ໃນລະຫວ່າງວັນທີ 24-27 ກັນຍາ 2024 ກະຊວງພະລັງານ ແລະ ບໍ່ແຮ່ ໄດ້ຮັບກຽດເປັນເຈົ້າພາບ ຈັດກອງປະຊຸມລັດຖະມົນຕີພະລັງງານອາຊຽນ ແລະ ກອງປະຊຸມທີ່ກ່ຽວຂ້ອງຂຶ້ນ ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ເຊິ່ງແບ່ງອອກເປັນສອງກອງປະຊຸມຄື: ກອງປະຊຸມເຈົ້າໜ້າທີ່ອາວຸໂສພະລັງງານອາຊຽນຄັ້ງທີ 42 ເພື່ອກະກຽມໃຫ້ແກ່ກອງປະຊຸມລັດຖະມົນຕີພະລັງງານອາຊຽນ (SOME Preparatory for the 42nd AMEM ) ຈັດຂຶ້ນໃນລະຫວ່າງວັນທີ 24-25 ກັນຍາ 2024 ແລະ ກອງປະຊຸມລັດຖະມົນຕີພະລັງງານອາຊຽນ ແມ່ນຈະຈັດຂຶ້ນໃນວັນທີ 26-27 ກັນຍາ 2024.
ວັນທີ 24 ກັນຍາ 2024 ໄດ້ຈັດກອງປະຊຸມເຈົ້າໜ້າທີ່ອາວຸໂສພະລັງງານອາຊຽນຄັ້ງທີ 42 ເພື່ອກະກຽມໃຫ້ແກ່ກອງປະຊຸມລັດຖະມົນຕີພະລັງງານອາຊຽນ (SOME Preparatory for the 42nd AMEM) ໂດຍພາຍໃຕ້ການເປັນປະທານ ຂອງ ທ່ານ ປອ.ອາຄົມເດດ ວົງໄຊ ຫົວໜ້າກົມແຜນການ ແລະ ການຮ່ວມມື, ກະຊວງພະລັງງານ ແລະ ບໍ່ແຮ່, ຫົວໜ້າເຈົ້າໜ້າທີ່ອາວຸໂສພະລັງງານອາຊຽນ ແຫ່ງ ສປປ ລາວ ແລະ ຫົວໜ້າເຈົ້າໜ້າທີອາວຸໂສພ້ອມດ້ວຍຄະນະຜູ້ແທນຈາກ 10 ປະເທດອາຊຽນ (ແລະ ອີກ 1 ປະເທດ ຄື ປະເທດ ຕີມໍ ເລດເຕ ໃນນາມປະເທດສັງເກດການ), ກອງເລຂາອາຊຽນ, ສູນພະລັງງານອາຊຽນ, ກອງເລຂາ HAPUA , ASCCOP ເຂົ້າຮ່ວມ.
ຈຸດປະສົງຂອງກອງປະຊຸມເພື່ອເປັນການກະກຽມບົດສະຫຼຸບລາຍງານຂອງທຸກໆບັນດາກິດຈະກຳພາຍໃຕ້ແຜນງານການຮ່ວມມືດ້ານພະລັງງານອາຊຽນ APAEC ທັງໝົດ 7 ໜ້າວຽກຍ່ອຍລວມເຖິງການກະກຽມຮັບຮອງເອົາບັນດາ 8 ແຜນວຽກບູລິມະສິດ (Annual Priority on Energy) ພາຍໃຕ້ການເປັນປະທານຂອງ ສປປ ລາວ. ກອງປະຊຸມສະຫຼຸບໄດ້ຫລາຍບັນຫາ ໂດຍສະເພາະຕິດພັນກັບສັນຍາຕາຂ່າຍໄຟຟ້າອາຊຽນ (APG); ສັນຍາວ່າດ້ວຍຄວາມໝັ້ນຄົງທາງດ້ານນໍ້າມັນເຊື້ອໄຟອາຊຽນ (APSA); ບົດສຶກສາການຄາດຄະເນແນວໂນ້ມດ້ານພະລັງງານອາຊຽນ ສະບັບທີ 8 ເພື່ອເປັນພື້ນຖານໃນການລາຍງານແກ່ກອງປະຊຸມລັດຖະມົນຕີພະລັງງານອາຊຽນ ທີ່ຈະຈັດຂຶ້ນໃນວັນທີ 26-27 ກັນຍາ 2024.
