ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນຕອນແລງຂອງວັນທີ 6 ມິຖຸນາ ຜ່ານມາ, ສປປ ລາວ ແລະ ສ ເກົາຫຼີ ໄດ້ເປັນເຈົ້າພາບຮ່ວມຈັດກອງປະຊຸມ ເຈົ້າໜ້າທີ່ອາວຸໂສຂອບການຮ່ວມມືແມ່ນໍ້າຂອງ – ສ ເກົາຫຼີ (Mekong-ROK Cooperation Senior Officials’ Meeting) ທີ່ ນະຄອນຫຼວງວຽງຈັນ, ໂດຍການເປັນປະທານຮ່ວມ ລະຫວ່າງ ທ່ານ ສົມບູນ ສີຫານາດ ຫົວໜ້າກົມເສດຖະກິດ ກະຊວງການຕ່າງປະເທດ ແຫ່ງ ສປປ ລາວ, ຫົວໜ້າເຈົ້າໜ້າທີ່ອາວຸໂສຂອງ ສ ເກົາຫຼີ ຂອງ ສປປ ລາວ ແລະ ທ່ານ ຄິມ ດົງ ແບ (Kim Dong-bae) ຫົວືໜ້າກົມອາຊີຕາເວັນອອກ ແລະ ອາຊຽນ, ກະຊວງການຕ່າງ ປະເທດ ແຫ່ງ ສ ເກົາຫຼີ ແລະ ມີບັນດາຫົວໜ້າເຈົ້າໜ້າທີ່ອາວຸໂສປະເທດສະມາຊິກແມ່ນໍ້າຂອງ ເຊັ່ນ: ກຳປູເຈຍ, ໄທ, ຫວຽດນາມ ແລະ ມຽນມາ ລວມທັງຜູ້ຕາງໜ້າຈາກສະຖາບັນແມ່ນ້ຳຂອງ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອທົບທວນຄືນຄວາມຄືບໜ້າໃນການຈັດຕັ້ງປະຕິບັດບັນດາໂຄງການຕ່າງໆ ທີ່ໄດ້ຮັບທຶນສະໜັບສະໜູນຈາກ ກອງທຶນຂອບການຮ່ວມມືແມ່ນ້ຳຂອງ-ສ ເກົາຫຼີ (MKCF) ແລະ ລາຍງານຄວາມຄືບໜ້າ ກ່ຽວກັບໝາກຜົນຂອງການຮ່ວມມືໃນໄລຍະຜ່ານມາ ກໍຄື ບັນດາແຜນງານ-ໂຄງ ການ ທີ່ນອນຢູ່ໃນແຜນປະຕິບັດງານຂອບການຮ່ວມມືແມ່ນໍ້າຂອງ – ສ ເກົາຫຼີ 2021-2025. ນອກຈາກນັ້ນ, ຍັງໄດ້ປຶກສາຫາລື ກ່ຽວກັບ ແຜນການຮ່ວມມືໃນຕໍ່ໜ້າ ໂດຍສະເພາະ ການກະກຽມເປັນເຈົ້າພາບຮ່ວມຈັດກອງປະຊຸມ ເວທີປຶກສາຫາລືພາກທຸລະກິດແມ່ນໍ້າຂອງ – ສ ເກົາຫຼີ ຄັ້ງທີ 12 ທີ່ ນະຄອນຫຼວງວຽງຈັນ ແລະ ແຜນການຈັດກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນ້ຳຂອງ-ສ.ເກົາຫລີ ຄັ້ງທີ 12.
ໃນກອງປະຊຸມຄັ້ງນີ້, ທ່ານ ສົມບູນ ສີຫານາດ ໄດ້ສະແດງຄວາມຊົມເຊີຍ ແລະ ຂອບໃຈຕໍ່ ລັດຖະບານ ສ ເກົາຫຼີ ທີ່ຈະສືບຕໍ່ປະກອບສ່ວນເພີ່ມທຶນສະໜັບສະໜູນເຂົ້າໃນກອງທຶນແມ່ນ້ຳຂອງ – ສ ເກົາຫຼີ ຮອດປີ 2027 ເພື່ອສົ່ງເສີມການພັດທະນາເສດຖະກິດ-ສັງຄົມ ຢູ່ໃນພາກພື້ນແມ່ນ້ຳຂອງ, ລວມທັງ ສປປ ລາວ. ພ້ອມນີ້, ບັນດາປະເທດສະມາຊິກທັງໝົດ ໄດ້ສະແດງຄວາມໝາຍໝັ້ນທີ່ຈະສືບຕໍ່ຮັດແໜ້ນການຮ່ວມມືພາຍໃຕ້ຂອບດັ່ງກ່າວ ເພື່ອນຳເອົາຜົນປະໂຫຍດຮອບດ້ານ ມາສູ່ພາກພື້ນແມ່ນ້ຳຂອງ.
ຂ່າວ: ກະຊວງການຕ່າງປະເທດ