ພິທີເຊັນບົດບັນທຶກການຮ່ວມມືຄຸ້ມຄອງ, ປົກປັກຮັກສາປ່າໄມ້, ສັດປ່າ ແລະ ເຄື່ອງປ່າຂອງດົງ ລະຫວ່າງ ກອງກວດກາປ່າໄມ້ ພະແນກກະສິກໍາ ແລະ ປ່າໄມ້ ແຂວງເຊກອງ ສປປ ລາວ ແລະ ກອງປ້ອງກັນປ່າໄມ້ ພະແນກກະສິກໍາ ແລະ ພັດທະນາຊົນນະບົດ ແຂວງເທື່ອທຽນເຫວ້ ສສ ຫວຽດນາມ ໃນວັນທີ 31 ກໍລະກົດ 2024 ທີ່ເມືອງທ່າແຕງ ແຂວງເຊກອງ ຕາງໜ້າລົງນາມໂດຍທ່ານ ສີສຸພັນ ສຸວັນນະຫົງ ຫົວໜ້າກອງກວດກາປ່າໄມ້ ພະແນກກະສິກໍາ ແລະ ປ່າໄມ້ແຂວງເຊກອງ ແລະ ທ່ານ ເລ ຫງ໋ອກ ຕວັນ ຫົວໜ້າກອງປ້ອງກັນປ່າໄມ້ ພະແນກກະສິກໍາ ແລະ ພັດທະນາຊົນນະບົດແຂວງເທື່ອທຽນເຫວ້ ໂດຍມີທ່ານ ຄໍາພັນ ພະສະແຫວງ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງເຊກອງ, ທ່ານ ຫງວຽນ ດ໋າຍແອັງຕວັນ ຮອງຫົວໜ້າພະແນກກະສິກໍາ ແລະ ພັດທະນາຊົນນະບົດແຂວງເທື່ອທຽນເຫວ້ ພ້ອມດ້ວຍຂະແໜງການກຽວຂ້ອງຂອງສອງຝ່າຍ ເຂົ້າຮ່ວມ.
ການເຊັນບົດບັນທຶກຮ່ວມມືຄັ້ງນີ້, ເພື່ອເປັນການປະຕິບັດຂໍ້ຕົກລົງການຮ່ວມມື ລະຫວ່າງ ແຂວງເຊກອງ ສປປ ລາວ ແລະ ແຂວງເທື່ອທຽນເຫວ້ ສສ ຫວຽດນາມ ໃນໄລຍະປີ (2022-2026) ແລະ ບົດບັນທຶກກອງປະຊຸມພົບປະປະຈຳປີ ຄັ້ງວັນທີ 22 ທັນວາ 2023 ລະຫວ່າງ ກະຊວງກະສິກຳ ແລະ ປ່າໄມ້ ສປປ ລາວ ກັບກະຊວງກະສິກໍາ ແລະ ພັດທະນາຊົນນະບົດ ສສ ຫວຽດນາມ, ຊຶ່ງສອງຝ່າຍຈະເພີ່ມທະວີການປະສານສົມທົບ, ແລກປ່ຽນຂໍ້ມູນ-ຂ່າວສານ, ຄວາມຮູ້ ແລະ ບົດຮຽນໃນການຄວບຄຸມ, ຕ້ານ ແລະ ສະກັດກັ້ນການທໍາລາຍປ່າໄມ້, ຂຸດຄົ້ນຊັບພະຍາກອນທຳມະຊາດ, ແຮ່ທາດ, ການລ່າສັດປ່າ, ຄ້າຂາຍ, ຂົນສົ່ງໄມ້ ແລະ ເຄື່ອງປ່າຂອງດົງທີ່ຜິດກົດໝາຍ; ເພີ່ມທະວີການກວດກາ, ຕິດຕາມ, ປຽບທຽບປະລິມານໄມ້, ຜະລິດຕະພັນປ່າໄມ້ ແລະ ສັດປ່າທີ່ນໍາເຂົ້າ-ສົ່ງອອກຜ່ານເຂດຊາຍແດນ; ເພີ່ມທະວີແລກປ່ຽນຂໍ້ມູນ-ຂ່າວສານວຽກງານຕ້ານ ແລະ ສະກັດກັ້ນໄຟໄໝ້ປ່າ; ໂຄສະນາສຶກສາອົບຮົມປະຊາຊົນລຽບຊາຍແດນ ໃຫ້ຮັບຮູ້-ເຂົ້າໃຈ ກ່ຽວກັບການປົກປັກຮັກສາຊັບພະຍາກອນປ່າໄມ້, ຄຸ້ມຄອງອະນຸລັກຊີວະນາໆພັນ ແລະ ຕ້ານການກະທໍາຜິດການຂຸດຄົ້ນ, ຄ້າຂາຍ, ຂົນສົ່ງໄມ້, ສັດປ່າ ແລະ ເຄື່ອງປ່າຂອງດົງ ພ້ອມທັງສະກັດກັ້ນການທໍາລາຍ-ບຸກລຸກປ່າໄມ້ ແລະ ທີ່ດິນປ່າໄມ້ຢູ່ເຂດລຽບຊາຍແດນ ແຕ່ໃນກໍລະນີກວດພົບເຫັນ ຕ້ອງແຈ້ງໃຫ້ກັນຮັບຊາບຢ່າງທັນການ ແລະ ປະສານສົມທົບກັນ ເພື່ອແກ້ໄຂ.
ພ້ອມກັນນີ້, ສອງຝ່າຍຈະຕັ້ງໜ້າສະໜັບສະໜູນເຊິ່ງກັນ ແລະ ກັນ, ສະເໜີບັນດາໂຄງການ ຫລື ແຜນງານການຮ່ວມມື ເພື່ອຊອກຫາການສະໜັບສະໜູນ ຈາກບັນດາອົງການຈັດຕັ້ງສາກົນ, ຮ່ວມມືໃນການຕິດຕາມ, ອະນຸລັກ ແລະ ຟື້ນຟູບັນດາຊະນິດພັນສັດປ່າທີ່ໃກ້ຈະສູນພັນ ພ້ອມທັງ ຜັດປ່ຽນການເປັນເຈົ້າພາບຈັດກອງພົບປະແລກປ່ຽນບົດຮຽນ, ປະເມີນຜົນການຈັດຕັ້ງປະຕິບັດບົດບັນທຶກການຮ່ວມມື ແລະ ຄົ້ນຄວ້າປຶກສາຫາລືປັບປຸງບົດບັນທຶກການຮ່ວມມື ໃຫ້ແທດເໝາະກັບສະພາບຕົວຈິງ ບົນພື້ນຖານຄວາມສະເໝີພາບ, ການຊ່ວຍເຊິ່ງກັນ ແລະ ກັນ ແລະ ມີຜົນປະໂຫຍດຮ່ວມກັນ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະແຂວງເຊກອງ-ແຂວງເທື່ອທຽນເຫວ້ ກໍຄືກອງກວດກາປ່າໄມ້ແຂວງເຊກອງ ກັບກອງປ້ອງກັນປ່າໄມ້ ແຂວງເທື່ອທຽນເຫວ້ໃຫ້ຈະເລີນງອກງາມ ແລະ ແໜ້ນແຟ້ນຍິ່ງຂຶ້ນ.
ຂ່າວ-ພາບ: ສັນຍາ
