ແຂວງເຊກອງໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານສົ່ງເສີມ ແລະ ຄຸ້ມຄອງການລົງທຶນເອກະຊົນພາຍໃນ ແລະ ຕ່າງປະເທດ ໃນວັນທີ 29 ກໍລະກົດ 2024 ທີ່ສະໂມສອນແຂວງ ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໃຫ້ກຽດເຂົ້າຮວ່ມ.
ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະ ການລົງທຶນແຂວງລາຍງານວ່າ: ປັດຈຸບັນ ທົ່ວແຂວງເຊກອງ ມີໂຄງການລົງທຶນພາກເອກະຊົນພາຍໃນ ແລະ ຕ່າງປະເທດ (FDI) ທັງໝົດ 124 ໂຄງການ ມູນຄ່າຕາມສັນຍາ 9.547 ລ້ານໂດລາ ແລະ ຄາດຄະເນການຈັດຕັ້ງປະຕິບັດຕົວຈິງປະມານ 3.239 ລ້ານໂດລາ ຫຼື ປະມານ 35% ຂອງມູນຄ່າທັງໝົດ. ໃນນີ້, ການລົງທຶນຂອງເອກະຊົນພາຍໃນ 79 ໂຄງການ, ມູນຄ່າ 2.059 ລ້ານໂດລາ ກວມເອົາ 61,62% ແລະ ການລົງທຶນຂອງເອກະຊົນຕ່າງປະເທດ 45 ໂຄງການ ມູນຄ່າ 1.311 ລ້ານໂດລາ ກວມເອົາ 38,37% ເຊິ່ງໂຄງການທັງໝົດ ນອນຢູ່ໃນຂັ້ນຕອນບົດບັນທຶກຄວາມເຂົ້າໃຈ (MOU) 34 ໂຄງການ, ຂັ້ນຕອນພັດທະນາໂຄງການ (PDA) 51 ໂຄງການ ແລະໃນສັນຍາເຊົ່າ-ສໍາປະທານ ກັບພະແນກການເງິນແຂວງ 44 ໂຄງການ. ຊຶ່ງໃນຂົງເຂດພະລັງງານໄຟຟ້າ 55 ໂຄງການ ມູນຄ່າ 2.902 ລ້ານໂດລາ ກວມເອົາ 86.83%; ໃນຂົງເຂດບໍ່ແຮ່ 24 ໂຄງການ ມູນຄ່າ 1.012 ລ້ານໂດລາ ກວມເອົາ 10,59 %; ໃນຂົງເຂດກະສິກຳ-ປ່າໄມ້ 35 ໂຄງການ ມູນຄ່າ 225 ລ້ານໂດລາ ກວມເອົາ 2,35% ແລະໃນຂົງເຂດບໍລິການ-ການທ່ອງທ່ຽວ 11 ໂຄງການ ມູນຄ່າ 8.06 ລ້ານໂດລາ ກວມເອົາ 0.24% ຂອງມູນຄ່າທັງໝົດ.
ຂ່າວ: ຂ່າວເຊກອງ
