ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 28 ມັງກອນ 2024 ທີ່ໂຮງແຮມພູແມນ, ນະຄອນຫຼວງພະບາງ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າຫນ້າທີ່ອາວຸໂສອາຊຽນຂອງ ສປປລາວ ໄດ້ເປັນປະ ທານກອງປະຊຸມເຈົ້າໜ້າ ທີ່ອາວຸໂສອາຊຽນ ໂດຍມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຕີມໍແລັດສະເຕ ແລະ ກອງເລຂາອາຊຽນ ເຂົ້າຮ່ວມ.
ກອງປະຊຸມເຈົ້າໜ້າທີ່ອາວຸໂສອາຊຽນຄັ້ງນີ້ ໄດ້ທົບທວນ ແລະ ຮັບຊາບຄວາມຄືບໜ້າການສ້າງປະຊາຄົມອາ ຊຽນ ກໍຄືການຈັດຕັ້ງປະຕິບັດແຜນແມ່ບົດຂອງສາມເສົາຄໍ້າປະຊາຄົມອາຊຽນຊຶ່ງເຫັນວ່າໂດຍລວມມີຄວາມຄືບໜ້າເປັນຢ່າງດີ. ສປປ ລາວ ໃນນາມປະທານອາຊຽນ ໃນປີ 2024 ໄດ້ນຳສະເໜີບູລິມະສິດການເປັນປະທານອາຊຽນຂອງ ສປປ ລາວ ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”.
ກອງປະຊຸມ ຍັງໄດ້ຮັບຊາບຄວາມຄືບໜ້າການຈັດຕັ້ງປະຕິບັດຜົນຂອງກອງປະ ຊຸມສຸດຍອດອາຊຽນຄັ້ງທີ 43 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງທີ່ໄດ້ຈັດຂຶ້ນໃນ ເດືອນກັນຍາ 2023 ທີ່ອິນໂດເນເຊຍ, ລວມທັງຄວາມຄືບໜ້າໃນການກະກຽມວິໄສທັດປະຊາຄົມອາຊຽນ 2045 ໂດຍສະເພາະແມ່ນການສ້າງແຜນຍຸດທະສາດເພື່ອຈັດຕັ້ງປະຕິ ບັດວິໄສທັດປະຊາຄົມອາຊຽນ 2045. ພ້ອມນີ້, ໄດ້ປຶກສາກ່ຽວກັບການສະໝັກເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ຂອງບັນດາປະເທດນອກພາກພື້ນທີ່ມີຄວາມສົນໃຈຮ່ວມມືກັບອາຊຽນ.
ໃນໂອກາດນີ້, ກອງປະຊຸມຍັງໄດ້ທົບທວນຄືນຄວາມຄືບໜ້າຂອງການຮ່ວມມືລະ ຫວ່າງອາຊຽນກັບພາຍນອກ, ພ້ອມທັງປຶກສາຫາລືການສະເໜີເປັນຄູ່ຮ່ວມມືຂອງອາຊຽນ. ພ້ອມດຽວກັນນີ້, ກອງປະຊຸມຍັງໄດ້ຢໍ້າຄືນຄວາມສຳຄັນໃນການຮັດແໜ້ນຄວາມເປັນແກນກາງຂອງອາຊຽນໃນການເສີມຂະຫຍາຍການຮ່ວມມືກັບພາຍນອກ. ສປປລາວໃນນາມປະເທດປະສານງານການພົວພັນຮ່ວມມືອາຊຽນ-ອົດສະຕຣາລີໄດ້ລາຍງານຄວາມຄືບໜ້າຂອງການກະກຽມໃຫ້ແກ່ກອງປະຊຸມສຸດຍອດສະໄໝພິເສດເພື່ອສະເຫຼີມສະຫຼອງການພົວພັນຮ່ວມມືອາຊຽນ-ອົດສະຕຣາລີຄົບຮອບ 50 ປີທີ່ຈະຈັດຂຶ້ນໃນວັນທີ 6 ມີນາ 2024 ທີ່ເມວເບີນ, ປະເທດອົດສະຕຣາລີ.
ນອກຈາກນີ້, ກອງປະຊຸມ ຍັງໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມລັດ ຖະມົນຕີຕ່າງປະເທດອາຊຽນແບບວົງແຄບ ທີ່ຈະຈັດຂຶ້ນໃນວັນທີ 29 ມັງກອນ 2024.
ພາບ: ສັງຄົມໄຊ