ປະຈຸບັນ, ຄະດີລັກຊັບພົນລະເມືອງ ແມ່ນປະກົດການຫຍໍ້ທໍ້ໜຶ່ງທີ່ເກີດຂື້ນຫຼາຍກວ່າໝູ່ໃນຄະດີຕ່າງໆ ທີ່ເກີດຂື້ນໃນສັງຄົມ, ທຸກຄົນຄວນມີສະຕິສູງໃນການເກັບມ້ຽນຊັບສິນ ເພື່ອບໍ່ໃຫ້ກຸ່ມ ຄົນບໍ່ດີເຄື່ອນໄຫວລັກຊັບເອົາຊັບສິນຂອງທ່ານໄປໄດ້ແບບງ່າຍ ດາຍ. ດັ່ງເຫດການເກີດຂື້ນໃນວັນທີ 8 ມິຖຸນາ 2024 ຜ່ານມາ ຢູ່ເຮືອນຂອງ ທ້າວ ທອງໄມບ້ານລູ້ ເມືອງແອດ ແຂວງຫົວພັນ ໄດ້ມີຄົນບໍ່ດີງັດເຂົ້າເຮືອນ ແລ້ວລັກຊັບໄດ້ຄຳ 275 ບັກ ເງິນກີບທະນາຄານ ຈຳນວນໜື່ງ ແລະ ໂທລະສັບ 1 ໜ່ວຍ.
ເຈົ້າໜ້າທີ່ ປກສ ເມືອງແອດໃຫ້ຮູ້ວ່າ: ໃນເວລາ 9 ໂມງເຊົ້າ ຂອງວັນທີ 8 ມິຖຸນາ 2024 ຜ່ານມາ ທ້າວ ກໍ້ ແລະ ທ້າວ ຜີວ ປະຊາຊົນ ບ້ານເບ້ຍ ເມືອງແອດ ໄດ້ພ້ອມກັນຊ້ອນລົດຈັກ ໄປກິນເຝີຢູ່ບ້ານລູ້ ເມືອງແອດ ພໍຮອດເຄິ່ງທາງທັງສອງໄດ້ສັງເກດເຫັນເຮືອນ ຂອງທ້າວ ທອງໄມ ຢູ່ບ້ານລູ້ ອັດປະຕູບໍ່ມີຜູ້ຢູ່ເຮືອນ ທັງສອງໄດ້ພ້ອມກັນວາງແຜນເພື່ອເຂົ້າເຮືອນ ທ້າວ ທອງໄມ ໄດ້ເອົາລົດຈັກໄປຈອດຢູ່ຫາງບ້ານ ແລ້ວພ້ອມກັນຍ່າງລັດຂື້ນເທິງປ່າມ່ວງລົງໃສ່ເຮືອນ ທ້າວ ທອງໄມ ເມື່ອສັງເກດເຫັນວ່າບໍ່ມີຄົນຢູ່ເຮືອນ ທັງສອງໄດ້ຫາວິທີງັດແງະປະຕູເຮືອນຄົວ ພາຍຫຼັງເຂົ້າເຮືອນໄດ້ແລ້ວທັງສອງໄດ້ລັອກໄວ້ຄືເກົ່າເພື່ອບໍ່ໃຫ້ຜູ້ອື່ນສັງເກດເຫັນ. ຈາກນັ້ນ, ທັງສອງໄດ້ພ້ອມກັນເຂົ້າໄປໃນເຮືອນໃຫຍ່ປົດເອົາໂທລະສັບທີ່ສາກໄວ້ເທິງໂຕະແກ້ວ, ທັງສອງເຫັນວ່າຫ້ອງນອນລັອກຈິ່ງພ້ອມກັນຊອກອຸປະກອນງັດປະຕູເຂົ້າໄປໃນຫ້ອງ ນອນ ພົບເຫັນຕູ້ເຊັບຢູ່ຂ້າງບ່ອນນອນ, ທັງສອງໄດ້ພ້ອມກັນຄົ້ນຊອກຫາກະແຈຕູ້ເຊັບໄດ້ພົບເຫັນຢູ່ກ້ອງເສື້ອນອນ ແລ້ວໄຂຕູ້ເຊັບ ແຕ່ບັງເອີນຕູ້ເຊັບບໍ່ໄດ້ໃສ່ລະຫັດ ແລະ ພົບເຫັນເງິນກີບທະນາຄານ ມັດໃບ 50.000 ກີບ ແລະ ມັດໃບ 100.000 ກີບ, ສາຍຄໍຄໍາ, ແຫວນມືຄໍາ. ທັງສອງໄດ້ເອົາເງິນ ແລະ ຄໍາຢູ່ໃນຕູ້ເຊັບທັງໝົດແລ້ວໃສ່ກະແຈຄືນຄືເກົ່າ. ຈາກນັ້ນໄດ້ເອົາກະແຈຕູ້ເຊັບຂື້ນໄປໄຂຕູ້ເຊັບຢູ່ຊັ້ນສອງແຕ່ໄຂບໍ່ໄດ້ ຈິ່ງເອົາກະແຈເກາະໄວ້ຢູ່ກ້ອງເສື້ອບ່ອນເກົ່າພ້ອມກັນອັດປະຕູເຮືອນຢ່າງລະອຽດ ແລະ ທັງສອງໄດ້ອອກທາງປ່ອງຢ້ຽມໄປຫາລົດຈັກ ແລ້ວລົບໜີໄປພັກຢູ່ສະນຳແຫ່ງໜຶ່ງຂອງເຂດບ້ານ ພ້ອມກັນກວດກາເຄື່ອງທີ່ລັກມາໄດ້ ມີສາຍຄໍຄຳ ຈຳນວນ 22 ເສັ້ນ, ແຫວນ 8 ວົງ, ຕ່ອງຫູ 99 ຕ່ອງ, ໂທລະສັບ 1 ເຄື່ອງ ແລະ ເງິນກີບທະນາຄານ ຈຳນວນ 14.300.000 ກີບ. ທັງສອງໄດ້ເອກະພາບກັນແບ່ງເງິນ ໂດຍທ້າວ ກໍ້ ໄດ້ເງິນ 7.000.000 ກີບ ແລະ ໂທລະສັບ 1 ໜ່ວຍ, ທ້າວ ຜີວ ໄດ້ເງິນ 7.300.000 ກີບ, ສ່ວນຄຳບໍ່ທັງໄດ້ແບ່ງຕົກລົງໃຫ້ທ້າວ ຜີວ ຮັກສາໄວ້ຖ້າມີໂອກາດປີໜ້າ ຈິ່ງພ້ອມກັນຂາຍໄດ້ເງິນຈິ່ງແບ່ງກັນ. ຈາກນັ້ນທັງສອງກໍ່ແຍກຍ້າຍໄປເຮືອນໃຜມັນ.
ທ້າວ ຜີວ ມາຮອດເຮືອນໄດ້ເອົາຄຳຈຳນວນໜຶ່ງໄວ້ແລ້ວເອົາເສື້ອຮ້າຍຫໍ່ຄຳ ແລະ ຂຸດຂຸມຝັງໄວ້ຢູ່ຂ້າງຫ້ອງນ້ຳຖົມດ້ວຍຊີມັງ ເພື່ອບໍ່ໃຫ້ຜູ້ອື່ນພົບເຫັນ. ຫຼັງຈາກຖົມຮ້ອຍຮ້ອຍແລ້ວ ທ້າວ ຜີວ ກໍ່ໄປຫາຜູ້ສາວ, ຮຸ່ງເຊົ້າມື້ຕໍ່ມາ ທ້າວ ຜີວໄດ້ເອົາເງິນໃຫ້ຜູ້ ສາວ ຈຳນວນ 4,800,000 ກີບ ແລະ ສາຍຄໍ 1 ເສັ້ນ.
ຕົກມາຮອດວັນທີ 13 ມິຖຸນາ 2024 ທ້າວ ຜີວ ໄດ້ເອົາສາຍຄໍ 1 ເສັ້ນໄປຂາຍໃຫ້ ປະຊາຊົນຢູ່ບ້ານເບ້ຍ ໄດ້ເງິນ 3,000,000 ກີບ, ມາຮອດ 18 ໂມງແລງຂອງວັນທີ 14 ມິຖຸນາ 2024 ທ້າວ ຜີວ ໄດ້ເອົາເງິນ, ຄຳທີ່ຊຸກເຊືອງອອກມາໃຫ້ແມ່ຂອງຕົນເກັບມ້ຽນ ຜູ້ກ່ຽວເອົາສາຍຄໍ 1 ເສັ້ນ, ແຫວນ 1 ວົງ ເງິນກີບທະນາຄານ 400,000 ກີບຕິດຕົວ ແລະ ຂັບຂີ່ລົດຈັກອອກຈາກບ້ານເບ້ຍ ຈຸດປະສົງໄປຫຼີ້ນ ຢູ່ເມືອງຊຽງຄໍ້. ເມືອເດີນທາງຮອດຈຸດສົ້ນຂົວນ້ຳມ່າ ເມືອງແອດ ເຈົ້າໜ້າທີ່ໄດ້ລັດກວກກາຕາມລະບຽບ ສັງເກດເຫັນຜູ້ກ່ຽວຜິດປົກກະຕິຈິ່ງໄດ້ກວດຄົ້ນຕົນ ຕົວ ໄດ້ພົບເຫັນ ສາຍຄໍຄຳ 1 ເສັ້ນ, ແຫວນຄຳ 1 ວົງ ແລະ ເງິນກີບ ຈຳນວນ 400,000 ກີບ ເຈົ້າໜ້າທີ່ຈິ່ງນຳຕົວມາສືບ ສວນ-ສອບສວນ ຜູ້ກ່ຽວໄດ້ຮັບສາລະພາບວ່າ ໄດ້ຮ່ວມກັບທ້າວ ກໍ້ ຢູ່ບ້ານດຽວກັນ ລັກງັດເຂົ້າເຮືອນ ຂອງທ້າວ ທອງໄມ ບ້ານລູ້ ໄດ້ເງິນ ແລະ ຄຳ ຈຳນວນດັ່ງກ່າວ.
ຫຼັງຈາກກັກຕົວພວກກ່ຽວທັງສອງໄດ້, ເຈົ້າໜ້າທີ່ກໍ່ໄດ້ສືບ ສວນ-ສອບສວນ ເພື່ອເກັບກຳຂໍ້ມູນທ້ອນໂຮມຂອງກາງ ເພື່ອນຳເອົາຊັບສິນທີ່ພວກກ່ຽວລັກສົ່ງຄືນເຈົ້າຂອງເດີມ, ເຊິ່ງປະຈຸບັນເກັບກູ້ໄດ້ຄຳ ຈຳນວນ 133 ບັກ, ໂທລະສັບ 1 ໜ່ວຍ ແລະ ເງິນ ກີບທະນາຄານ 6. 800.000 ກີບ,
ດັ່ງນັ້ນ, ວັນທີ 29 ກໍລະກົດ 2024 ນີ້ ເຈົ້າໜ້າທີ່ ປກສ ເມືອງແອດ, ໄອຍາການ ແລະ ພາກສ່ວນກ່ຽວຂ້ອງຈິ່ງໄດ້ນຳເອົາພວກກ່ຽວທັງສອງ ມາທົດສະກຳຄືນ ເພື່ອປະກອບສຳນວນຄະດີ ດຳເນີນການສືບສວນ-ສອບສວນ ຕາມຂັ້ນຕອນຂອງກົດໝາຍໃນຂັ້ນຕໍ່ໄປ.
ຂ່າວ: ປກສ ແຂວງຫົວພັນ
