ເຈົ້າໜ້າທີ່ອາວຸໂສອາຊຽນ + ສປ ຈີນຫາລືກຽມຄວາມພ້ອມໃຫ້ກອງປະຊຸມລັດຖະມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກໍາຂ້າມຊາດ

ວັນທີ 27 ສິງຫາ 2024 ທີ່ນະຄອນຫຼວງວຽງຈັນ ໄດ້ຈັດກອງປະຊຸມເຈົ້າໜ້າທີ່ອາວຸໂສອາຊຽນ + ສປ ຈີນ ເພື່ອປຶກສາຫາລືກະກຽມໃຫ້ແກ່ກອງປະຊຸມລັດຖະມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11, ໂດຍພາຍໃຕ້ການເປັນປະທານຮ່ວມຂອງຫົວໜ້າເຈົ້າໜ້າທີ່ອາວຸໂສ ມາເລເຊຍ ແລະ ສາທາລະນະ ລັດ ປະຊາຊົນ ຈີນ, ມີຫົວໜ້າເຈົ້າໜ້າທີ່ອາວຸໂສປະເທດສະມາຊິກອາຊຽນ ແລະ ຕີມໍ ເລສເຕ ຮັບຜິດຊອບວຽກງານຕ້ານອາຊະຍາກໍາຂ້າມຊາດ, ຮອງເລຂາທິການໃຫຍ່ອາຊຽນ ດ້ານການເມືອງ-ຄວາມໝັ້ນຄົງ, ພ້ອມດ້ວຍຄະນະຜູ້ແທນ ເຂົ້າຮ່ວມ.

ກອງປະຊຸມໄດ້ພ້ອມກັນທົບທວນຄືນຜົນຂອງການຮ່ວມມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສປ ຈີນ ໃນໄລຍະຜ່ານມາ ເປັນຕົ້ນແມ່ນການສະກັດກັ້ນບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງີນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັບລອບນໍາຄົນເຂົ້າ-ອອກເມືອງ.

ກອງປະຊຸມ ຍັງໄດ້ຍົກສູງຄວາມຮັບຜິດຊອບຄົ້ນຄ້ວາບັນຫາທີ່ສໍາຄັນ ເພື່ອເຮັດໃຫ້ການພົວພັນຮ່ວມມືລະຫວ່າງອາຊຽນ ແລະ ສປ ຈີນ ໃນການສະກັດກັ້ນ ແລະ ຕ້ານອາຊະຍາກໍາຂ້າມຊາດ ໃນຕໍ່ໜ້າມີປະສິດທິພາບສູງຂຶ້ນ; ບັນດາເນື້ອໃນຂອງກອງປະຊຸມໃນຄັ້ງນີ້ຈະໄດ້ນໍາໄປຄົ້ນຄ້ວາ ແລະ ຮັບຮອງເອົາຢູ່ໃນກອງປະຊຸມລັດຖະ ມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11 ເພື່ອເປັນບ່ອນອີງສໍາຄັນທີ່ຈະເຮັດໃຫ້ການພົວພັນຮ່ວມມືຕ້ານອາຊະຍາກໍາຂ້າມຊາດລະ ຫວ່າງອາຊຽນ ແລະ ສປ ຈີນ ມີຄວາມແໜ້ນແຟ້ນຂຶ້ນກ່ວາເກົ່າ.

ຂ່າວ: ຄວາມສະຫງົບ

ພາບ: ບຸນພະຈັນ