ອົງຄະນະພັກແຂວງເຊກອງ ຈັດກອງປະຊຸມເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 8 ຂອງຄະນະບໍລິຫານງາຍສູນກາງພັກ ສະໄໝທີ XI, ເອກະສານສໍາຄັນຂອງສູນກາງພັກ, ລັດຖະບານ ແລະ ຂອງແຂວງ ໃນວັນທີ 6 ສິງຫາ 2024 ໂດຍການເຜີຍແຜ່ຂອງສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ຄະນະພັກຮາກຖານ, ໜ່ວຍພັກຮາກຖານ, ຫົວໜ້າ-ຮອງຫົວໜ້າພະແນກການ ແລະ ອົງການທຽບເທົ່າອ້ອມຂ້າງແຂວງ ເຂົ້າຮ່ວມ.
ໂອກາດນີ້, ຜູ້ເຂົ້າຮ່ວມໄດ້ພ້ອມກັນເຊື່ອມຊຶມເອກະສານສໍາຄັນຂອງພັກ ກ່ຽວກັບການຕີລາຄາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024, ການຈັດຕັ້ງປະຕິບັດ 2 ວາລະແຫ່ງຊາດ, ການແກ້ໄຂບັນຫາເຄັ່ງຮ້ອນດ້ານເສດຖະກິດ-ການເງິນ, ການຄຸ້ມຄອງ-ການແລກປ່ຽນເງິນຕາ ແລະ ການແກ້ໄຂບັນຫາໜີ້ສິນຕ່າງໆ; ການສ້າງສະພາບແວດລ້ອມ ທີ່ເອື້ອອໍານວຍໃຫ້ແກ່ການລົງທຶນ ແລະ ການດໍາເນີນທຸລະກິດ; ການປັບປຸງຄຸນນະພາບການສຶກສາ, ແກ້ໄຂການປະລະການຮຽນ ແລະ ເພີ່ມອັດຕາການເຂົ້າຮຽນໃນທຸກຊັ້ນທຸກສາຍ; ການຍົກສູງຄຸນນະພາບດໍາເນີນຄະດີ ຕາມຂະບວນການຍຸຕິທໍາ, ສ້າງເງື່ອນໄຂ ແລະ ອໍານວຍຄວາມສະດວກໃຫ້ປະຊາຊົນເຂົ້າເຖິງຂະບວນການຍຸຕິທໍາ; ມະຕິ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ເພື່ອແກ້ໄຂບັນຫາຕ່າງໆໃນປັດຈຸບັນໃຫ້ເປັນຮູບປະທໍາ; ສ້າງພື້ນຖານການຜະລິດ ແລະ ການບໍລິການ, ລະບົບການເງິນ-ເງິນຕາ, ການຄຸ້ມຄອງລາຄາສິນຄ້າ ແລະ ການຄຸ້ມຄອງບໍລິຫານລັດໃຫ້ເຂັ້ມແຂງ ແລະ ເຊື່ອມຊຶມບັນດາເອກະສານສໍາຄັນ ເຊັ່ນ: ຄໍາສັ່ງແນະນໍາ ຂອງຄະນະເລຂາທິການສູນກາງພັກ ສະບັບເລກທີ 182/ຄລສພ ວ່າດ້ວຍການຜັນຂະຫຍາຍມະຕິຂອງກົມການເມືອງສູນກາງພັກ ກ່ຽວກັບການກະກຽມ ແລະ ສະເຫຼີມສະຫຼອງ 3 ວັນປະຫວັດສາດ; ມະຕິກອງປະຊຸມລັດຖະບານ ເປີດກວ້າງຄັ້ງທີ I ປະຈໍາປີ 2024 ແລະ ມະຕິ ຂອງຄະນະບໍລິຫານງານພັກແຂວງ ສະບັບເລກທີ 93/ຄບພຂ ວ່າດ້ວຍການແຕ່ງຕັ້ງຄະນະຊີ້ນໍາລວມ, ບັນດາອະນຸກໍາມະການກະກຽມ ແລະ ດໍາເນີນກອງກອງປະຊຸມໃຫຍ່ ຄັ້ງທີ XI ອົງຄະນະພັກແຂວງ. ຊຶ່ງການເຜີຍແຜ່ເຊື່ອມຊຶມຄັ້ງນີ້, ເພື່ອໃຫ້ບັນດາສະຫາຍຄະນະບໍລິຫານພັກແຂວງ, ເລຂາພັກເມືອງ, ຄະນະພັກຮາກຖານ, ໜ່ວຍພັກຮາກຖານ ແລະ ພະນັກງານນໍາພາຫຼັກແຫຼ່ງຂອງແຂວງ ເຂົ້າໃຈ, ກໍາແໜ້ນ, ເປັນເອກະພາບ ແລະ ຜັນຂະຫຍາຍໃຫ້ເປັນຮູບປະທໍາຕົວຈິງ.
ພ້ອມນີ້, ສະຫາຍ ເຫຼັກໄຫຼ ສີວິໄລ ໄດ້ຊີ້ນໍາໃຫ້ພະນັກງານນໍາພາຫຼັກແຫຼ່ງຂອງແຂວງ, ພະແນກການ-ອົງການທຽບເທົ່າ ແລະ 4 ເມືອງ ເຊື່ອມຊຶມ ແລະ ຜັນຂະຫຍາຍບັນດາມະຕິສໍາຄັນຂອງສູນກາງພັກ, ລັດຖະບານ ແລະ ຂອງແຂວງ ໂດຍສະເພາະມະຕິ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ໃຫ້ເປັນອັນລະອຽດສະເພາະຂອງແຂວງ, ເມືອງ ແລະ ຂະແໜງການ ແນໃສ່ເຮັດໃຫ້ການປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ (2021-2025) ໄລຍະທ້າຍສະໄໝ ໃຫ້ປະກົດຜົນເປັນຈິງ ດ້ວຍຄຸນນະພາບ ແລະ ປະສິດທິຜົນສູງ.
ຂ່າວ-ພາບ: ສັນຍາ
