ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ໃນໄລຍະຜ່ານມາ, ແຂວງເຊກອງໄດ້ສຸມໃສ່ຊຸກຍູ້ສົ່ງເສີມການຜະລິດ ແລະ ສ້າງຖານການຜະລິດກະສິກໍາເປັນສິນຄ້າ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ພ້ອມທັງຊຸກຍູ້ສົ່ງເສີມຜູ້ປະກອບການ ສ້າງຜະລິດຕະພັນສິນຄ້າໜຶ່ງເມືອງໜຶ່ງຜະລິດຕະພັນ (ໂອດັອບ) ທີ່ມີມາດຕະຖານ ແລະ ຍືນຍົງ, ສ້າງສະພາບແວດລ້ອມທີ່ເອື້ອອໍານວຍ ແລະ ພັດທະນາທຸລະກິດຂະໜາດນ້ອຍ ແລະ ຂະໜາດກາງ (SME) ໄປສູ່ຄຸນນະພາບໃໝ່ໃຫ້ມີຄວາມເຂັ້ມແຂງ ແລະ ສາມາດເຂົ້າເຖິງຕະຫລາດສາກົນ.
ທ່ານ ສີສຸພັນ ມະຫາວົງ ຫົວໜ້າຫ້ອງວ່າການ ແຂວງເຊກອງ ລາຍງານເມື່ອບໍ່ດົນນີ້ວ່າ: ໃນໄລຍະ 4 ເດືອນຕົ້ນປີ 2024 ການຜະລິດເຂົ້ານາແຊງປະຕິບັດໄດ້ 3.976 ໂຕນ; ພືດສະບຽງອາຫານ 6.021 ໂຕນ ແລະ ພືດເປັນສິນຄ້າ 10.248 ໂຕນ. ພ້ອມນີ້, ກໍໄດ້ເອົາໃຈໃສ່ປະຕິບັດນະໂຍບາຍສິນເຊື່ອ ເພື່ອກະຈາຍແຫລ່ງທຶນສູ່ທ້ອງຖິ່ນ ເລກທີ 765/ທຫລ ແລະ ນະໂຍບາຍສິນເຊື່ອເພື່ອກະຕຸ້ນເສດຖະກິດ ເລທີ 766/ທຫລ ມາຮອດປັດຈຸບັນ ມີຫົວໜ່ວຍທຸລະກິດທີ່ມີເງື່ອນໄຂ 10 ຫົວໜ່ວຍ ໃນນີ້, ໄດ້ດໍາເນີນການເຊັນສັນຍາປ່ອຍກູ້ ແລະ ໂອນສໍາເລັດ 5 ຫົວໜ່ວຍ ວົງເງິນ 8,3 ຕື້ກີບ ແລະ ຍັງສືບຕໍ່ຄົ້ນຄວ້າ 5 ຫົວໜ່ວຍ ວົງເງິນ 14,02 ຕື້ກີບ. ພ້ອມນີ້, ໄດ້ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງລາຄາສິນຄ້າໃນທ້ອງຕະຫລາດ ຕິດພັນກັບການສະໜອງສະບຽງອາຫານ ແລະ ນໍ້າມັນເຊື້ອໄຟຢ່າງເປັນປົກກະຕິ; ສົ່ງເສີມຜູ້ປະກອບການ ສ້າງຜະລິດຕະພັນສິນຄ້າໂອດັອບ ທີ່ມີມາດຕະຖານ ມີທ່າອ່ຽງເພີ່ມຂຶ້ນ ສາມາດຮັບຮອງໄດ້ກາໝາຍໜຶ່ງເມືອງໜຶ່ງຜະລິດຕະພັນ ທັງໝົດ 11 ຫົວໜ່ວຍ 14 ລາຍການ; ສ້າງສະພາບແວດລ້ອມ ທີ່ອໍານວຍຄວາມສະດວກ ໃຫ້ພາກທຸລະກິດ ແລະ ພັດທະນາ SME ໄປສູ່ຄຸນນະພາບໃໝ່ໃຫ້ເຂັ້ມແຂງ; ປະຕິບັດການນໍາເຂົ້າສິນຄ້າໄດ້ທັງໝົດ 5 ແສນກວ່າໂດລາສະຫະລັດ ເທົ່າກັບ 2,78% ຂອງແຜນການ (ແຜນ 18,90 ລ້ານໂດລາສະຫະລັດ) ແລະ ສົ່ງອອກບັນລຸໄດ້ 59,16 ລ້ານໂດລາສະຫະລັດ ເທົ່າກັບ 23,11% ຂອງແຜນການ (ແຜນ 256 ລ້ານໂດລາ) ເຮັດໃຫ້ເກີນດຸນການຄ້າປະມານ 58,64 ລ້ານໂດລາ.
ທ່ານ ສີສຸພັນ ມະຫາວົງ ໃຫ້ຮູ້ຕື່ມວ່າ: ເພື່ອເຮັດໃຫ້ເສດຖະກິດ-ສັງຄົມ ຂະຫຍາຍຕົວ, ການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ມີປະສິດທິພາບ-ປະສິດທິຜົນ ແຂວງເຊກອງຈະສຸມໃສ່ຊຸກຍູ້ສົ່ງເສີມການຜະລິດ, ສ້າງກົນໄກຜະລິດ ແລະ ສະໜອງສະບຽງອາຫານໃຫ້ພຽງພໍກັບຄວາມຕ້ອງການບໍລິໂພກພາຍໃນ ແລະ ສົ່ງອອກເປັນສິນຄ້າ ຕາມເງື່ອນໄຂຕົວຈິງຂອງແຂວງ; ເອົາໃຈໃສ່ຄຸ້ມຄອງລາຄາສິນຄ້າ, ການນໍາເຂົ້າ-ສົ່ງອອກສິນຄ້າ, ສະໜອງສະບຽງອາຫານໃຫ້ໂຄງການໃຫຍ່ ທີ່ດໍາເນີນຢູ່ທ້ອງຖິ່ນ ໃຫ້ເປັນຮູບປະທໍາ ເພື່ອຊ່ວຍໜູນການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກ ຂອງປະຊາຊົນໃຫ້ດີຂຶ້ນເທື່ອລະກ້າວ.
ຂ່າວ-ພາບ: ສັນຍາ, ຂປລ