຸດສໍາຄັນເຂດ ພູກອງເຂົ້າ ໃນເຂດອຸທິຍານແຫ່ງຊາດພູເຂົາຄວາຍ ຜ່ານເຟສບຸກ ເມື່ອບໍ່ດົນມານີ້ ພ້ອມລະບຸວ່າເປັນເຫດການທີ່ສ້າງຄວາມເສຍຫາຍໃຫ້ແກ່ເນື້ອທີ່ປ່າເຂດສະຫງວນແຫ່ງຊາດ.
ທ່ານ ຄຳສອນ ກຸນນະວົງ ຮັກສາການຫົວຫນ້າຫ້ອງການກະສິກຳ ແລະ ປ່າໄມ້ ເມືອງທຸລະຄົມ, ແຂວງວຽງຈັນ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ເມື່ອບໍ່ດົນມານີ້ວ່າ: ຜ່ານການຕິດຕາມຂໍ້ມູນຮູ້ວ່າຮູບພາບ ແລະ ວິດີໂອທີ່ລົງຜ່ານສື່ອອນລາຍນັ້ນເປັນຮູບພາບເກົ່າ ແຕ່ຫ້ອງການກະສິກຳ ແລະປ່າໄມ້ເມືອງ ບໍ່ໄດ້ນິ້ງນອນໃຈຕໍ່ເຫດການທີ່ເກີດຂຶ້ນ ຈື່ງໄດ້ສົມທົບກັບກົມກວດກາປ່າໄມ້ ແລະກອງຄຸ້ມຄອງອຸທິຍານແຫ່ງຊາດພູເຂົາຄວາຍ ລົງພຶ້ນທີ່ເພື່ອສອບຖາມຂໍ້ມູນກັບປະຊາຊົນໃນພຶ້ນທີ່ຢ່າງຮີບດ່ວນ.
ຜ່ານການລົງພຶ້ນທີ່ພົບເຫັນການຈູດປ່າ ແລະ ລັກລອບຕັດໄມ້ເຂດຜາງອຍ ແຕ່ເປັນພຽງການຖາງການຈູດເພື່ອເຮັດການຜະລິດຕາມລະດູການເທົ່ານັ້ນ. ສ່ວນເຂດພູກອງເຂົ້າທີ່ເປັນຫາງສຽງຈາກສັງຄົມນັ້ນ ທາງວິຊາການຍັງບໍ່ສາມາດເຂົ້າເຖິງພຶ້ນທີ່ ເນື່ອງຈາກພາຫະນະໄປບໍ່ຮອດ ແຕ່ຈະພະຍາຍາມຊອກຫາວິທິທາງໃນການເຂົ້າເຖິງສະຖານທີ່ດັ່ງກ່າວໃຫ້ໄດ້ ເພື່ອນຳເອົາຄວາມກະຈ່າງແຈ້ງມາສູ່ສັງຄົມໄດ້ຮັບຊາບຕື່ມອີກ.
ຮັກສາການຫົວຫນ້າຫ້ອງການກະສິກຳແລະປ່າໄມ້ເມືອງທຸລະຄົມແຂວງວຽງຈັນ ໃຫ້ຮູ້ຕື່ມວ່າ: ປ່າສະຫງວນແຫ່ງຊາດພູເຂົາຄວາຍຢູ່ພາຍໃຕ້ການຄຸ້ມຄອງຂອງກະຊວງປ້ອງກັນປະເທດ ມາຮອດຕົ້ນປີ 2022 ໄດ້ປ່ຽນຈາກປ່າສະຫງວນແຫ່ງຊາດ ເປັນອຸທິຍານແຫ່ງຊາດພູເຂົາຄວາຍ ໂດຍແມ່ນກອງຄຸ້ມຄອງອຸທິຍານແຫ່ງຊາດພູເຂົາຄວາຍ ກະຊວງກະສິກຳແລະປ່າໄມ້ ຮ່ວມກັບພະແນກກະສິກຳແລະປ່າໄມ້ແຂວງວຽງຈັນ ແລະ ກະຊວງປ້ອງກັນປະເທດເປັນຜູ້ຄຸ້ມຄອງ ແລະປົກປັກຮັກສາ ເພື່ອຕິດຕາມການບຸກລຸກເນື້ອທີ່ປ່າເພື່ອທຳການຜະລິດ ລວມເຖິງການລັກລອບຕັດໄມ້ເຂດປ່າສະຫງວນໂດຍບໍ່ໄດ້ຮັບອະນຸຍາດ ແລະ ບັນຫາອື່ນໆ.
