ເຊກອງ ເປີດປີທ່ອງທ່ຽວລາວ ແລະ ບຸນນະມັດສະການເສົາຫລັກເມືອງບັນດາເຜົ່າ ແລະ ອະນຸສາວະລີອົງແກ້ວ

ພິທີເປີດປີທ່ອງທ່ຽວລາວ 2024 ທີ່ແຂວງເຊກອງ ແລະ ບຸນນະມັດສະການເສົາຫລັກເມືອງບັນດາເຜົ່າ ແລະ ອະນຸສາວະ ລີອົງແກ້ວ ປະຈໍາປີ 2024 ຈັດຂຶ້ນໃນວັນທີ 24 ມັງກອນ 2024 ທີ່ເດີ່ນສວນເສົາຫລັກເມືອງ ໂດຍມີ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ແຂກຖືກເຊີນ ເຂົ້າຮ່ວມ.

ພິທີເປີດປີທ່ອງທ່ຽວລາວທີ່ແຂວງເຊກອງ ແມ່ນຈັດຂຶ້ນພ້ອມກັບບຸນນະມັດສະການເສົາຫລັກເມືອງບັນດາເຜົ່າ ແລະ ອະນຸສາວະລີອົງແກ້ວ ເຊິ່ງໄດ້ກໍານົດຄໍາຂວັນ: “ ທ່ອງທ່ຽວກັງ ຫັນລົມ ຊົມທໍາມະຊາດ ນໍ້າຕົກຕາດ ອາກາດສົດໃສ ໄປທ່ຽວຊົມວັດທະນະທໍາ ເຜົ່າອັນລໍ່າເລີດ ສິ່ງປະເສີດໂສມດາກຈຶງ ສູນລວມ ເປັນໜຶ່ງເສົາຫລັກເມືອງ ລືເຮືອງສຽງແຄນ ແດນວິລະຊົນ ” ໂດຍໄດ້ກໍານົດເອົາ 6 ກິດຈະກໍາຫລັກຄື: ບຸນຊ່ວງເຮືອເມືອງລະມາມ, ບຸນສະຫລອງຜົນສໍາເລັດຂອງເຜົ່າກະຕູ ບ້ານກັນດອນໃໝ່ເມືອງທ່າແຕງ, ບຸນຊ່ວງເຮືອ-ແພເມືອງດາກຈຶງ, ບຸນພາເຂົ້າໂດຍສານບ້ານຈະແຣະ ເມືອງກະລຶມ ແລະ ສະເຫລີມສະຫລອງວັນສ້າງ ຕັ້ງແຂວງເຊກອງ ຄົບຮອບ 40 ປີ ເພື່ອຮອງຮັບນັກທ່ອງທ່ຽວ ແລະ ສ້າງຂະບວນການໃຫ້ຟົດຟື້ນ.

ປັດຈຸບັນ, ທົ່ວແຂວງມີແຫລ່ງທ່ອງທ່ຽວທາງດ້ານປະຫວັດ ສາດ 9 ແຫ່ງ, ທຳມະຊາດ 22 ແຫ່ງ ແລະ ວັດທະນະທຳ 7 ແຫ່ງ. ພ້ອມນີ້, ຍັງມີແຫລ່ງທ່ອງທ່ຽວທາງດ້ານກະສິກໍາ, ອຸດສາຫະກໍາ, ໂຮງແຮມ, ເຮືອນພັກ, ຮ້ານອາຫານ ແລະ ສິ່ງອຳນວຍຄວາມສະ ດວກດ້ານຕ່າງໆ ເພື່ອຮອງຮັບນັກທ່ອງທ່ຽວທີ່ຈະມາທ່ຽວຊົມແຂວງເຊກອງ.

ໃນໂອກາດນີ້, ທ່ານ ເຫລັກໄຫລ ສີວິໄລ ໄດ້ມີຄໍາເຫັນວ່າ: ພິທີເປີດປີທ່ອງທ່ຽວລາວທີ່ແຂວງເຊກອງຄັ້ງນີ້, ເປັນຄັ້ງທີ 4 ເຊິ່ງເປັນເຫດການທີ່ສໍາຄັນ ເພື່ອສະແດງໃຫ້ເຫັນວ່າ ປະຊາຊົນບັນດາເຜົ່າພານໃນແຂວງເຊກອງ ໄດ້ມີຄວາມສາມັກຄີ ແລະ ຫ້າງຫາກະ ກຽມການເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວທີ່ມາ ຈາກທົ່ວທຸກມູນໂລກ, ພ້ອມທັງເປັນການເປີດກວ້າງການຮ່ວມມື, ການເຊື່ອມໂຍງພາກພື້ນ ແລະ ສາກົນ ແນໃສ່ດຶງດູດການລົງທຶນ, ດຶງດູດນັກທ່ອງທ່ຽວ ຍູ້ແຮງການພັດທະນາເສດຖະກິດ-ສັງຄົມ, ສ້າງອາຊີບ-ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນ. ພ້ອມນັ້ນ, ການຈັດບຸນນະມັດສະການເສົາຫລັກເມືອງບັນດາເຜົ່າ ແລະ ອະນຸສາວະລີອົງແກ້ວ ເຊິ່ງນອກຈາກເປັນການສົ່ງເສີມການທ່ອງທ່ຽວແລ້ວ, ຍັງເປັນການໂຄສະນາ, ການອະນຸ ລັກປົກປັກ ຮັກສາ ແລະ ສົ່ງເສີມວັດທະນະທໍາ, ຮີດຄອງປະເພນີອັນດີງາມຂອງຊາດ, ຂອງປະຊາຊົນບັນດາເຜົ່າໃຫ້ຊາວໂລກໄດ້ຮັບຮູ້ ແລະ ຢູ່ຄູ່ກັບປະຊາຊົນແຂວງເຊກອງຕະຫລອດໄປ.

ພ້ອມນີ້, ທ່ານໄດ້ເຊີນຊວນປະຊາຊົນຊາວແຂວງເຊກອງ ເຂົ້າ ຮ່ວມການຜະລິດ, ການສະໜອງ ແລະ ການບໍລິການດ້ານຕ່າງໆດ້ວຍຮອຍຍິ້ມ, ຮັກສາຄວາມສະຫງົບ, ຄວາມເປັນລະບຽບຮຽບ ຮ້ອຍ ແລະ ຄວາມສະອາດສວຍງາມໃນສະຖານທີ່ບໍລິການຕ່າງໆ ເພື່ອສ້າງຄວາມປະທັບໃຈໃຫ້ແກ່ນັກທ່ອງທ່ຽວ ມາເຫັນເຊກອງແລ້ວ ຢາກມາອີກ.

ຂ່າວ: ສັນຍາ

ພາບ: ພຸດທະສອນ