ພະແນກກະສິກຳ ແລະ ປ່າໄມ້ ແຂວງເຊກອງ ເປີດຂະບວນການປູກຕົ້ນໄມ້ ແລະ ບວດຕົ້ນພໍ່ແມ່ພັນໄມ້ສັກ ໃນວັນທີ 29 ພຶດສະພາ 2024 ທີ່ສວນແຫລ່ງແກ່ນພັນໄມ້ສັກ ບ້ານປາກໂທນ ເມືອງລະມາມ ເນື່ອງໃນໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ ໂດຍການເຂົ້າຮ່ວມຂອງທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍຄະນະນໍາຂັ້ນແຂວງ, ເມືອງລະມາມ, ພະເຖຣາ-ນຸເຖຣະ, ນັກຮຽນ-ນັກສຶກສາ ແລະ ພະນັກງານ-ລັດຖະກອນ ເຂົ້າຮ່ວມ.
ທ່ານ ເສີມສີ ສຸລິຕະ ຫົວໜ້າພະແນກກະສິກຳ ແລະ ປ່າໄມ້ ແຂວງເຊກອງ ກ່າວວ່າ: ສວນໄມ້ສັກບ້ານປາກໂທນ ເມືອງລະມາມ ແມ່ນທ່ານ ຄໍາຈັນ (ພະນັກງານປ່າໄມ້ຈາກສູນກາງ) ໄດ້ນໍາພາ ແລະ ປຸກລະດົມປະຊາຊົນເຂດໃກ້ຄຽງ ປູກໄມ້ສັກໃນສວນປູກແຫ່ງນີ້ ແຕ່ປີ 1960 ແລະ ຕົກມາຮອດປີ 1990 ພະແນກກະສິກໍາ ແລະ ປ່າໄມ້ແຂວງເຊກອງ (ຂະແໜງປ່າໄມ້) ໄດ້ສ້າງເປັນສະຖານີສວນກ້າເບ້ຍໄມ້ ໂດຍໄດ້ຮັບທຶນສະໜັບສະໜູນ ຈາກອົງການຊີດາ (Sida). ໃນປີ 2009 ສູນຄົ້ນຄວ້າກະສິກຳ ແລະ ປ່າໄມ້ ໄດ້ຄັດເລືອກຕົ້ນພໍ່ພັນ-ແມ່ພັນ ເພື່ອກໍານົດເປັນສວນແຫລ່ງແກ່ນພັນໄມ້ສັກ ແນໃສ່ຕອບສະໜອງແກ່ນພັນໄມ້ ໃນການຜະລິດເບ້ຍໄມ້ແຕ່ລະປີ. ປັດຈຸບັນ ພາຍໃນສວນດັ່ງກ່າວ ມີໄມ້ສັກຫລາຍກວ່າ 150 ຕົ້ນ ໃນນີ້, ວັດຮອບແຕ່ 120-360 ຊັງຕີແມັດ ຈໍານວນ 51 ຕົ້ນ, ວັດຮອບແຕ່ 60-100 ຊັງຕີແມັດ ຈໍານວນ 99 ຕົ້ນ ແລະ ໄດ້ກຳນົດເປັນຕົ້ນແມ່ພັນ 50 ຕົ້ນ.
ທ່ານ ບຸນສໍາ ສີສັກ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງເຊກອງ ໃຫ້ຮູ້ວ່າ: ໃນປີ 2024 ແຂວງເຊກອງ ມີແຜນການເກັບແກ່ນໄມ້ ໃຫ້ໄດ້ 1 ພັນກິໂລກຣາມ, ຜະລິດເບ້ຍໄມ້ໃຫ້ໄດ້ 1,2 ລ້ານເບ້ຍ, ປູກໄມ້ ແລະ ຟື້ນຟູປ່າໄມ້ໃຫ້ໄດ້ 11.242 ເຮັກຕາ ໃນນີ້, ປູກໄມ້ ແລະ ຟື້ນຟູປ່າໄມ້ເຂດປ່າປ້ອງກັນໃຫ້ໄດ້ 5.660 ເຮັກຕາ, ປູກໄມ້ ແລະ ຟື້ນຟູປ່າໄມ້ເຂດປ່າສະຫງວນ 1.338 ເຮັກຕາ, ປູກໄມ້ ແລະ ຟື້ນຟູປ່າໄມ້ເຂດປ່າຜະລິດ 4.200 ເຮັກຕາ ແລະ ປູກໄມ້ນອກ 3 ປະເພດປ່າ (ປ່າປ້ອງກັນ, ປ່າຜະລິດ ແລະ ປ່າສະຫງວນ) 44 ເຮັກຕາ. ສໍາລັບເບ້ຍໄມ້ທີ່ນໍາມາປູກຢູ່ສວນແຫລ່ງແກ່ນພັນໄມ້ສັກ ບ້ານປາກໂທນ ໃນມື້ື້ນີ້ ມີທັງໝົດ 240 ເບ້ຍ ຊຶ່ງປະກອບມີໄມ້ດູ່ 15 ເບ້ຍ, ໄມ້ຍາງ 20 ເບ້ຍ, ໄມ້ແຕ້ຄ່າ 50 ເບ້ຍ, ໄມ້ແຄນ 50 ເບ້ຍ, ໄມ້ກາກະເລົາ 55 ເບ້ຍ ແລະ ໄມ້ມ່ວງ 50 ເບ້ຍ.
ໂອກາດນີ້, ທ່ານ ເຫລັກໄຫລ ສີວິໄລ ໄດ້ຮຽກຮ້ອງໃຫ້ການນໍາຂອງແຂວງ-ເມືອງ ໂດຍສະເພາະການນໍາເມືອງ ຕ້ອງໄດ້ຕິດຕາມ, ກວດກາ, ຊຸກຍູ້ຜູ້ປະກອບການ, ຄຸ້ມຄອງບັນດາຫົວໜ່ວຍລົງທຶນຂະໜາດໃຫຍ່ ກໍຄືປະຊາຊົນ ໃຫ້ມີການປະກອບສ່ວນ ໃນການປູກໄມ້ ແລະ ປົກປັກຮັກສາຟື້ນຟູປ່າໄມ້ທໍາມະຊາດໃຫ້ຍືືນຍົງ ພ້ອມທັງວາງກົນໄກ ແລະ ມາດຕະການ, ປະຕິບັດຕໍ່ຜູ້ລະເມີດກົດໝາຍປ່າໄມ້ຢ່າງເຂັ້ມງວດ.
ຂ່າວ: ພຸດທະສອນ
