ເຊກອງ ປະດັບຫຼຽນໄຊອິດສະຫຼະ ຊັ້ນ III ໃຫ້ແກ່ການນຳແຂວງ ກວາງນາມ
ຕອນເຊົ້າວັນທີ 27 ກັນຍາ 2024ນີ້, ທີ່ຫ້ອງປະຊຸມຫ້ອງວ່າການຄະນະກຳມະການປະຊາຊົນແຂວງກວາງນາມ ສສຫວຽດນາມ ການນຳພັກ-ລັດແຂວງເຊກອງ ໂດຍ ທ່ານ ເຫຼັກໄຫຼ ສີວິໄລ ກຳມະການສູນກາງພັກ ເລຂາພັກແຂວງ ເຈົ້າແຂວງເຊກອງ ພ້ອມຄະນະ ໄດ້ປະດັບຫຼຽນໄຊອິດສະຫຼະຊັ້ນ III ໃຫ້ແກ່ພະນັກງານການນຳແຂວງກວາງນາມ ໂດຍມີຄະນະຜູ້ແທນຂັ້ນສູງຂອງສອງແຂວງເຊກອງ-ກວາງນາມເຂົ້າຮ່ວມ.
ທ່ານ ນາງ ຂັນທະລີ ວັນລະເບື່ອມ ຮອງຫົວໜ້າພະແນກພາຍໃນແຂວງເຊກອງໄດ້ຂຶ້ນຜ່ານລັດຖະດຳລັດຂອງປະທານປະເທດ ສະບັບເລກທີ 155/ປປທ ລົງວັນທີ 29 ກັນຍາ 2023 ວ່າດ້ວຍການປະດັບຫຼຽນໄຊອິດສະຫຼະ ຊັ້ນ III ໃຫ້ແກ່ພະນັກງານການນຳແຂວງກວາງນາມ ຈຳນວນ 6 ທ່ານ ຄື: ທ່ານ ເລ ວັນ ຢຸ່ງ ຮອງເລຂາພັກແຂວງ, ຜູ້ປະຈຳການຫົວໜ້າຄະນະສະມາຊິກສະພາແຫ່ງຊາດ; ທ່ານ ເຈີນ ຊວັນ ວິ່ງ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ;ທ່ານ ຫງວຽນ ກົງ ແທ້ງ ກຳມະການພັກແຂວງ, ຮອງປະທານສະພາປະຊາຊົນ ແຂວງ; ທ່ານ ໂຮ ກວາງ ບິ້ວ ກຳມະການພັກແຂວງ, ຮອງປະທານຄະນະກຳມະການ ປະຊາຊົນແຂວງ; ທ່ານ ເຈີນ ແອັງ ຕວັນ ກຳມະການພັກແຂວງ, ຮອງປະທານຄະນະກຳມະການ ປະຊາຊົນແຂວງ; ທ່ານ ວໍ ຊວນ ກາ ຄະນະປະຈຳພັກແຂວງ, ປະທານແນວໂຮມແຫ່ງຊາດຫວຽດນາມ ແຂວງ, ຈາກນັ້ນກໍໄດ້ຜ່ານໃບມອບສິດຂອງທ່ານນາຍົກລັດຖະມົນຕີ ແຫ່ງສປປລາວ ສະບັບເລກທີ 193/ນຍ ລົງວັນທີ 3 ຕຸລາ 2023 ມອບສິດໃຫ້ເຈົ້າແຂວງເຊກອງຕາງໜ້າລັດຖະບານລາວເປັນກຽດປະດັບຫຼຽນໄຊອິດສະຫຼະ ຊັ້ນ III ໃຫ້ແກ່ພະນັກງານການນຳແຂວງກວາງນາມທີ່ມີຜົນງານ, ຄຸນງາມຄວາມດີ ໃນການພົວພັນຮ່ວມມື ແລະ ຊ່ວຍເຫຼືອທຶນຮອນເພື່ອພັດທະນາ ແຂວງເຊກອງ ໃນໄລຍະຜ່ານມາ, ເນື່ອງໃນໂອກາດສະເຫຼີມສະຫຼອງ ວັນເຊັນສົນທິສັນຍາມິດຕະພາບການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະກົດ 1977 – 18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (05 ກັນຍາ 1962 – 05 ກັນຍາ 2022).
ໂອກາດນີ້ທ່ານ ເຫຼັກໄຫຼ ສີວິໄລ ກຳມະການສູນກງພັກ ເລຂາພັກແຂວງ ເຈົ້າແຂວງເຊກອງ ກໍໄດ້ຕາງໜ້າລັດຖະບານລາວໃຫ້ກຽດຂຶ້ນປະດັບຫຼຽນໄຊອິດສະຫຼະໃຫ້ແກ່ພະນັກງານການນຳແຂວງກວາງນາມ ພ້ອມທັງກ່າວສະແດງຄວາມ ຂອບອົກຂອບໃຈອັນຈິງໃຈ ແລະຄວາມຮູ້ບຸນຄຸນອັນລົ້ນເຫຼືອຕໍ່ພັກ-ລັດ ແລະ ປະຊາຊົນຫວຽດນາມ ອ້າຍນ້ອງ ເວົ້າລວມ,ເວົ້າສະເພາະຄະນະພັກອຳນາດການປົກຄອງແຂວງກວາງນາມທີ່ໃຫ້ການຊ່ວຍເຫຼືອອັນລ້ຳຄ່າແກ່ພາລະກິດຕໍ່ສູ້ກູ້ຊາດໃນເມືອກ່ອນ ກໍ່ຄືໃນພາລະກິດປົກປັກຮັກສາລະບອບໃໝ່ ແລະສ້າງສາພັດທະນາປະເທດຊາດ,ທ້ອງຖິ່ນຂອງພວກເຮົາໃນປະຈຸບັນ ຫວັງຢ່າງຍິ່ງຈະໄດ້ຮັບການຮ່ວມມືພັດທະນາສອງທ້ອງຖິ່ນໃຫ້ມີຄວາມສີວິໄລ ນັບມື້ແຕກດອກອອກຜົນຢ່າງບໍ່ຢຸດຢັ້ງ.
ຂ່າວ ຂັນຄຳ ແສງຈະເລີນວົງ ນັກຂ່າວແຂວງເຊກອງ
