ວັນທີ 1 ຕຸລາ 2024 ນີ້ໄດ້ມີພິທີປະກາດນໍາໃຊ້ໃບອະນຸຍາດ ກາຫມາຍສິນຄ້າ “ ໜຶ່ງເມືອງ ໜຶ່ງຜະລິດຕະພັນ’’ ແຫ່ງຊາດ ຫລື ສິນຄ້າ ໂອດັອບຂອງວິສາຫະກິດສ່ວນບຸກຄົນ ໂຮງງານຜະລິດຕະພັນໂສມ ເຄເຫີບ (K-HERB) ເຊິ່ງປະກອບມີ 8 ລາຍການສິນຄ້າຄື: ເຫລົ້າບອງໂສມ, ເຫລົ້າບອງໂສມຂີງດຳ, ເຫລົ້າບອງໂສມເຫັດລິນຈື, ຊາໂສມ, ໂສມແກ້ວ (ໂສມອົບແຫ້ງ), ໂສມສະກັດ (ກາວໂສມ), ໂສມດອງນໍ້າເຜິ້ງ ແລະ ເຂົ້າຫນົມຄຸກກີ້ໂສມ.
ທ່ານ ນາງ ສີວອນ ອ່ອນມະນີ ຮອງຫົວຫນ້າຂະແໜງສົ່ງເສີມວິສາຫະກິດ ແລະ ການຄ້າແຂວງ ໄດ້ໃຫ້ຮູ້ວ່າ: ພາຍໃນແຂວງເຊກອງ ມີສິນຄ້າໂອດັອບ ທັງໝົດ 12 ຫົວໜ່ວຍ 22 ລາຍການຜະລິດຕະພັນ ເຊິ່ງລ້ວນແຕ່ເປັນສິນຄ້າທີ່ຜະລິດປຸງແຕ່ງດ້ວຍວັດຖຸດິບພາຍໃນທ້ອງຖິ່ນ ແລະເປັນພູມປັນຍາຂອງປະຊາຊົນບັນດາເຜົ່າແຂວງເຊກອງ.
ໂອກາດນີ້, ທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກຳ ແລະ ການຄ້າ ແຂວງເຊກອງ ໄດ້ຮຽກຮ້ອງໃຫ້ທຸກພາກສ່ວນໃນສັງຄົມ ຊ່ວຍກະຕຸກຊຸກຍູ້ບັນດາເຈົ້າຂອງຜະລິດຕະພັນ ໃນການໂຄສະນາ ແລະ ສ້າງທຸກເງື່ອນໄຂໃຫ້ແກ່ຜູ້ປະກອບການໄດ້ເຂົ້າເຖິງແຫລ່ງທຶນ ແລະ ຕະຫລາດຈໍາໜ່າຍສິນຄ້າ, ພ້ອມທັງຊຸກຍູ້ສົ່ງເສີມລູກຄ້າ ກໍຄື ພໍ່ແມ່ປະຊາຊົນພາຍໃນແຂວງ ແລະ ຕ່າງແຂວງ ໃນການເຂົ້າເຖິງການບໍລິການ, ຮັບຮູ້ໄດ້ສິນຄ້າທີ່ເປັນທ່າແຮງ, ສິນຄ້າໂອດັອບຂອງແຂວງໃຫ້ຫລາຍຂຶ້ນ.
ທີ່ມາ: ຂ່າວແຂວງເຊກອງ
