ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ພະແນກສາທາລະນະສຸກ ແຂວງເຊກອງ ຈັດກອງປະຊຸມຊີ້ແຈງ ແລະ ວາງແຜນການຈັດຕັ້ງປະຕິບັດວັນສັກຢາກັນພະຍາດແຫ່ງຊາດ (ວສຊ) ເພື່ອເຝົ້າລະວັງ ແລະ ຕອບໂຕ້ການລະບາດພະຍາດໝາກແດງໃຫຍ່-ໝາກແດງນ້ອຍ ໃນວັນທີ 25 ເມສາ 2024 ໂດຍການເປັນປະທານຂອງທ່ານ ເພັດສະໄໝ ເທບວົງສາ ຮອງຫົວໜ້າພະແນກສາທາລະນະສຸກແຂວງ, ມີຜູ້ຕາງໜ້າຈາກອົງການອະນາໄມໂລກ ປະຈໍາແຂວງຈໍາປາສັກ ພ້ອມດ້ວຍຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່-ເດັກ (ຄກມດ) ຂັ້ນແຂວງ, ຂັ້ນເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງການລາຍງານການເຝົ້າລະວັງພະຍາດໝາກແດງໃຫຍ່-ໝາກແດງນ້ອຍ ແລະ ຄວາມສໍາຄັນຂອງການເຮັດ ວສຊ, ໂດຍສະເພາະຂໍ້ມູນອັດຕາການປົກຄຸມວັກຊິນ ຢູ່ ສປປ ລາວ ປີ 2019-2023, ການຈັດຕັ້ງປະຕິບັດ ວສຊ ຢູ່ເຂດພາກພື້ນ 2022-2024, ຊຶ່ງຜົນການຈັດຕັ້ງປະຕິບັດການເຝົ້າລະວັງໝາກແດງໃຫຍ່ ອີງໃສ່ຕົວຊີ້ວັດ 2019-2023 ເຫັນວ່າຫລຸດຄາດໝາຍຫລາຍ, ເຊິ່ງກຸ່ມປະຊາກອນທີ່ໄດ້ຮັບຜົນກະທົບແມ່ນຢູ່ລະຫວ່າງ 1-14 ປີ ແລະ ສປປ ລາວ ແມ່ນ 1 ໃນ 3 ປະເທດ (ລາວ, ກໍາປູເຈຍ, ມາເລເຊຍ) ທີ່ມີແຜນຈັດຕັ້ງປະຕິບັດ ວສຊ ໃນປີ 2024. ທ່ານ ນາງ ບຸນທະໜອມ ນາກລີລາ ຫົວໜ້າຂະແໜງອະນາໄມກັນພະຍາດ ແລະ ສົ່ງເສີມສຸຂະພາບ ແຂວງເຊກອງ ໄດ້ກ່າວວ່າ: ພະຍາດໝາກແດງໃຫຍ່ ແລະ ໝາກແດງນ້ອຍ ເປັນພະຍາດຮ້າຍແຮງຊະນິດໜຶ່ງ, ສະນັ້ນ ເພື່ອເປັນການປ້ອງກັນ, ພັກ ແລະ ລັດຖະບານ ກໍຄືຄະນະພັກ-ອົງການປົກຄອງແຂວງເຊກອງ ໂດຍສະເພາະແມ່ນຂະແໜງສາທາລະນະສຸກແຂວງ ຈິ່ງໄດ້ເອົາໃຈໃສ່ເປັນພິເສດໃນການກະກຽມເປີດບັ້ນຂະບວນການຈັດຕັ້ງ ວສຊ ເພື່ອກັນໄວ້ແຕ່ຕົ້ນ ໂດຍປີ 2024 ນີ້ແຂວງເຊກອງ ມີເດັກໃນກຸ່ມເປົ້າໝາຍ 13.834 ຄົນ ໃນ 4 ຕົວເມືອງຄື: ເມືອງລະມາມ 3.620 ຄົນ, ກະລຶມ 2.898 ຄົນ, ດາກຈຶງ 3.225 ຄົນ ແລະ ເມືອງທ່າແຕງ 4.091 ຄົນ ໂດຍໄລຍະການຈັດຕັ້ງປະຕິບັດແມ່ນຈະເລີ່ມແຕ່ວັນທີ 20-30 ພຶດສະພາ 2024.
ທ່ານ ເພັດສະໄໝ ເທບວົງສາ ກ່າວວ່າ: ການສັກວັກຊິນກັນພະຍາດໃຫ້ກຸ່ມເປົ້າໝາຍຕໍ່າກວ່າ 80% ຈະເຮັດໃຫ້ມີການລະບາດພະຍາດໝາກແດງ ເຊິ່ງເປັນອັນຕະລາຍຫລາຍ ຈຶ່ງຢາກຮຽກຮ້ອງໃຫ້ພາກສ່ວນທີ່ກ່ຽວຂ້ອງ ໂດຍສະເພາະ ຄກມດ ຂັ້ນແຂວງ ອອກແຈ້ງການເຖິງ ຄກມດ ຂັ້ນເມືອງ, ບ້ານ ເພື່ອຊຸກຍູ້, ປຸກລະດົມພໍ່ແມ່ປະຊາຊົນ ໃນແຕ່ລະບ້ານ ໃຫ້ໄດ້ຮັບວັກຊິນ 95% ນໍາທີມແພດເຄື່ອນທີ່, ສຸກສາລາ, ໂຮງໝໍເມືອງຂອງຕົນ, ຂະແໜງສຶກສາ ຕ້ອງຊ່ວຍປຸກລະດົມຜູ້ປົກຄອງເດັກ, ນາຍຄູໂຮງຮຽນລ້ຽງເດັກ-ອະນຸບານ ໃຫ້ເດັກລຸ່ມ 5 ປີ ໄດ້ຮັບວັກຊິນ 95%, ພ້ອມທັງຮຽກຮ້ອງໃຫ້ຂະແໜງຖະແຫລງຂ່າວໂຄສະນາແຈ້ງຂ່າວຜ່ານວິທະຍຸ, ໂທລະໂຄ່ງໃນແຕ່ລະຂັ້ນ ໃຫ້ທຸກຄົນມີສ່ວນຮ່ວມນໍາເດັກກຸ່ມເປົ້າໝາຍເຂົ້າຮັບວັກຊິນ ເພື່ອຮັບປະກັນໃຫ້ໄດ້ຫລາຍກວ່າ 95%.
ຂ່າວ: ພຸດທະສອນ
