ໃນວັນທີ 02 ສິງຫາ 2024 ກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄໍາ ສົມທົບກັບຄະນະສະເພາະກິດ ກົມໃຫຍ່ຕໍາຫຼວດ, ເຈົ້າໜ້າທີ່ຕໍາຫຼວດ ສສ ຫວຽດນາມ ແລະ ໜ່ວຍງານຮັກສາຄວາມປອດໄພ ເຂດເສດຖະກິດພິເສດສາມຫຼ່ຽມຄຳ ດໍາເນີນການແກ້ໄຂກຸ່ມແກ້ງສໍ້ໂກງຊັບທາງໂທລະຄົມ (Call Center) ຕິດພັນກັບບັນດາເປົ້າໝາຍລະເມີດກົດໝາຍ ຢູ່ໃນເຂດເສດຖະກິດພິເສດສາມຫຼ່ຽມຄໍາ ສາມາດກັກຕົວຜູ້ຖຶກສົງໃສກະທໍາຜິດສັນຊາດຫວຽດນາມ ໄດ້ທັງໝົດ ຈໍານວນ 154 ຄົນ, ຍິງ 25 ຄົນ ພ້ອມວັດຖຸຂອງກາງປະກອບມີ: ໂທລະສັບມືຖື 298 ໜ່ວຍ, ຄອມຕັ້ງໂຕະ 20 ເຄື່ອງ ແລະເຄື່ອງຂອງກາງອີກຈໍານວນໜຶ່ງ.
ຈາກນັ້ນຈຶ່ງໄດ້ມີການມອບພວກຖືກຫາດັ່ງກ່າວ ໃຫ້ກັບເຈົ້າໜ້າທີ່ຕໍຳຫຼວດ ສສ ຫວຽດນາມ; ຕາງໜ້າຝ່າຍລາວມອບໂດຍ ທ່ານ ພັອ ອານຸສີນ ສັກປະເສີດ ຫົວໜ້າກອງບັນຊາ ການ ປກສ ເຂດເສດຖະກິດພິເສດສາມຫຼ່ຽມຄຳ ຕາງໜ້າຝ່າຍຫວຽດນາມ ກ່າວຮັບໂດຍ ທ່ານ ພັອ ຟາມແທ່ງເຟື່ອງ ຮອງຫົວໜ້າກອງບັນຊາການ ປກສ ແຂວງ ຮ່າຕິ້ງ ແລະ ມາໃນວັນທີ 03 ສິງຫາ 2024 ກໍ່ໄດ້ນຳຕົວພວກຖືກຫາດັ່ງກ່າວສົ່ງຄືນສູ່ປະເທດ.
ທີ່ມາ: ຄວາມສະຫງົບລາວ
